Explore every episode of the podcast Shift أهل

بهاي الحلقة بحكي مع أسرار كيّال - اخصائية نفسية تربوية، باحثة في علم النفس التربوي وطالبة دكتوراه في جامعة برايتون.منحكي معها عن مفهوم الإرث النفسي. الإرث اللي بتعرفه أسرار كـ ذاكرة نفسية متوارثة – جهاز نفسي تكوّن عبر أجيال نتيجة تجارب وصدمات وسياقات اجتماعية وسياسية: الجهاز في جوانب تكيُّفية، وجوانب غير تكيُّفية.

بحديثنا منركز بشكل خاص على المجتمع الفلسطيني في الداخل - فلسطينيي الـ48، مع إسقاطات وارتباطات بالفلسطينيين حولين العالم ومع ربط بتجارب مشابهة في الوطن العربي. ومنجاوب على سؤال محوري: ايش يعني انه احنا جيل حامل تاريخ كامل، وكيف نقدر نعالج هذا التاريخ بدل ما نعيد إنتاجه؟

من خلال الحوار منتعرّف على معنى الإرث النفسي- جذوره، وكيف بنتقل بين الأجيال- من خلال العلاقات الأسرية ومن خلال الـ epigenetics - ما فوق الجينات. ومنقارن بين السلوك "التكيّفي" اللي ساعد أجدادنا ينجوا، والسلوك "غير التكيّفي" اللي ما بخدمنا اليوم.

وبالحلقة منحكي عن مجموعة من العوامل الصادمة والتجارب النفسية العميقة اللي أثّرت على الفلسطينيين بالداخل خلال السنين-  النكبة، الحرمان المسكّت، الصمت القسري، الصدمة الاستعمارية، انقطاع السردية، فقدان الأمان والإطار الجمعي، وغيرها - وأسرار بتعطي تفسير دقيق لكل واحد منها، وبترجع النا لجذوره التاريخية والسياسية، وبتشرح كيف هاي الصدمات والأحداث بعدها لليوم بتشكّل سلوكنا، علاقاتنا، وطريقة تعاملنا مع أنفسنا ومع أولادنا.

بالتحديد، تعمقنا في كيف تجارب الصدمة، والسياق الاستعماري وطريقة التعليم شكّلت دماغنا، تفكيرنا، وردات فعلنا. ومنناقش مع أسرار كيف جهازنا العصبي يشتغل أكثر بحالة تأهّب وردّ فعل سريع وحفظ معلومات، على حساب الأجزاء اللي بتدعم اللعب، التجربة الحيّة، والقدرة على رؤية الواقع بطريقة أعمق من "أسود / أبيض".

ومنحكي كمان كيف الصدمة بتعيش على الأطراف وبتخلّي الجهاز العصبي متأهب وجاهز يفرّغ- مرات بالغضب والعنف، ومرات بفرح عالي وطاقة مثل الدبكة والرقص. طرق مختلفة للتفريغ عن النفس بس خارجة من نفس الجرح.

منسمع من أسرار طرق عملية للتشافي وكيف منقدر نأخذ من هذا الإرث الجزء التكيفي اللي بخدمنا، ونكون واعيين للجزء غير التكيفي اللي ما بفيدنا وما نمرّره للأجيال الجاي. 

الحوار مش بس نظري - مليان أمثلة من الحياة اليومية وهو دعوة نفهم حالنا مش بس كأفراد، انما كجزء من قصة جماعية عميقة، فيها ألم كبير لكن فيها كمان إمكانية حقيقية للتشافي.

منختم الحلقة برسالة قوية من أسرار: الصدمات بتحجب الحب، لكن الحب هو اللي بشافي الصدمة

وأساس هذا التشافي هو إننا نحرّر حالنا من العجز المقرون بالعار - اذا أبطلنا العجز المقرون بالعار، بعلى عنا تقدير الذات - حب النفس. يعني التشافي ببلش من جوا - من استرجاع القدرة على الحب -  لما نرجع نحب حالنا، منصير نقدر نحب أولادنا، واللي حوالينا ومنسترجع إنسانيتنا. وبالنهاية احنا مجتمع كامل عم يدوّر على الحب والرعاية اللي انحرم منهم- على رعاية حقيقية - رعاية تعيد لمجتمعنا إحساسه بنفسه وقدرته يعيش. 

تابعونا على Instagram و TikTok للمزيد من المحتوى – @shiftahel

في هاي الحلقة من أهلShift، بحكي مع رينيه فراج أبو ديّة - أم لثلاثة أطفال، وصاحبة Renee Pilates وHer Journey by Renee.

رينيه بتمثل صورة الأمومة الحديثة، بنت بزنسين في السنوات الاخيرة خلال الأمومة، ومن حواليهم نشأ مجتمع نسائي صادق وداعم صار جزء من يومها ويوم كثير أمهات.

الحوار مع رينيه مش عن قصة نجاح سهلة، ولا عن توازن مثالي.

هو عن الحياة اليومية كيف ما هي بواقعها-منحكي عن الثمن وراء صورة الأم الريادية، عن الضغط وشعور الذنب اللي بتعيشه كل أم وعن العبء الذهني المستمر 24/7. رينيه بتشاركنا بشفافية كيف تخلصت من وهم "لازم أعمل كل اشي لحالي" وتعلمت تقول ببساطة: "أنا بحاجة لمساعدة"، وانه طلب المساعدة مش علامة ضعف.

منحكي عن الأشياء اللي الأمهات غالبًا بيسكتوا عنها وما بحبوا يشاركوها - مشاعر الذنب اللي بترافق الأم العاملة- من تحضير الأكل، للغياب عن البيت، للتعليقات الاجتماعية- وكيف بتتعامل مع الأحكام والتوقعات العالية اللي بتنحط على الأمهات من المجتمع.

رينيه بتحكيلنا كمان عن المجتمع النسائي الداعم اللي نشأ بالصدفة حوالين الاستوديو، وكيف تحول لمساحة آمنة للراحة والفضفضة بعيد عن المثالية.

هاي الحلقة قريبة من كل أم عاملة وكل أم بتحاول توازن,,, وبتفشل,,,  وبترجع تحاول. هي تذكير انه الأمومة مش لازم تكون مثالية، وانك مش لحالك في هاي الرحلة.

تابعونا على Instagram و TikTok للمزيد من المحتوى – @shiftahel

في هاي الحلقة من أهلShift، بستضيف الفنان الكوميدي عدي خليفة- زوج لرنا وأب لطفلين- شمس وكون.في الحوار مع عدي منمشي معه من الطفل… للإنسان…للزوج… للأب… للفنان,  بنفهم كيف كل مرحلة بنت اللي بعدها، وكيف بوازن بين عالمه الداخلي متطلبات حياته المختلفة. 

منرجع مع عدي للطفولة: الإشي اللي ضل معه، والإشي اللي تنازل عنه. منحكي عن علاقته العميقة مع ربّه، وعن الحدس اللي بيوجهه بقرارات كبيرة- من اختيارات الشغل، لوجوده جنب أبوه، لرفضه لفكرة “خطة باء”.منتعرف على عدي بابا، بحكيلنا عن اللحظة اللي حمل فيها ابنه شمس لأول مرة والبعد الجديد للحب اللي حسه، كيف تغيّرت أولوياته، وكيف هو ورنا عم ببنوا “كتالوج” خاص لتربية أولاده - بتبني طرق ومفهامين الي بتطابق في الدين والعلم منسمع عن السفرات، والعروض، والغياب اللي بيفرضه الشغل  وكيف بحاول يعوض، يكون حاضر، ويعيش “بذكريات أولاده المستقبلية”.

الحوار بيكشف كمان جانب ما بشوفه الجمهور من عدي: محل الضحك ببيته، الحساسية، والطفل اللي بعده جواته، وكيف جزء من شغله على حاله هو إنه يضل محافظ عليه. ومنرجع نحكي عن الكوميديا وعرض "عدي بابا والأربعين خازوق"  ليش بختار يجيب حاله فيه وقصصه الشخصية، وكيف الأبوة غيّرت رسالته. 

وبالنهاية، منسمع عن نظرة عدي لقدام: كفنان، كزوج، وكأب وعن الرسالة اللي بتمنى أولاده يسمعوها بعد سنين.

تابعونا على Instagram و TikTok للمزيد من المحتوى – @shiftahel

في هاي الحلقة من أهلShift، بحكي مع هشام ذياب، أب لأربع أولاد، ناشط اجتماعي، من مؤسسي مركز الوساطة في طمرة، ومرافق ومدرب لمديري مراكز الوساطة في المجتمع العربي. من خلال شغله في الميدان، ودوره اليوم في مرافقة وتدريب مديري مراكز الوساطة، هشام بشاركنا خبرة سنين طويلة من العمل في مرافقة خلافات وصراعات مختلفة. 

مع هشام، منحكي عن مفهوم "الوساطة"  كمهنة وكمهارة حياة أساسية لازم تكون جزء من تربيتنا اليومية. هذا الحوار برجعنا للأساس: البيت. منحكي عن كيف مفهومنا وتوجهنا للخلافات بتبلش من تربيتنا، وكيف طريقة تعاملنا معها كأهل هي اللي بتحدد سلوك أولادنا في المدرسة وفي الشارع. هشام بشاركنا إيمانه أنه كل مشكلة، مهما كانت صغيرة، هي فرصة لنعلّم أولادنا كيف يسمعوا، كيف يعبّروا عن غضبهم بكلمات مش بأفعال، وكيف كل مشكلة الها حل.

من خلال أمثلة وقصص من تجربته، منتعلم عن أدوات عملية مثل الإصغاء الحقيقي، أهمية التنازلات، وكيف مجرد إعطاء فرصة للكلام ممكن يحل %50 من المشكلة. منشوف كيف غياب هاي اللغة بالبيت هو اللي بيخلق الفراغ اللي بيكبر وبيظهر على شكل عنف بين شبابنا. 

منسمع عن مبادراته العملية، مثل دورة الوساطة اللي عملها لأولاد حارته، وتجربته مع طلاب صف خامس، كيف هاي التجارب بتثبت إنه تعليم مهارات الحوار من جيل صغير هو درس ضروري نعلمه لأولادنا.

هاي الحلقة هي دعوة لنغيّر نظرتنا للخلاف. في توقيت منواجه فيه واقع مجتمعي مؤلم، هذا الحوار هو  فرضة ننقل من محل الخوف واليأس، لسؤال "شو في بإيدنا نعمل؟" هشام "بيعطينا أمل ومسؤولية، وبذكرنا انه بالتوازي مع ضرورة التعامل مع واقعنا الصعب اليوم، الحل الحقيقي للمستقبل بيعتمد على قدرتنا على تربية جيل جديد بيعرف يحكي، يسمع، ويحل خلافاته بهدوء.

تابعونا على Instagram و TikTok للمزيد من المحتوى – @shiftahel

بهاي الحلقة، بحكي مع منال فريج: أم, جدة، مديرة حضانة دار السلام، ورئيسة مؤسسة الحياة للتوعية والتثقيف الصحي.

منال بتفتح قلبها وبتاخذنا معها بتجربتها الشخصية مع مرض السرطان وتبعياته الصحية. وبقلب هاي التجربة كان دورها كأم هو المحور, دور بتحبه كثير، حكينا كيف كانت تلاقي القوة والأمل بالرجعة للعناية بأولادها وبيتها, وكيف أولادها بنفس الوقت كانوا موجودين ليتحملوا مسؤوليات جديدة بالبيت.

