Explore every episode of the podcast 社群咧衝啥

社群短影音閃都閃無路，TikTok、小紅書與 Reels 上的中國詞無張無持就侵門踏戶，和出版編輯面對「支語字蟲」都定定變無步。這集節目邀請前衛出版社總編輯鄭清鴻，對網路現象來講起，深談「支語入侵」背後的文化焦慮佮社會心理。面對有意識的語言佮文化洗記持，干焦靠「掠字蟲」抑是自我懷疑，攏無才調共問題排除。節目內底阮有提起，抵抗文化侵略的上好一帖，就是予在地的文化自信佮語言有相接，本土語言顧予在，咱才有底蒂來排解。這集咱輕鬆聽、入心內，做伙思考台灣語言的過去、現在佮未來。

《粽邪》系列電影導演廖士涵來矣！這回《粽