حوارنا هو نظرة صادقة على الواقع اللي بتعيشه العائلة لما المرض يكون حاضر فيها. حكينا عن عن الأولاد اللي بتحملوا مسؤوليات جديدة، وعن أهمية وجود زوج داعم ومحب بهاي التجربة, عن الخوف اللي بكون جوا البيت، وعن الحوارات الصعبة اللي العائلة بتتجنبها عشان تحمي مشاعر بعض. وبين كل هاي التحديات، حكينا عن الإيمان والرضى كمصدر للقوة، وكيف كان تقبّل الواقع هو الخطوة الأولى للتعايش معه. 

تطرقنا كمان لنظرة المجتمع للمرض، وكيف ممكن جملة وحدة تسبب ألم كبير- وهذا بالضبط اللي دفع منال لتأسيس مؤسستها، عشان تغير هاي النظرة، وتشارك تجربتها، وتحكي عن أهمية أنه نسمع لجسمنا ونعيش حياة صحية.

منال بتلخص تجربتها بكلماتها الخاصة، وبتقول إنها "امرأة واجهت المرض بشجاعة وحولت تجاربها لرسالة حياة... وآمنت أن الألم ليس نهاية، انما هو فرصة للوعي والتغيير".

قبل ما تسمعوا الحلقة، مهم تعرفوا إنها محادثة ثقيلة بمواضيعها. لكنها بنفس الوقت، هي مساحة آمنة وصادقة جداً، بتجسد معنى الشجاعة الحقيقية، وبتعطي صوت للتجارب اللي كثير عائلات بتعيشها بصمت.

تابعونا على Instagram و TikTok للمزيد من المحتوى – @shiftahel

في هاي الحلقة من "أهلShift"، بلتقي مع دكتورة هديل الصانع، طبيبة، ناشطة اجتماعية، وأم لبنتين صغار.

راح نتعرف سوا على هديل من خلال هاي الهويات، ونشوف كيف الأمومة، الطب، والنشاط الاجتماعي بتشابكوا لخلق رؤية مميزة وشاملة.

حوارنا ببلش من الجذور- من بيت مبادر في اللقية، ومن قصة أم وأب حققوا انجازات بوجود تحديات كبيرة وزرعوا عندها معنى العمل الجماعي والانتماء.

من هناك، مننتقل لعالم الطب، ومنكتشف كيف نظرتها للمريض هي كـ "قصة كاملة"- فيها بيئة، عائلة, علاقات، ومجتمع- خلتها تبحث عن إجابات أعمق. هاي الإجابات أخذتها لدراسة لقب في الصحة العامة، لتفهم كيف صحتنا الشاملة مش بس بأجسامنا، انما كمان ببيئتنا، بالعدالة، وبالظروف اللي منعيشها.

وبالأخر، منوصل لقلب الحوار: الأمومة. هديل بتشاركنا بصراحة عن بداياتها الصعبة والوحدة الي شعرتها، عن وهم "التوازن" بين الشغل والامومة، وعن اللحظة اللي حست فيها إنها "استحت" من اختيارها لأكبر إنجاز بحياتها وكيف بالنسبة الها اليوم الأمومة هي "مطلب الساعة". 

تابعونا على Instagram و TikTok للمزيد من المحتوى – @shiftahel

في هاي الحلقة من "أهلShift"، بحكي مع حنان بري، أم لثلاثة أطفال. قبل سنتين، والد أولادها أخد الأطفال في رحلة,,, وما رجعوا. الخبر وصلها برسالة بتنشاف مرة واحدة فقط، ومن وقتها تغير كل شيء في حياتها.

من اللحظة اللي ابنها أسعد تشبث فيها وقال "أنا بدي أنتك" للرسالة اللي قلبت واقعها, حنان بتشاركنا في الطريق اللي مشت فيه بين الصدمة، الخسارة، ومحاولة الفهم.بتحكي معنا عن امومتها في السنتين الاخيرة- أمومة بتحضر بالصوت، بالدعاء، وبالذاكرة- بتشاركنا كيف غياب الأولاد بيحضر بكل التفاصيل الصغيرة وكيف بتحافظ على صلتها فيهم رغم المسافة. 

بالحديث مع حنان، منشوف كيف الحياة بتكمل مع الألم، وكيف في أم وامرأة بعدها كل يوم عم تبني أمل ومعنى جديد.

من المهم التنويه انه بودكاست "أهلShift" وراديو الناس منصات لعرض القصص الشخصية كما يرويها أصحابها. احنا مش طرف في هاي القصة ولا نتبنى أي موقف لا قضائي ولا قانوني. هدفنا هو توفير مساحة آمنة للأهل يشاركوا تجاربهم  وتحدياتهم من منظورهم الخاص.

وهدف حنان واضح توصل رسالة لأولادها إنها ما تخلت عنهم ولا للحظة، ولسا بتسعى وما وقفت تدور عليهم

تابعونا على Instagram و TikTok للمزيد من المحتوى - @shiftahel

*كل ما ورد في الحوار على مسؤولية ضيفة الحلقة.

كيف تغير شكل العائلة العربية؟ وكيف أثر هذا التغيير على علاقتنا بكبارنا ؟

في هاي الحلقة الخامسة من سلسلة "الحصانة المجتمعية"، بلتقي مع بروفيسور ربيع خلايلة، باحث بعلم الشيخوخة وواحد من أكثر الباحثين تأثيرًا بالعالم بمجاله.

أنا، بيسان أبو عبيد، وفي هذا الحوار الضروري، راح نحلل تأثير "الحداثة" على مجتمعنا، وكيف انتقلنا من العائلة الممتدة اللي كان فيها لكبير السن مكانة وسلطة، لواقع جديد مليان تحديات. راح نحكي عن واقع العلاقة بين الأجيال اليوم، اللي بتتحرك على طيف واسع: من الضغط اللي بعيشوه الأولاد اللي بيهتموا بأهلهم، وصولًا للجانب المظلم والمؤلم اللي بيشمل الإهمال، الاستغلال، وحتى التنكيل اللي بتعرضله، حسب الأبحاث، ٢٠٪ من كبارنا.

بهاي الحلقة راح تكتشفوا:

• مكانة كبير السن بين الماضي واليوم: كيف تغير دوره من "مسيطر على قرارات العائلة" لواقع مختلف تمامًا.

• إحصائية صادمة: ليش نسبة العرب ببيوت المسنين هي 0.5% فقط، وشو بتخبرنا هاي النسبة عن قيمنا والعبء على العائلات.

• "الجيل اللي بالنص": تحليل للضغط اللي بعيشه الأهل المسؤولين عن أولادهم وعن أهلهم الكبار بنفس الوقت.

• "الشيخوخة المتلى": ايش يعني شيخوخة ناجحة بعالم اليوم، وكيف منقدر نخطط لمستقبل في كرامة وقوة لكبارنا؟

• نصائح عملية: خطوات بسيطة لندعم أهلنا الكبار نفسيًا، ماديًا، واجتماعيًا، بطريقة تحفظ كرامتهم.

هاي الحلقة هي دعوة لنفتح حوار صريح ومحترم جوات بيوتنا عن موضوع مصيري بلامس كل واحد فينا.

عن السليلة:بودكاست Shiftأهل بالتعاون مع جمعية جوار بقدم سلسلة خاصة عن "الحصانة المجتمعية"، بتجمع بين الخبراء اللي بيعطونا الأدوات، والقصص الحقيقية اللي بتذكرنا انه احنا مش لوحدنا.

تابعونا على Instagram و TikTok للمزيد من المحتوى – @shiftahel

كيف منبني حصانتنا كأفراد وكعائلات؟ هل هي بس أدوات منتعلمها من الخبراء، أو هي اشي موجود أصلًا بقصصنا وذاكرتنا؟

في هاي الحلقة الخاصة جدًا من بودكاست أهلShift، سجلنا لأول مرة حوار من قلب بيت، بستضيف ميسر أبو شحاته سري، راوية قصص من خلال المطبخ، لنكتشف معها "الحصانة اللي منورثها".

أنا، بيسان أبو عبيد، وفي هذا الحوار الدافي، راح نسمع قصة ميسر المميزة- قصة صمودها الشخصي، انتقالها من حلم الأزياء للمطبخ، وكيف بنت تعريفها الخاص للعائلة والأمومة اللي ما بتعرف حدود. راح نحكي عن كيف طقوسنا اليومية ووصفاتنا هي اللي بتحمي إرثنا الثقافي من النسيان.

بهاي الحلقة رح تكتشفوا:

• "اللي مالوش قديم مالوش جديد": كيف بتكون ذاكرتنا العائلية هي مصدر قوتنا الأول.

• الأمومة الممتدة: قصة مؤثرة عن الأمومة كفعل عطاء وحب، مش بالضرورة فعل إنجاب.

• الكتاب كإرث: قصة كتابها "أكلات وحكايات"، ودور أبوها في تحقيق هذا الحلم.

• كلمة "لأ" الممحية: حوار صريح عن القيود الاجتماعية وكيف منلاقي صوتنا رغم التحديات.

هاي الحلقة هي احتفاء بالقصص اللي بتشكلنا، وبالقوة اللي منلاقيها بأماكن ما منتوقعها.

عن السلسلة:بودكاست Shiftأهل بالتعاون مع جمعية جوار بقدم سلسلة خاصة عن "الحصانة المجتمعية"، بتجمع بين الخبراء اللي بعطونا الأدوات، والقصص الحقيقية اللي بتذكرنا انه احنا مش لوحدنا.

تابعونا على Instagram و TikTok للمزيد من المحتوى – @shiftahel

أولادنا بقضوا معظم ساعات يومهم بالمدرسة,  وعلاقتنا كأهل مع مؤسسة التربية والتعليم علاقة محورية ومصيرية لمستقبلهم. بس كيف منضمن انه هاي العلاقة تكون شراكة حقيقية وداعمة، مش بس تواصل ولقاء بوقت المشاكل أو توزيع الشهادات؟

في هاي الحلقة الثالثة من سلسلة "الحصانة المجتمعية"، بلتقي مع د. شيرين ناطور حافي، مديرة قسم التربية والتعليم في المجتمع العربي، لنفتح حوار صريح عن هاي الشراكة المهمة.

أنا، بيسان أبو عبيد، مقدمة البرنامج, وفي هذا الحوار، راح نسمع سوا من شيرين مش بس كمسؤولة، انما كمان كمديرة مدرسة سابقة، كأم، وكجدة. 

راح تشاركنا "باعتراف" عن رحلتها الشخصية لفهم دور الأهل، وراح نحكي عن كيف "القيود اللي بتنزرع بمحبة" هي أساس التربية، وكيف المدرسة ما لازم تكون "جزيرة" معزولة عن واقعنا.

بهاي الحلقة رح تكتشفوا:

• "فش تعليم بدون تربية": ليش الفصل بين المفهومين هو أصل المشكلة، وكيف نرجع ندمجهم.

• اعتراف مديرة مدرسة: كيف تغيرت نظرة شيرين لدور الأهل مع السنين، وليش بتعتبرهم اليوم "عامل أساسي.

• تحدي الأهل اليوم: كيف نتعامل مع حقيقة أن "أولادنا في البيت، لكنهم مش معنا" بسبب وجود الشاشات.

• كيف شكل الحصانة على أرض الواقع؟ مثال عملي لكيف لازم المدرسة تعامل الطلاب خلال الأزمات.

• مفتاح الشراكة: كيف ممكن "التوجه المحترم" من الأهل يفتح الأبواب ويبني جسور الثقة مع الطاقم التعليمي.

هاي الحلقة بتقدم رؤية وأدوات عملية لكل أهل حابين يفهموا هاي العلاقة بشكل أعمق، ولكل مربي بآمن بقوة الشراكة مع العائلات.

عن السلسلة:بودكاست Shiftأهل بالتعاون مع جمعية جوار بقدم سلسلة خاصة عن "الحصانة المجتمعية"، بتجمع بين الخبراء اللي بيعطونا الأدوات، والقصص الحقيقية اللي بتذكرنا انه احنا مش لوحدنا.

تابعونا على Instagram و TikTok للمزيد من المحتوى – @shiftahel

كيف ممكن نبني حصانة نفسية لأولادنا، إذا كنا إحنا نفسنا كأهل بنحس بالإرهاق والضغط؟

في هاي الحلقة الثانية من سلسلة "الحصانة المجتمعية"، بلتقي مع المعالج النفسي د. عامر جرايسي لنفكك هذا السؤال الصعب ونقدم إجابات عملية.

أنا، بيسان أبو عبيد، وفي هذا الحوار العميق، رح نكتشف مع د. عامر أنه الحصانة مش درع منلبسه لأولادنا، انما هي نظام بيئي متكامل بيبدأ من عنا احنا. رحلتنا بتبدأ من "الأنا"- من وعينا الذاتي وفهمنا لقصصنا. من هناك، مننتقل للأساس الثاني: العلاقة الزوجية وكيف بتخلق جو الأمان بالبيت. وبعدها، راح نتعمق بأدوات عملية لعلاقتنا مع أولادنا: كيف نكون "مساحة آمنة" لمخاوفهم وقلقهم، وكيف "نصلح" العلاقة معهم لما نغلط. وأخيرًا، راح نربط كل الأبعاد بواقعنا المعقد وهويتنا كمجتمع صامد.

بهاي الحلقة رح تكتشفوا:

• نقطة البداية الحقيقية: ليش وعينا الذاتي هو أهم استثمار في صحة عائلتنا النفسية.

• أدوات عملية: كيف تتعامل مع قلق وخوف أولادك بطريقة تبني ثقتهم بأنفسهم.

• العلاقة الزوجية: ليش هي أقوى أداة لتربية أطفال آمنين، وكيف نحافظ عليها؟

• ما بعد الخطأ: استراتيجية "الإصلاح" الفعّالة بعد ما تفقد أعصابك أو تصرخ على طفلك.

• الهوية والصمود: كيف نربي جيل واعي لهويته وقادر على مواجهة تحديات الواقع.

هاي الحلقة هي دليل عملي لكل أب وأم ببحثوا عن إجابات حقيقية لبناء بيت وعائلة قوية من الداخل إلى الخارج.

عن السلسلة:بودكاست Shiftأهل بالتعاون مع جمعية جوار بقدم سلسلة خاصة عن "الحصانة المجتمعية"، بتجمع بين الخبراء اللي بيعطونا الأدوات، والقصص الحقيقية اللي بتذكرنا انه احنا مش لوحدنا.

تابعونا على Instagram و TikTok للمزيد من المحتوى – @shiftahel

مرحبا واهلا وسهلا فيكو بسلسلة حلقات خاصة من بودكاست Shiftأهل، بالتعاون مع جمعية جوار، عن "الحصانة المجتمعية".

كلمة "حصانة" منسمعها كثير... بس ايش معناها بحياتنا اليومية كأهل وأفراد؟ 

بهاي السلسلة، راح نأخذ هذا  المفهوم الكبير ونفككه لقصص وأدوات عملية، لنسمع، نفكر، ونفتح حوار جديد جوات بيوتنا.

في هاي الحلقة الأولى، راح نبدأ من الأساس ونسأل: من ايش مركب المجتمع؟ هل هو قصة بنحكيها، ولا علاقات منبنيها؟ ووين مكاننا كأهل بهاي الصورة الكبيرة؟

أنا، بيسان أبو عبيد، بستضيف شخصين من الفريق المؤسس لجمعية "جوار" لنجمع بين عالمين: عالم القصة والخيال مع الكاتب إياد برغوثي، وعالم الاستراتيجية والفعل مع المبادر المجتمعي أحمد مهنا.مع بعض، راح نفهم العناصر اللي بتقوّينا كأفراد، أهل، وعائلات.

في هاي الحلقة منناقش:

• الفرق بين المجتمع "العضوي" اللي منولد فيه والمجتمع "المنظّم" اللي منختاره.

• "مركّبات الحصانة" الأربعة (The 4Cs) اللي ممكن نبنيها في حياتنا اليومية؟

• "الحصانة لا تُبنى في الطوارئ"- وكيف منستعد للأزمات في الأيام العادية.

• دور الخيال، اللغة، والقصص اللي منرويها في بناء شعور الانتماء عند أطفالنا.

• كيف بتهدد الفردانية مجتمعاتنا، وكيف ممكن "إعادة إحياء الروابط الاجتماعية".

عن السلسلة:بودكاست Shiftأهل بالتعاون مع جمعية جوار بقدم سلسلة خاصة عن "الحصانة المجتمعية"، بتجمع بين الخبراء اللي يعطونا الأدوات، والقصص الحقيقية اللي بتذكرنا انه احنا مش لوحدنا.

تابعونا على Instagram و TikTok للمزيد من المحتوى – @shiftahel

في هاي الحلقة، بنستضيف الأب سابا حاج، كاهن كنيسة القديس جوارجيوس للروم الأرثوذكس في عبلين، وعضو المحكمة الكنسية في عكا، اللي بيشاركنا مسيرته الشخصية من عالم المحاماة للكنيسة.

مع الأب سابا، منحكي عن مفهوم الزواج في المسيحية كـ"سِر مقدس" و"عهد" – مش مجرد عقد. بنحكي عن القيم الأساسية اللي بتقوم عليها الحياة الزوجية: المحبة، التضحية، وكيف بيصيروا الزوجين "جسد واحد" بحلول الروح القدس, بشرحلنا كمان عن للدورة التحضيرية الإلزامية للمقبلين على الزواج، وبنتعرف على جوانبها العملية والروحانية اللي بتساعد الأزواج يواجهوا تحديات الحياة.

الحلقة مش بس تعريف بطقوس، هي دعوة للرجوع للأساس، والتفكير بمعنى الارتباط الحقيقي اللي بتجاوز المظاهر والقشور. الأب سابا بيقدملنا رؤية روحانية وعملية ونصائح لكل زوجين، بغض النظر عن دينهم، عن أهمية بناء علاقة بتقوم على الاحترام والتفاهم.

اسمعوا الحلقة لتكتشفوا رؤية عميقة للزواج، ولقيم مشتركة بتجمعنا كلنا.

في هاي الحلقة من Shift أهل، بحكي مع مادلين نصراوي, مرافقة لإدارة الصراعات، أم لشمس، وزوجة لهادي. مادلين بتشاركنا رحلتها من مهارة كانت موجودة معها طول عمرها، لتتحول لمسار مهني بعد ما صارت أم.

الحوار بياخدنا من طفولتها كبنت لأهل منفصلين، للمحطات الأولى اللي خلتها تتواجد بشكل طبيعي وسط الصراعات وتحاول تساعد. بنمشي معها من شغلها مع فتيات في ضائقة، لدراستها الأكاديمية في الجندر والوساطة، ولحظة إدراكها إن الأمومة كانت الشرارة اللي دفعتها تأخذ هاي المهارة وتحولها لمهنة.

بنحكي عن معنى "مرافقة إدارة الصراعات"، وعن أنواع الصراعات اللي بتشوفها- الزوجية، الداخلية، وحتى الصراعات اللي بنحملها من بيتنا الأول بدون ما ننتبه. بنفهم معها كمان انه في صراعات ما بتنحل، واحيانًا الحل هو الانفصال.

من خلال أرقام و إحصائيات مقلقة عن نسب الطلاق في المجتمع العربي، بنفتح النقاش عن كيف عم تتغيّر العلاقات، وعن تأثير الفردانية، والحروب، والكورونا على شكل الأسرة والعلاقة بين الشريكين.

لكن الحلقة مش بس عن الصراعات. هي كمان عن الإصغاء، عن الصراحة، وعن الأدوات اللي ممكن نطوّرها لندير خلافاتنا بطريقة أهدأ وأكثر وعي – مع شركائنا، مع أولادنا، وحتى مع حالنا.

هاي حلقة بتفتح مساحة للتفكير في كيف منعيش علاقاتنا، وكيف منختار نواجه أو نتجنب، وكيف كل هذا بينعكس على بيوتنا وأولادنا.

تابعونا على Instagram و TikTok للمزيد من المحتوى – @shiftahel

في هاي الحلقة من "Shift أهل"، بحكي مع شيرين أبو دبي، أم لهادي وجوليا، طفلين مع تشخيص اضطراب التوحد. لأول مرة، وبكل صراحة، بتحكي شيرين قصتها كاملة.

الحوار بياخدنا من الحلم اللي كان إنها تكون "أحلى أم بالعالم"، للحظة اللي حست فيها إنه "في إشي مختلف" مع ابنها هادي. بنمرق معها على رحلة التشخيص الطويلة، وصدمة التشخيص الثاني والمفاجئ لبنتها جوليا "بدرجة أعلى".

شيرين بتفتح قلبها عن التعب اليومي اللي ما حدا بشوفه، وعن شعور الوحدة والغضب اللي رافقها، وسؤال "ليه أنا لحالي؟" اللي ضل يتردد. بنسمع عن المواقف اللي أثرت فيها، وكيف ممكن "أصغر كلمة" من حدا يكون إلها وقع كبير.

بنفس الوقت، بتوضح بكل قوة الفرق بين إنها تكون تعبانة من الصعوبات والضغط، وبين حبها الكبير لأولادها اللي بتشوفهم "مش أحلى عن هيك". 

هاي الحلقة هي صوت لكل أم حست إنه صوتها مش مسموع، وهي دعوة لكل شخص حوالينا، إنه يفهم إنه كلمة حلوة وفعل بسيط ممكن يغيروا كثير، وإنه الدعم الحقيقي أهم من أي شي ثاني.

إذا كنتوا أهل بعيشوا نفس التجربة، أو مختصين، أو ببساطة حابين تفهموا أكثر وتكونوا سند حقيقي، هاي الحلقة إلكم.

تابعونا على Instagram و TikTok للمزيد من المحتوى - @shiftahel

في هاي الحلقة من "Shiftأهل"، وبالتزامن مع موسم الأعراس، منستضيف بحوار صريح رانيا دحلة وبنتها العروس الجديدة، رنين قاش. منتحدث عن مرحلة من أهم مراحل الحياة: انتقال البنت من بيت أهلها وبداية حياة جديدة مع شريكها، وكيف تطورت علاقتهن كأم وبنتها وقرّبتهم من بعض اكثر في هاي المرحلة.

بنسمع من رنين بكل شفافية عن المخاوف الحقيقية اللي بتعيشها اتجاه الزواج والتغيير الكبير الي بيجي معه، من الخوف من الروتين، للمسؤولية، لأنه يصير معها "اكتئاب ما بعد الزواج".وبالمقابل، بتشاركنا الأم رانيا رؤيتها العميقة والمؤثرة "أولادي ضيوف عندي"، وهي فلسفة ساعدتها تهيئ نفسها لـ"سنة الحياة" ولحظة فراق أولادها. خلال الحلقة منكتشف كمان انه اليوم، رانيا بتعيش التجربة من جديد ولكن  كـ"أم عريس".

حديثنا بياخدنا كمان لكواليس تحضيرات العرس، الضغط النفسي الكبير اللي عاشته العائلة، والنصيحة اللي بتقدمها رانيا اليوم من القلب لكل أم عروس وأم عريس. بنتطرق كمان للدور الهادي والمؤثر للأب، وحنانه اللي بيظهر بطرق مختلفة بهاي المرحلة من حياة بنته.

 هاي حلقة هي مرآة لكل عائلة عربية، فيها دموع، حكمة، حب، وحوار صادق عن ترك بيت الأهل، بناء بيت جديد، وكيف بنضل مرتبطين بجذورنا مهما ابعدنا.

تابعونا على Instagram و TikTok للمزيد من المحتوى - @shiftahel

في هاي الحلقة من Shift أهل، بنستضيف سامية سليمان، مديرة المجتمع العربي في جمعية مطاف للعائلات الحاضنة، لنحكي عن موضوع حساس ومهم- العائلات الحاضنة في مجتمعنا العربي.

سامية، عندها 24 سنة خبرة بالمجال، بتحكيلنا عن العائلات الحاضنة - عائلات بتفتح بيوتها لأطفال محتاجين حماية مؤقتة لحد ما ظروف أهلهم تتحسن-  بتوضحلنا الفرق بين الاحتضان والتبني ,ايش بيتطلب من العائلة حاضنة, منتعمق بالجانب النفسي اللي بيعيشوا الأطفال - "الانتماء المزدوج" لعالمين مختلفين. بنسمع عن الأسئلة الصعبة اللي بيسألوها: "ليش أنا موجود بالعائلة الحاضنة؟ شو أنا عملت؟" - وشعور الذنب اللي بيحملوه رغم إنه مش ذنبهم.

سامية بتشاركنا في السيرورة كاملة - من كيف بوصل الطفل للعائلة الحاضنة، لكيف بيتحضر للرجوع عند أهله. بنفهم دور عائلات الطوارئ، والتحديات اللي بتواجه العائلات الحاضنة وأولادهم، وكيف الأطفال بيتعلموا يعيشوا مع عالمين مختلفين بسلام.

الواقع المؤسف انه اليوم في 30 طفل عربي بستنوا عائلات حاضنة، ومع انه في 1,100 طفل عربي موجودين بعائلات حاضنة، لسا في حاجة أكتر لعائلات جاهزة تستقبل أطفال محتاجين حماية.

حلقة مهمة لكل واحد حابب يفهم كيف مجتمعنا ممكن يكون شبكة أمان لأطفاله، وكيف العائلات الحاضنة بتعمل هي مشروع إنساني عظيم. 

للاستفسار عن الاحتضان: وزارة الرفاه الاجتماعي - رقم 118، أو جمعية مطاف للعائلات الحاضنة.

تابعونا على Instagram و TikTok للمزيد من المحتوى - @shiftahel

في الحلقة الثالثة والأخيرة من سلسلة حواراتنا مع د. شهاب إدريس، محاضر وباحث في العلوم الاجتماعية، منكمل التعمق في بحثه بعنوان: "الوالدية في المجتمع الفلسطيني في العصر النيوليبرالي: نظرة إثنوغرافية على الأسر الفلسطينية".

بعد ما حكينا في الحلقة الأولى عن أزمة الوالدية متعددة الأبعاد، وفي الحلقة الثانية عن الأبوة والرجولة، بنوصل بهاي الحلقة لقضية بتلامس حياتنا اليومية بشكل مباشر: ثقافة الاستهلاك وتأثيرها على علاقتنا مع أولادنا.

د. شهاب بوضحلنا كيف انه ثقافة الاستهلاك بتاخد أبعاد خاصة في مجتمعنا الفلسطيني بسبب عدم الاستثمار الحكومي في النمو الاقتصادي للمجتمع العربي. بنحكي عن التحول في مفهوم التربية - من مسؤولية مجتمعية لمشروع فرداني استهلاكي، وكيف صار الاستهلاك جزء أساسي من التعبير عن الأبوة والأمومة.

بنتعمق في مفهوم "الحب الملموس" - كيف صار الحب يُعبر عنه من خلال الأشياء المادية بدال من الحضور العاطفي. منناقش كيف الاستهلاك بيحاول يعوض عن الوقت الغايب، وكيف صار الأطفال "مشروع طبقي".

حوار عميق بيكشف كيف السوق عم يتسلل على كل لحظة في حياتنا العائلية، وكيف ثقافة الاستهلاك بتعيد تشكيل علاقتنا مع أولادنا بطرق ما كنا نتوقعها.

اسمعوا الحلقة لتفهموا الجذور العميقة لهاي الظاهرة وتأثيرها على النسيج العائلي في مجتمعنا.

في هاي الحلقة من Shiftأهل، بنستضيف غزالة زيدان وتامر عواد، زوج وأهل لشادي اللي عمره ٧ شهور وأصحاب شركة بوستن جروب. غزالة، معلمة لغة إنجليزية، وتامر، كاتب وصانع محتوى، بشاركونا بقصتهم من التعارف في مقابلة عمل لحد ما صاروا عائلة صغيرة عندها حضور بضحك على السوشال ميديا.

رحلتهم بتبدأ بمقابلة عمل تحولت لقصة حب سريعة خلال الكورونا، وزواج اتخذ قراره بسرعة لأنه الإثنين جايين من علاقات سابقة "مطبشين" وفهموا إنه هاي هي العلاقة الصح.

 بس الحكاية الحقيقية بتبدأ بشهر عسل كان المفروض يكون حلم رومانسي، بس تحول لمغامرة كوميدية لما اكتشفت غزالة إنها محضرة حالها لمناشف على شكل بطه… وطلع تامر حاجز تختين في سكن طلابي (هاهاهاها!)

ومن هناك منتقل لرحلة الأبوة والأمومة الحقيقية، وكيف اكتشفوا انه الكتب والنصائح اشي والواقع اشي ثاني كلياً. وبالنهاية منشوف كيف قرروا يشاركوا هاي الرحلة مع العالم، مش عشان يفرجوا حياة مثالية، بس عشان يقولوا للناس إنه الحياة حلوة كيف ما هي. 

حلقة بتخليكو تضحكوا وتفكروا- غزالة وهي بتحكي بصراحة إنها احتاجت 6 شهور عشان تحس إنها أم فعلاً، تامر وهو بيكشف التحديات اللي بواجهوها الرجال بعد الولادة، وقصص كوميدية عن أخطاء الأهل الجدد اللي بتخليكو تحسوا إنكو مش لحالكو.

حلقة مهمة للأزواج الجداد، الأهل، وكل حدا بحب القصص الحقيقية اللي بتكسر الصور المثالية وبتفرجي الحياة زي ما هي - بكل بساطتها وصعوباتها وجمالها.

شاركونا آراءكم وتجاربكم! تابعونا على Instagram و TikTok للمزيد من المحتوى والمقاطع المميزة- @shiftahel

Shiftأهل - بودكاست عن التجارب الحقيقية للأهل في عالمنا العربي تقديم بيسان أبو عبيد, متوفر على منصات البودكاست

خليل حميدي، نائب المدير العام في جمعية علم - جمعية للعناية بالشباب والشبيبة بضائقة.

مع خليل راح نحكي عن التحديات اللي بتواجه الشباب بعمر 16-24، هاي الفئة العمرية اللي مش أولاد بس كمان مش رجال - مرحلة انتقالية حساسة بتتطلب فهم عميق من الأهل والمجتمع.

من خلال خبرته المهنية الواسعة، خليل بيوضحلنا كيف هاي المرحلة هي مرحلة فيها بلورة الهوية- الشاب بده يبحث ويستكشف ويفحص حدود نفسه عشان يعرف مين هو وإيش بده من الحياة. بيشرحلنا ليش الشباب بهاي العمر بيحتاجوا مساحة للتجارب والاستكشاف، وكيف التوقعات المجتمعية منهم إنهم يكونوا "رجال" بتخلق صدام مع احتياجاتهم الطبيعية.

الحديث بيتطرق كمان للتشويشات الخطيرة اللي بتواجه شبابنا - من الفقر والضغوط الاقتصادية لتحديات الهوية كفلسطينيين عايشين بواقع مركب، ومن عدم وجود أطر مناسبة بعد المدرسة, حتى للانجذاب المؤسف لعالم الإجرام كحل سريع وخطير لاحتياجاتهم المادية والنفسية.

خليل بحكي بصراحة عن كيف المجتمع والبيئة المحيطة بتساهم أحياناً في دفع الشباب نحو خيارات خاطئة، وكيف غياب الدعم النفسي والمرافقة المهنية بتخلي الشباب يواجهوا هاي التحديات لحالهم.

الحلقة كمان بتقدم حلول عملية وأمل حقيقي- خليل بأكدلنا على أهمية المرافقة المهنية، بناء أطر انتقالية مناسبة لهاي الفئة، ودور الأهل الحقيقي في فهم ودعم أولادهم بهاي المرحلة الحساسة. بيشارك قصص نجاح ملهمة لشباب قدروا يغيروا مسارهم ويبنوا حياة أفضل بالدعم والمرافقة المناسبة.

هاي الحلقة مش بس للأهل، هي ضرورية لكل واحد منا مهتم بفهم الشباب وبناء مجتمع داعم.

بهاي الحلقة من Shiftأهل، معي أثير هدره  وابنه حبيب من قلنسوة  وبشاركونا تجربتهم المميزة في عالم الغوص

أثير بغوص من زمان، وقرر ينقل شغفه لابنه- "الغوص مش بس هواية، هي طريقة لبناء الثقة بالنفس" - هيك بلخص أثير طريقته في التربية. 

بنتعرف على حبيب، طالب صف رابع، وأصغر غواص مرخّص بعمره. بحكيلنا بلغته البريئة عن أول غطسة، عن الخوف، عن الحماس، عن المرجان والأسماك، وعن المدرب زيزو اللي ساعده  ورافقه بهاي التجربة.

ومنسمع كمان من أثير عن تردد الأم، عن قلق الأهل الطبيعي، وعن قراره يعطي حبيب هاي الفرصة عشان يتعلّم يستقل ويواجه التحديات في المستقبل. 

الحلقة عن علاقة مميزة بين أب وابنه، فيها محبة, دعم وثقة كبيرة. ومنشوف كيف أثرت تجربة الغوص على شخصية حبيب، حتى بالمدرسة وبين أصحابه، وكيف صار يلهم أطفال بعمره.

وبتفتح قدامنا سؤال مهم: كيف منوازن بين خوفنا على اولادنا، ورغبتنا نوسّع آفاقهم ونشجّعهم يخوضوا تجارب بتغيّرهم؟

هاي الحلقة مش بس عن الغوص، كمان عن كيف ممكن الأهل يفتحوا مجال لأولادهم يعيشوا تجارب جديدة ,  تبني شخصيتهم وتعطيهم مهارات للحياة.

سماهر شنبور زعطوط، مفتشة الاستشارة التربوية في المدارس وأم لثلاثة أبناء، بتشارك معنا خبرتها الي بتتجاوز 25 سن في سلك التربية والتعليم ومنحكي معها عن موضوع بشغل بال كل أهل: تأثير مشهد العنف والجريمة على أطفالنا.

"أطفالنا مش بس بعرفوا عن مشهد العنف، هن سامعين شايفين وعايشين" - بهاي الكلمات بتلخص سماهر واقع أطفالنا اليوم، وبتحكي عن كيف بيتفاعلوا مع مشاهد العنف بمختلف الأعمار.

منتعرف في الحلقة على التأثيرات النفسية والسلوكية للعنف على الأطفال، من عمر الروضة للمراهق. وبتشاركنا سماهر من تجربتها المهنية في المدارس كيف بنقدر نرصد علامات تأثر الأطفال بالعنف، وإيش لازم نعمل كأهل ومربيين.

بتشاركنا سماهر بخطط العمل الي بتتبعها المؤسسات التربوية وبتحكيلنا عن مفهوم "الساعة الذهبية" للتدخل لما بتعرض الطفال لمشاهد عنيفة، وكيف نتعامل مع "دوائر الإصابة" المختلفة حسب قرب الطفل من الحدث.

سماهر بتشدد على انه احنا "مرآة لأولادنا"، وبتحذر من خطورة تبلد المشاعر عند الأطفال.  بس كمان بتقدملنا أدوات عملية لبناء حصانة نفسية عند أطفالنا، وبتأكد على أهمية فتح مساحات آمنة للحوار معهم. وبتختم الحوار بمفهوم "الهامش الأصفر" اللي ممكن يرشدنا بأوقات الأزمات.

هاي الحلقة بتأكد انه مسؤوليتنا المشتركة - كأهل ومدرسة وكمجتمع - نبني شبكة دعم متكاملة لحماية أطفالنا. 

الحلقة مش بس للأهل، هي لكل مهتم ببناء مجتمع آمن لأطفالنا وأجيالنا القادمة.

في هاي الحلقة المميزة, بستضيف سهى سلمان وعوني موسى، زوج وأهل لنعيم وراني, جمعهم الحب والارتباط رغم اختلاف خلفياتهم الدينية.  

بتبلش القصة في الجامعة العبرية بالقدس سنة 1994، كانت سهى بسنتها الأولى وعوني بسنته الثانية، وكان نشيط بلجنة الطلاب العرب واستقطب سهى للانضمام للحراك الطلابي. سهى المسيحية وعوني المسلم لاقوا ببعض اشي مميز أكبر من الاختلاف الديني - احترام وعدم حكم وتفاهم.

الحلقة بتحكي عن التحديات الكبيرة اللي واجهوها، خاصة من ناحية الأهل والمجتمع، وكيف استمروا بالرغم من الصعوبات والانقطاع مع الأهل لفترة… و لحد ما صار في تحسن بالعلاقة ورجعت ولا كأنه كان في انقطاع. سهى بتحكي من قلبها عن شعورها بالوحدة لما كانت مش قريبة من أهلها، وكيف كان عوني واقف معها بهاي الفترة الصعبة.

بحدثونا الزوج عن تكوين عائلتهم المشتركة وتربية اولادهم (نعيم، 24 عام، وراني، 14 عام) على قيم بتتجاوز الحدود الدينية، وبتركز على الاحترام، وتقبل الآخر.

في الحلقة كمان منحكي عن تنقل العائلة بين مدن مختلفة - القدس، حيفا، نيويورك، والناصرة - وكيف أثرت هاي التجارب المتنوعة على نظرتهم للعالم وتكوين هويتهم. ومنوصل لوضعهم الحالي اليوم الي  في عوني بشتغل في بوستن مع شركة موديرنا كخبير في مجال الذكاء الاصطناعي ونظم المعلوماتية، وسهى مركز مساواة وبتعيش مع راني ابنهم الاصغر في الناصرة.

بين ثنايا الحديث، منكتشف استراتيجيات التواصل الي ساعدت الزوج على تخطي الخلافات واستيعاب غضب العائلة والمجتمع، ورسالتهم الأساسية كانت رسالة تدعو لمجتمع أكثر انفتاح وتقبل للاختلاف.

حوار عميق وصادق بفتح نافذة على تجربة إنسانية غنية، وبدعونا للتفكير كيف ممكن نبني علاقات متينة بتتجاوز الحواجز المجتمعية والدينية، وبتأسس لمفهوم جديد للعائلة , بقوم على الحب والاحترام المتبادل.

في هاي الحلقة من أهلShift ، بنستضيف فاطمة أبو عصبة ٠ أم لمرسيل وزوجة قصي – لتحكيلنا قصتها الشخصية وتجربتها مع علاجات الخصوبة  (IVF)  بكل شجاعة وصدق. فاطمة بتفتح قلبها وبتشاركنا تفاصيل رحلتها الطويلة والعاطفية مع علاجات ال IVF، من سبع محاولات علاجية حتى لحظة حملها بمرسيل.

منحكي مع فاطمة عن تجربة الدخول لحمل من منظور مختلف: كيف أثرت العلاجات على حياتها اليومية، على شغلها، على نفسيتها، على علاقاتها الاجتماعية وعلى أبسط تفاصيل روتينها.

بتحكيلنا عن التحضير النفسي والجسدي لكل محاولة، وعن خطة الأدوية المكثفة، المواعيد الصارمة، وكثافة العلاج كلها. فاطمة شاركتنا بكيف كان الاطلاع المسبق على التفاصيل والمراحل جزء من آلية التكيف اللي طورتها -  كل ما عرفت أكثر، كل ما حسّت إنها مسيطرة أكثر. 

شجاعة فاطمة بمشاركة هاي التجربة مش بس شهادة شخصية، إنما رسالة أوسع لكل أم، ولكل زوج بفكروا بالإنجاب، وحتى للمجتمع ككل. من خلال حوارنا، منكتشف كيف تجربة الإخصاب خارج الرحم مش مجرد تجربة طبية - هي تجربة إنسانية فيها تحدي، عزيمة، وحساسية عالية للذات وللآخرين.

فاطمة بتكسر صمت حوالين مواضيع الحمل والصحة الإنجابية في مجتمعنا، وبتفتح باب مهم لحوار صادق حوالين إشي غالباً منخفف من الحساسية بالتوجه لاله والحكي عنه ، ومنطرح أسئله على غيرنا بدون إدراك لتأثيرها عليهم وعلى مشاعرهم. من خلال حديثها، منعيد التفكير بمفهوم الأمومة، الشراكة، والصبر. 

حلقة عميقة، صادقة، ومليانة مشاعر، بتدعونا نسمع، نتفهم، ونتعامل مع قضايا الصحة الإنجابية بحساسية أعمق وإنسانية أكبر.

في هاي الحلقة من Shift أهل، راح نسمع صوت بنت عمرها 11 سنة - أنجلينا خوري.بتحكي بثقة، بفضول، وبتلقائية عن عالمها: التيك توك، الصاحبات، الشهرة، المدرسة، واللعب.وأنا أسمع الحلقة بعد ما تسجلت، حسّيت في جانب ناقص إذا بنسمعها لحالها. قررت أرجع لبعض المقاطع، وأدعو أمها اللي بتمشي معها بهاي المراحل وبتواجه نفس الأسئلة، تسمعهم معي ونحكي عليهم سوا. الأم هي نادرة هندو خوري - أم أنجلينا وشربل، زوجة غسان خوري، ومهندسة معمارية.طلبت منها نسمع سوا بعض المقاطع من مقابلة أنجلينا، ونوقف عند كل مقطع شوي.مش من باب المحاسبة أو التصحيح بس من باب المشاركة، ومن باب الأم اللي بتحاول تفهم وتواكب، زيّنا كلنا.هاي الحلقة مميزة لأنها مش حوار مباشر بين أم وبنت، كأنها مرايتين، كل وحدة بتحكي من عالمها وبصوتها. منسمع البنت أول، وبعدها الأم، وكل واحدة بتفتح نافذة صغيرة على واقعها، بدون ما يسمعوا بعض فعليًا، بس إحنا كمستمعين... منسمع الطرفين، ومنشوف الصورة كاملة شوي شوي. إحنا كأهل عم نربّي أولادنا بعصر إحنا نفسنا ما عشناه، ومش متمكنين منه تمامًا. كيف نتعامل مع الشاشات؟ مع الأحلام بالشهرة؟ مع الاستقلالية والمراهقة اللي بتيجي بدري؟مش راح نعطي أجوبة، بس راح نفتح باب للحوار والتفكير. أنجلينا رح تحكي، نادرة رح تحكي، وأنا وإنتو... رح نسمع ونفكر سوا.

في الحلقة الثانية من سلسلة حواراتنا مع د. شهاب إدريس، محاضر وباحث في العلوم الاجتماعية، منكمل نتعمق في بحثه بعنوان: "الوالدية في المجتمع الفلسطيني في العصر النيوليبرالي: نظرة إثنوغرافية على الأسر الفلسطينية". 

في الحلقة السابقة حكينا عن مفهوم الوالدية بشكل عام،وبهاي الحلقة منركز بشكل خاص على أزمة الأبوة ومفاهيم الرجولة المتغيرة في السياق الفلسطيني المعاصر.

د. شهاب بحكي عن "الأزمة المضاعفة" اللي بعيشها الآباء الفلسطينيين – بين ضغط السياسات والاقتصاد من جهة، والتغييرات الكبيرة بأدوار الأهل داخل العيلة من جهة ثانية.

منحكي كيف تحولت أدوار الأب عبر الأجيال، من المفهوم التقليدي للرجل كمعيل أساسي، للتوقعات الجديدة الي بتشمل المشاركة العاطفية والتربوية. وبينما النساء بتتحمل "دور مضاعف" - العمل خارج المنزل والرعاية داخله - الرجال في حالة من التعليق والتردد.

بقدم د. شهاب مفهوم "توسيع الرجولة" كإطار للتغيير وبطرح تساؤلات محورية: ماذا لو "دخل الأب البيت"؟ كيف ممكن نحول مفاهيم "الشهامة" و"الجدعنة" لتشمل التواصل العاطفي مع الأبناء؟

حوار عميق بركز على كيف انه هاي التغييرات مش بس مجرد قضايا فردية، هي صورة كاملة لتحولات اجتماعية واقتصادية وسياسية أعمق بتشكل وبتأثر على النسيج العائلي الفلسطيني اليوم.

اسمعوا الحلقة لفهم التحديات الحقيقية من ورا أزمة الأبوة اليوم، والخطوات الممكنة لتحقيق دور أبوي متوازن بجمع بين قيمنا التقليدية واحتياجات عصرنا الحالي.

في هاي الحلقة منستضيف مي نداف قعدان, أم لإلياس، ميرنا وجوليا، ومؤسسة ومديرة مركز "خطوات مي للإيقاع الحركي". مي بتحكي عن تجربة حملها بجوليا بعد تشخيص طبي نادر وصعب. "بدك معجزة" — هيك حكى الطبيب، ومن هون بلشت رحلة مليانة قرارات، خوف، وإيمان. منحكي عن لحظات الصدمة، عن التردد، عن المسؤوليات اليومية كأم عاملة لطفلين، وعن كيف تعاملت مع كل هاي التحديات.

هاي مش بس قصة طبية -  هاي قصة صبر، عن الأمومة تحت الضغط، وعن القدرة نكمّل رغم كل إشي.

اسمعوا الحلقة لتتعرفوا على تجربة إنسانية حقيقية، وعلى كيف الصبر والإيمان ممكن يخلقوا المعجزات، وكيف الصعوبات بتكشف عن قوة جوانا ما كنا نعرف إنها موجودة أصلاً.

في الحلقة الرابعة والأخيرة من سلسلة رمضان، استضفنا الشيخ خالد صباح، المشرف الإداري في منطقة الجليل بمؤسسة الفرقان لتعليم وتحفيظ القرآن الكريم.

تحدث معنا الشيخ خالد عن تجربته الفريدة كإمام من عمر العشر سنوات، وكيف شعر من وقتها انه كانت هاي دعوة من الله. بحكيلنا كمان عن تجربته خلال شهر رمضان كطفل في عكا القديمة وكيف كان يقوم بدور المسحراتي يفيق الناس للسحور، وكمان شاركنا رؤيته للفرق بين رمضان في الماضي ورمضان اليوم.

من أجمل ما بميز اللقاء مع الشيخ هو طرحه لقيم ومعاني رمضان الحقيقية، وكيف ممكن توصل لألي  فقدوا الصبر والاحترام لهذا الشهر الفضيل. بأسلوب بسيط ومؤثر، بخاطب الشيخ خالد العقول والقلوب، بذكرنا بأنه رمضان مش مجرد امتناع عن الطعام والشراب، انما هو فرصة للتغيير الروحي والنفسي العميق وإعادة التواصل مع كتاب الله.

عبّر الشيخ خالد عن رحلته مع القرآن بقوله: "بدايتي مع القرآن وأملي أن تكون نهايتي مع القرآن"، هاي مسيرته الإيمانية - بدأت من الطفولة وراح تستمر مدى الحياة، ودعى المستمعين ليعودوا لروح رمضان الحقيقية الي بتجمع بين العبادة والتأمل والعطاء.

رمضان كريم، وكل عام وأنتم بخير.

في الحلقة الثالثة من سلسلة رمضان الخاصة، منستضيف سماهر سلامة، الممثلة والمؤثرة الفلسطينية، في حوار دافي وشامل بجمع بين مختلف الديانات والقيم الإنسانية.

لقاءنا بجمع بشهر واحد بين رمضان، صيام الأربعين، شهر المرأة، وعيد الأم صدفة بتعتبرها سماهر بركة وفرصة للتأمل والتقدير.

من خلال قصص شخصية مؤثرة وذكريات عائلية، بترويلنا سماهر كيف تعلمت من والدتها احترام وتقدير الصيام والمناسبات المختلفة، وكيف بتعمل هي اليوم على نقل هاي القيم التكاملية لأطفالها. بتشارك كمان بمواقف صادقة وعفوية بتوضح الجيرة والصداقات والمشاركات الاجتماعية خلال الشهر الفضيل.

الحلقة مليانة باللحظات المرحة والعميقة، وبتقدم رسالة قوية - "الدين لله والوطن للجميع".

مع سماهر منحكي كمان عن تحديات الأمومة والعمل، وكيف ممكن نوصل لتوازن في الحياة من خلال الدعم المتبادل والتعاون الأسري. بتشاركنا خبرتها الشخصية وكيف تمكنت من بناء حياة مهنية ناجحة مع الحفاظ على دورها كأم وزوجة من خلال شراكة حقيقية مع زوجها أبو سمرة.

هاي الحلقة هي الثالثة ضمن سلسلة رمضانية متنوعة، وبتعكس روح التسامح والتعايش اللي بتميز مجتمعنا العربي بأفضل صورة. حوار بذكرنا بأنه اللي بيجمعنا من قيم إنسانية هو الأساس وهو اللي بيبني المجتمعات المتماسكة.

رمضان كريم، وكل عام وأنتو بخير.

في ثاني حلقات سلسلة رمضان من Shiftأهل، بنستضيف عمر ووالده أحمد في حوار عفوي بياخذنا لعالم الأطفال في رمضان وكيف بيعيشوا هذا الشهر الفضيل.

بحكيلنا عمر عن تجاربه مع الصيام - من لحظات "بالغلط أكلت" ، لطريقته الخاصة بمقاومة إغراءات خلال الصيام في النهار، وحتى للمعاني العبادة والصبر اللي بيكتشفها بطريقته الخاصة.

هاي الحلقة مليانة لحظات إنسانية بسيطة وصادقة بتقدم نظرة فريدة عن كيف الأطفال بفهموا القيم الروحانية والدينية وبيترجموها لسلوكيات بطريقتهم الخاصة. 

كمان بتعطي نموذج جميل عن العلاقة المبنية على الاحترام والمحبة بين الأب وابنه، وكيف ممكن لأهل يستغلوا هذا الشهر لتعزيز القيم الإيجابية في أولادهم.

هاي الحلقة هي الثانية من سلسلة رمضانية متنوعة، هدفها استكشاف الشهر الفضيل من زوايا مختلفة. حلقة راح تخليكم تضحكوا وتفكروا وتتذكروا طفولتكم في رمضان، وممكن كمان تساعدكم تشوفوا العالم من جديد من خلال عيون أطفالكم.

رمضان كريم، وكل عام وإنتو بخير.

مع بداية شهر رمضان المبارك، نبدأ في Shiftأهل سلسلة خاصة من الحلقات تستكشف هذا الشهر الفضيل من زوايا متعددة.

في الحلقة الأولى من السلسلة، منرجع نستضيف سهاد عواودة، اخصائية علم النفس التربوي والتطوري والعلاج النفسي الديناميكي، الي سبق وشاركتنا في حلقة سابقة.

كان لا بد من انه استضيفها من جديد لتشاركنا رسائلها الخاصة عن شهر رمضان- بتجمع بين خبرتها العلمية وتجربتها الشخصية كأم لتقدم لنا نظرة عميقة عن الجانب الروحاني والنفسي لهذا الشهر الفضيل.

سهاد بتحكي معنا كيف ممكن نحوّل تحديات رمضان لفرص للنمو الشخصي والعائلي، وكيف الصيام بيأثر على مشاعرنا وسلوكنا وعلاقتنا مع أولادنا. بتشاركنا كمان كيف الأهالي بيقدروا يوازنوا بين المسؤوليات المتعددة خلال الشهر: العبادات، والشغل، والاهتمام بالأولاد، والعناية بالذات.

من خلال تجربتها المهنية، سهاد بتقدم نصائح عملية لتعزيز الصحة النفسية خلال رمضان وأهمية منح الذات "هدية" من الراحة والتأمل. كمان بتحكي عن كيف نقدر نستغل هالوقت لتقوية العلاقات الأسرية وزرع القيم الروحانية بالأولاد بطريقة صحية ومتوازنة.

هاي الحلقة هي بداية لسلسلة راح تستمر طول شهر رمضان، راح نستضيف فيها شخصيات متنوعة لنفهم أكثر الأبعاد المختلفة لهذا الشهر الكريم. 

رمضان كريم، وكل عام وإنتو بخير.

في هاي الحلقة منحكي مع هبة ميلاوي، ممرضة بتشتغل مع الأطفال ذوي الاحتياجات الخاصة وعائلاتهم من أكثر من 6 سنوات. بحوارنا، بتشاركنا هبة برحلتها المهنية والإنسانية، وكيف عرفت من صغرها إنه رسالتها في الحياة هي الشغل مع الأطفال وبتحكيلنا عن تجربتها في مراكز إعادة التأهيل وتطوير الأطفال، وكيف كل طفل علمها درس جديد في الحب والصبر والأمل. 

منحكي كمان عن واقع خدمات التأهيل في مجتمعنا العربي، وهبة بتسلط الضوء على التحديات اللي بتواجه الأهالي والأطفال. 

من خلال تجربتها الشخصية، بتوضح هبة كيف إنه العلاقة مع الأطفال ذوي الاحتياجات الخاصة هي أكثر من مجرد علاقة مهنية وبتختم برسالة قوية للمجتمع العربي عن ضرورة النظر للأطفال بعين البراءة والإخلاص والحب.

اسمعوا الحلقة لتتعرفوا على تجربة مؤثرة في عالم رعاية وتطوير الأطفال ذوي الاحتياجات الخاصة، ولتفهموا أكثر عن دور المختصين في دعم الأطفال وعائلاتهم في رحلتهم.

في هاي الحلقة منحكي مع د. شهاب إدريس،أب لطفلين، محاضر وباحث في العلوم الاجتماعية. بحثه بعنوان: "الوالدية في المجتمع الفلسطيني في عصر النيوليبرالي: نظرة إثنوغرافية على الأسر الفلسطينية"

من خلال حوارنا العميق، بكشف د. شهاب عن أزمة متعددة الأبعاد في مجتمعنا الفلسطيني وكيف صار المجتمع بحمل الأهل مسؤولية كل مشاكلنا الاجتماعية. بنتعمق معه في فهم حالة الأهل اليوم - جيل عالق بين طريقة التربية التقليدية والخطاب التربوي الحديث.

توصل د. شهاب من خلال بحثه الأنثروبولوجي إلى ظاهرتين أساسيتين في مجتمعنا: "استقالة الأهل" كنتيجة للضغوطات المجتمعية، و"ترخيص الأهل" كمحاولة لحل الأزمة. هاي النتائج بتكشف كيف انه "رخصة الأهل" صارت واقع اجتماعي بتجاهل السياق الأوسع للأزمة.

بنناقش كيف انه الحلول الفردانية مش كافية، وكيف لازم نفهم واقعنا السياسي والاقتصادي والاجتماعي كمجتمع لنقدر نفهم التحديات اللي بواجهها الأهل.

اسمعوا الحلقة لتنكشفوا على صورة أوضح عن واقع الوالدية في مجتمعنا الفلسطيني.

في هاي الحلقة منحكي مع رلى جريس، معلمة فيزياء، مدربة رقص وكاتبة، وأم منفصلة لطفلين.

رلى بتشاركنا لحظة التحول في حياتها - كيف حملت أولادها وطلعت من البيت، وكيف هاي اللحظة كانت نقطة تحول حطمت حاجز الخوف. من خلال حوارنا العميق، بتحكيلنا رلى عن اكتشافها انه القوة موجودة جواتنا، وانه الضعف هو نوبة وبتخلص.

بنتعمق مع رلى في تجربتها كأم منفصلة، كيف تعاملت مع هاي النوبات، وكيف تعلمت تعطي وقت لحالها وتخلق مساحة آمنة لأطفالها. في رحلتها، اكتشفت شغف جديد بالكتابة والرقص، وحولت هاي الاكتشافات لقوة دافعة في حياتها.

اسمعوا الحلقة لتتعرفوا على قصة امرأة حولت التحدي لفرصة، وعلمتنا انه الحياة ما بتوقف.

في هاي الحلقة، منلتقي مع مجد شدافنة، أم لأربع شباب، بتشارك تجربتها بصدق وعفوية عن واقع تربية الذكور. 

مجد بتحكي بصراحة كاملة عن رحلتها كأم - بكل تحدياتها وأفراحها. بنتعرف على كيف تطورت علاقتها مع أولادها مع تغير مراحل حياتهم - من طفولتهم للمراهقة للشباب, للزواج وتكوين عائلة. بتحكيلنا كيف تعلمت مع الوقت إنه كل ولد عنده شخصيته الخاصة وانه التربية مش حسب الكتالوج.

بنسمع منها كيف اكتشفت إنه القوة مش بالسيطرة، بل بالقدرة على التكيف والتعلم من كل موقف وتقبل الواقع. وفي النهاية، بتختم بدعاء بسيط بس عميق: "اللهم إني عجزت عن إصلاح أولادي وزوجي فأصلحهم لي".

اسمعوا الحلقة لتتعرفوا على قصة أم عرفت تخلق توازن بين القوة والحنان في بيت مليان بالطاقة الذكورية.

في هاي الحلقة منحكي مع حنين الياس، موجهة مجموعات وبتشتغل في مجال التربية والتعليم، عن تجربتها الشخصية كأم لطفل واحد.

حنين بتشاركنا بقرار إنجاب طفل واحد - قرار واعي بتراجعه باستمرار، وبتفحصه من كل الجوانب. من خلال حوارنا العميق، بتكشف حنين عن التحديات اليومية والأسئلة العميقة اللي بتواجهها كأم.

بنتعرف على كيف هذا الموضوع بيتناقش داخل العائلة، خاصة مع ابنها رند اللي عمره 11 سنة، واللي عنده نظرة عميقة وفريدة للموضوع - بيشوف تأثير القرار مش بس على حاله، لكن على العيلة المستقبلية اللي رح يكونها.

حنين بتشارك معنا صراحتها الكاملة عن الصراع الداخلي: بين رغبتها في توفير علاقة اخوية لرند، وبين شعورها بالمسؤولية اتجاه التساؤل اذا هي راح تعطي الطافل القادم ايش لازمه. بتناقش معنا كيف بتحاول تعويض غياب الإخوة من خلال توفير فرص اجتماعية وعلاقات بديلة لرند.

الحلقة بتقدم نظرة عميقة لمعنى الأخوة والعائلة، وبتطرح أسئلة جوهرية عن معنى الوالدية والمسؤولية في إحضار أرواح للعالم. حنين بتشاركنا تأملاتها في الفرق بين كونك جزء من فريق (عائلة كبيرة) أو تواجه الحياة لحالك (ما عندك اخوة واخوات).

اسمعوا الحلقة لتتعرفوا على نظرة مختلفة للوالدية - نظرة واعية، متأملة، وصادقة عن تحديات وجمال تربية طفل واحد.

في هاي الحلقة منحكي مع عارف بشير أبو سما وزوج هيا , ومدير عام شركة البستان من مجموعة البشير 

 عارف بشاركنا تجربته الخاصة كأب جديد لبنت عمرها سنة ونص، وبيفتح حوار نادر عن احتياجات الآباء في مجتمعنا.

تسعين بالمية من الرجال العرب بصيروا آباء، بس مش كفاية  منحكي عن احتياجاتهم. من خلال تجربته، بكشف عارف كيف المنظومة الصحية والمجتمعية ما زالت غير مجهزة لدعم الأب في مراحل الحمل والولادة والأبوة المبكرة.

بنتعرف على التناقضات اللي بيواجهها الأب: كيف بنطلب منه المشاركة والمساعدة بس ما منوفر له الأدوات والدعم اللازم. كيف الدورات والإرشادات كلها موجهة للأمهات، وكيف حتى المؤسسات الصحية بتستغرب وجود الأب.

بنناقش مع عارف ظاهرة غياب مجموعات الدعم للآباء، وليش الآباء ما بفكروا يتشاركوا تجاربهم مع بعض مثل ما بتعمل الأمهات.

حلقة مهمة للآباء الجدد والمستقبليين، للأمهات اللي بدهن يفهموا تجربة شريكهن، وللمؤسسات الصحية والمجتمعية اللي بتقدر تكون جزء من التغيير.

اسمعوا الحلقة لتعرفوا أكثر عن واقع الأبوة في مجتمعنا وكيف نقدر نخلق بيئة داعمة للآباء.

في هالحلقة منحكي مع ميس بصول موسى، زوجة وسيم وأم جود. ميس مختصة بإرشاد الأهل وحاصلة على دبلوما بالمونتيسوري.

بتحكيلنا ميس عن رحلة تحول نوعي - من شغلها في شركة أدوية كبيرة لاكتشافها للمونتيسوري. كيف وصلت لمرحلة حست فيها إنها موجودة بلبيت بس مش موجودة مع ابنها، وكيف هاي اللحظة قادتها لتغيير كبير في حياتها.

من خلال تجربتها كأم وكمختصة، بتوضح ميس كيف المونتيسوري بتغير نظرتنا لدور الطفل في البيت - من ضيف لشريك فعّال. بتشاركنا أمثلة عملية كيف نقدر نكيّف البيت والأدوات لتناسب حجم الطفل وقدراته، وكيف نخليه يشارك في مهام البيت.

بنناقش ميس التحدي الحقيقي بموضوع الوقت والمساحة النفسية - كيف نوازن بين رغبتنا نخلص شغل البيت بسرعة وبين أهمية إعطاء وقت للطفل يكون شريك، حتى لو معناها فوضى أكبر أو وقت أطول. 

اسمعوا الحلقة لتعرفوا أكثر عن نهج المونتيسوري وكيف نقدر نخلي أولادنا يحسوا بالانتماء والاستقلالية في نفس الوقت.

في هاي الحلقة منحكي مع خالد حسن، أب لزينة، معاذ وشادن,  ناشط اجتماعي ومدير تطوير اقتصاد المجتمع العربي في عوجن. خالد بيشاركنا تجربة غنية في العمل التطوعي من خلال لجان أولياء الأمور، اللي بدأت من لحظة دخول أولاده للأطر التربوية.بنتعرف على كيف اهتمامه بأولاده تطور من البيت للمؤسسات التعليمية.  بحكيلنا عن تجربته في بناء علاقات قائمة على الثقة والاحترام المتبادل مع الطاقم التدريسي وعن العلاقة المثلثة بين المدرسة والأهل والدولة، وكيف غياب أي طرف بأثر على نجاح العملية التربوية.في الحلقة بشاركنا قصص نجاح عن كيف لجان أولياء الأمور قدرت تكون عامل داعم ومحفز للمسيرة التعليمية والتربوية. منتعرف كمان على التأثير العميق اللي بتتركه هاي المشاركة على الأولاد، وكيف العلاقات اللي بتنبني بين الأهالي بتنعكس على علاقات أولادهم وعلى المجتمع ككل.اسمعوا الحلقة لتعرفوا أكثر عن قوة العمل الجماعي في التعليم، وكيف نقدر نكون جزء من التغيير الإيجابي في مجتمعنا.

في هاي الحلقة منحكي مع سهاد عواودة، مختصة في علم النفس التربوي والتطوري والعلاج النفسي الديناميكي. سهاد هي مديرة جمعية "انت وانا سوا" اللي بتقدم خدمات تطورية في بساتين تواصلية بالمجتمع العربي من قبل وزارة الصحة.بتحكيلنا سهاد عن فكرة مميزة - انه الوالدية بتبدأ من طفولتنا المبكرة، من خلال اللعب بالدمى وتقليد الأهل. من واقع تجربتها كمعالجة نفسية وكأم، بتوضح كيف الطفل بيتأثر بكل اشي حواليه، وكيف هاي التجربة المبكرة بتأثر على شخصيتنا لما نكبر. بتحكي سهاد عن رحلتها الشخصية كأم من الفنتازيا للواقع - من فكرة "السوبر وومن" للتقبل  والفهم العميق للأمومة بكل أبعادها. بتشاركنا تجربتها الغنية في الامومة لأربع أولاد، وفقدان حملين خلال هاي المسيرة. منتعرف على كيف واجهت التحديات كأم وكمعالجة، وكيف نجحت تفصل وتدمج بين الدورين.

أسمعوا الحلقة لتعرفوا أكثر عن العلاقة بين طفولتنا وأسلوب تربيتنا لأولادنا، وكيف نقدر نفهم حالنا وأولادنا بشكل أفضل.

في هاي الحلقة منستضيف ريم الماضي شلبي, للمرة الثانية على البودكاست , لأنه حديث واحد معها ما كان بكفي.

ريم  أم لأربع أولاد- 3 شباب وبنت- ومرشدة للأهل في موضوع التربية الجنسية.

منحكي مع ريم عن كيف منحول موضوع التربية الجنسية من موضوع منحس بالرهبة اتجاهه  لحديث يومي طبيعي مع أولادنا. بتشاركنا ريم تجربتها الشخصية كأم وكيف تغييرت نظرتها من التردد والخوف من هذا الموضوع، لفهم عميق لأهميته وكيف بتدمجه بشكل طبيعي في حياتها اليومية.

بتقدم ريم نظرة مميزة للتربية الجنسية، مش كمحادثة واحدة كبيرة، انما كسلسلة من المحادثات البسيطة اللي بتصير خلال اللحظات العادية - في السيارة من خلال الأغاني, او تساؤل بسيط عن لقطة بفلم رومانسي.

منتعرف على كيف بتتعامل مع الأسئلة المحرجة، وكيف نقدم المعلومات بطريقة مناسبة لكل عمر، وكيف نربط هاي المحادثات مع قيمنا, ديننا, تقاليدنا وعادتنا.  أسمعوا الحلقة لأنها بتقدم طريقة عملية ومريحة للتعامل مع موضوع الرتبية الجنسبة, وبتساعد الأهل يلاقوا طريقتهم الخاصة في بالحكي مع أولادهم بشكل صحي وطبيعي.

في هاي الحلقة منحاور  يارا حسن زعبي وبكر زعبي، زوج وأهل لطفلين - جبر وجيدا

منحكي مع يارا وبكر عن تجربتهم الخاصة في التربية خلال فترة الحرب، وكيف تغيرت أولوياتهم ومخاوفهم كأهل. منتعرف على كيف بوازنوا بين المحافظة على روتين حياة طبيعية لأطفالهم وبين التعامل مع واقع في تحديات وتغييرات.

بحكولنا يارا وبكر عن تجربتهم في التربية بهاي الأوقات الصعبة- من التعامل مع أسئلة الأطفال عن صوت الصواريخ والغرف الآمنة، لمشاعر الذنب لما يفكروا بمعاناة شعبنا في غزة. منسمع عن تحول مفهوم الأمان في حياتهم، وكيف صارت المخاوف تتجاوز الخوف من الحرب ووصلت للقلق على مستقبل أطفالهم بظل وضع مجتمعنا.

 منسمع كيف بحاولوا يحافظوا على توازن ما بين تربية أطفالهم بوعي لهويتهم وواقعهم، وبين محاولة توفير طفولة طبيعية قدر المستطاع.

أسمعوا الحلقة لأنها بتقدم صوت صادق عن تحديات ومشاعر أهل في ظل الحرب, صوت الي بشغل اغلبنا، وبتفتح نقاش مهم حول دور الأهل في حماية أطفالهم جسدياً ونفسياً في ظل ظروف استثنائية، مع الحفاظ على هويتهم وانتمائهم.

في هاي الحلقة منلتقي بمحمد رشدي مجادلة، نائب رئيس بلدية باقة الغربية، زوج هزار وأب لرام، ديما وسلمى.

منحكي مع محمد عن تجربته المميزة في الدمج ما بين مسؤوليته كأب ودوره في البلدية، وكيف بتأثر قراراته في البلدية على مستقبل أولاده وأولاد البلد. منتعرف على رؤيته لتحول باقة من قرية إلى مدينة، وكيف هاي التحولات بتأثر على تربية الأبناء وتطور المجتمع.

بشاركنا محمد تجربته الشخصية في النشأة بباقة كقرية، وكيف اليوم بشوف التغييرات الاجتماعية والبيئية من منظور مزدوج - كأب وكمسؤول في البلدية. منسمع عن نهجه الخاص في التربية وكيف بربط بين قراراته في البلدية وتأثيرها على مستقبل الجيل القادم، وكيف بتعامل مع التحديات اللي بتواجه المجتمع في مرحلة التحول من قرية لمدينة.

أسمعوا الحلقة لأنها بتقدم نظرة عن الموازنة بين المسؤولية العامة والخاصة وبتفتح نقاش مهم حول مستقبل بلداتنا وكيف منقدر نخطط له بشكل يراعي احتياجات الأجيال القادمة.

بهاي الحلقة استضفنا هيا حنيني،أخصائية علاج وظيفي مختصة بالطعام والإطعام للأطفال، وصاحبة منصة “First Bite” الي بتضم مئات المنشورات وبتقدم للأهل نصائح وإرشادات حول طعام وإطعام أطفالهم، بهدف دعمهم في رحلة التغذية بأسلوب سليم,  وبناء علاقة صحية بين أطفالهم والطعام. 

حكينا مع هيا عن رحلتها المميزة في عالم الfeeding وكيف أن شغفها لهذا المجال وتقديم المساعدة للأهالي أثر بشكل عميق على أسلوبها والعلاقة الحلوة الي بتكونها مع الأهل والأطفال.

حكينا كمان عن الفكرة المغلوطة عليها أنها أم وكيف هي بتتعامل مع هاي الفكرة وعلى الرغم منها، كثير من الأهل برتاحولها, بثقوا فيها وبحبوا اسلوبها الي في كثير تفهم وتقبل.

تطرقنا لأهمية خلق بيئة داعمة بتساعد الأطفال على تطوير عادات غذائية صحية. من خلال قصص ومواقف يومية بسيطة بتواجهها في إرشاداتها- هيا شاركتنا استراتيجيات فعالة بتخلي تناول الطعام تجربة ممتعة وإيجابية للأطفال، بعيدًا عن أي أحكام مسبقة.

اسمعوا الحلقة لتتعرفوا على شخصية هيا أكثر  وتسمعوا نصائح قيمة ومعلومات مهمة ممكن تساعد الأهالي على فهم كيف يدعموا أطفالهم في بناء عادات غذائية صحية.

في هاي الحلقة منلتقي مع الشيخ عبد الله بدير، ابن كفر قاسم, الناجي والشاهد على مجزرة كفر قاسم الي حصلت في 29 أكتوبر 1956،  بوقتها كان عمره 11 سنة. 

بشاركنا الشيخ ذكرياته المؤلمة من هذيك اللحظات الي غيرت حياته بشكل جذري، وكيف أثر هذا الحدث في تشكيل شخصيته, مهنته وتوجيهه كأب وجد. منتعرف على كيف انتقلت هاي التجربة القاسية من جيل لآخر، وكيف أثرت على تربية أبنائه وبناته، في جوانبها الواعية أو الغير واعية. 

هاي الحلقة فيها سرد تفاصيل تاريخية، وتطرق لكيف هذا الحدث وما في من صدمة أثر وشكل علاقة الشيخ عبد الله مع عائلته وأجياله اللاحقة. منسمع كيف ممكن للأحداث التاريخية الكبيرة تمتد ويستمر تأثيرها لأجيال، وكيف الشخص بختار يتصالح مع التجربة المؤلمة وياخدها لمحل صمود وتشبت وعزيمة ومشاركة بهاي آلاليات مع محيطه - إن كان عائلته أو المجتمع الموسع.

أسمعوا الحلقة  لأنها بتقدم درس مهم عن الصمود، الإرث النفسي للأحداث الكبيرة، وكيف ممكن الأفراد تحول تجاربهم الشخصية لمصدر قوة وحكمة للأجيال المقبلة.

في الجزء الثاني من حلقتنا مع ندى ومحمد جبارين، استمر الحوار على مواجهتهم لمرض طفلتهم شام وتأثيراته على حياتهم العائلية. حكينا عن الصعوبات الي واجهوها في التعامل مع تبعات المرض على شام، من الناحية الجسدية والعاطفية، وكيف قدموا الها الدعم خلال فترة تواجدها في المستشفى ورحلة تعافيها المستمرة لليوم.

بسأل ندى ومحمد عن كيف بحافظوا على توازن بين رعاية شام وتلبية احتياجاتها وبين واحتياجاتهم الشخصية والزوجية مع الحرص على استمرارية حياة العائلة واهتمامهم ببناتهم الأكبر - نادين ونصال.

حكينا عن التغيير في أدوارهم كأهل والدعم المتبادل بينهم وكيف تقاسموا المسؤوليات وواجهوا هاي المرحلة الصعبة ايد بايد. حكينا كمان عن الدعم الي اخذوا من العائلة والأقارب وقديش كان مهم وضروري.

اسمعوا الجزء الثاني لتتعرفوا كيف ندى ومحمد، رغم كل التحديات، نجحوا في تخطي أصعب اللحظات وحافظوا على دفء واستمرارية حياتهم العائلية بحب وصمود.

في هاي الحلقة، معي ندى ومحمد جبارين، أهل شام. 

شام طفلة عمرها ٣ سنوات, على عمر النص سنة مرقت بأزمة صحية مفاجئة - من حم جسماني بسيط وعوارض رشح لتدهور سريع في حالتها وصعوبة في التنفس وتوقف عمل القلب. 

الحدث حصل في 6.10.21 -من رحلة استجمام عائلية هادئة لايلات لنقل سريع عن طريق الهليكوبتر لمستشفى مركزي في البلاد لتلقي العلاج بأسرع وقت ممكن.  

ندى ومحمد شاركوا معنا المحطات الصعبة والمصيرية اللي مروا فيها من لحظة تشخيص حالة شام الي امتدت لأيام ومواقف عديدة  داخل سيرورة طويلة حسوا فيها انها راح تفارقهم عدة مرات, لكن ما فقدوا الايمان  والامل ورافقتهم الآية- يُحْيِي الْعِظَامَ وَهِيَ رَمِيمٌ. 

الحوار مع محمد وندى راح ينقسم لجزئين.

اسمعوا الجزء الاول  لتتعرفوا على تجربة أهل  بمواجهة اختبارات وقرارات حساسة كثير التي فرضتها حالة طفلتهن الصحية.

بهالحلقة استضفنا ريم الماضي شلبي، زوجة لأشرف وأم لأربعة مراهقين: عمر، لور، رنيم، وبدر.

ريم  محامية ومرشدة في التربية الجنسية والإرشاد الأسري. 

حكينا مع ريم عن تجربتها كأم بتربي ٤ مراهقين بأجيال ومراحل متنوعة، وكيف بتتعامل مع التحديات اليومية، بجانب اللحظات اللي مليانة حب وفرحة.

ريم شاركتنا إنه أول ولدين عندها في فرق جيل بينهم وبين الاصغر، ولما كبرو الأصغر، لاحظت إنه في أشياء ناقصتها بصندوق أدوات التربية، وإنها بحاجة لآليات جديدة عشان تقدر تتعامل معهم بطريقة أحسن. هون، قررت ريم تتعلم أكثر عن التربية والإرشاد عشان تقدر تبني علاقة صحية وقوية مع أولادها.

حكينا عن كيف هذا القرار أثر على حياتها وحياة عائلتها، وعن الرحلة اللي مرت فيها من محامية لإرشاد الأهل، وكيف هذا التغيير ساعدها تفهم أولادها المراهقين أكتر وتتعامل معهم بطرق مبتكرة وفعالة ومحبة.

الحلقة مليانة قصص واقعية عن التحديات والفرح اللي بتيجي مع تربية المراهقين، وعن كيف الأم ممكن تتطور وتتعلم على طول الطريق.

 اسمعوا الحلقة لتتعرفوا أكثر على تجربة وأسلوب ريم بتربية مراهقين!

في هاي الحلقة الخاصة، استضفت عائلتي: أمي سعاد وأخوتي علي ودريد. حكينا عن قوالب التربية المختلفة الي نشأنا عليها وتأثيرها علينا. تحدثنا عن 3 أنواع من القوالب التربوية: المكررة، المرتجلة، والمصححة.

بدينا بتعريف هاي القوالب- 

القوالب المكررة: هي السلوكيات والمعتقدات الي بتنتقل عبر الأجيال وبتكرر كيف ما هي (بشكل واعي او غير واعي).

القوالب المرتجلة: هي التعديلات العفوية الي منعملها, بالأساس نتيجة التكيف مع ظروف الحاضر.

القوالب المصححة: هي محاولات واعية لتغيير سلوك أو نهج ما عجبنا في تربية أهلنا.

وانتقلنا لحديث حول هاي القوالب من خلال مشاركات  بقصص وتجارب عشناها.

 أمي -سعاد شاركتنا في أبرز القيم والمعتقدات الي ورثتها من والدها ووالدتها واتبعتها في تربيتنا. علي حكى عن تجربته كأب، وكيف أثرت تربية والدينا، وخاصة أمي، على أسلوبه في تربية أبنه. حكى كمان عن الأنماط الي بشتغل على تغييرها بشكل واعي. دريد شارك وجهة نظره حول دوره في العائلة , والتغيير الي عمله بنفسه وتعمقه في عالم التنمية البشرية وكيف ساعدنا كلنا نعمل نوع من التصحيح لقالب التعبير عن المشاعر والتواصل مع المشاعر الصعبة بالاخص.

اسمعوا الحلقة عشان تكتشفوا كيف تأثير تربية أهلنا علينا، حتى لو حاولنا نغير أو نبتعد عن بعض الأساليب والأنماط في النهاية معظم سلوكيات التربية موروثة. بتستناكو حلقة مليانه بالتأملات العميقة واللحظات الحقيقية!

 بهاء قطوف هو الجيل الرابع من عائلة قطوف - أصحاب مصلحة مجوهرات، هو المصمم الرئيسي ومدير المصنع. 

مع بهاء حكينا عن كيف حافظت العائلة على إرثها والقيم الأساسية اللي رافقت تطورهم على مر السنين مثل العطاء والمصداقية والحب للمهنة. 

بهاء بشاركنا كيف تم نقل الحرفة والإرث عبر الأجيال من الجد حنا الي بلش بسنة 1907 للجد بسيلا للجيل الثالث وللرابع اليوم  وكيف هو بشوف الشغل ضمن مصنعة العائلة هي مسؤولية وامتياز كبير.

منحكي عن دعم العائلة لنمو الأجيال الجاية  وكيف بعطو كامل الحرية والاختيار لكل فرد بأنه ينخرط في العمل أو يختار طريق مستقل. كمان منحكي عن ديناميكيات العمل ضمن العائلة, كيف بكون لما الزميل هو  ابن العم والمدير هو الاب؟ 

اسمعوا الحلقة لتتعرفوا على قصة عائلة قطوف وكيف حافظوا على إرثهم وقيمهم على مر الأجيال، وكيف بهاء بوفق بين التقاليد والابتكار في صنعة العائلة.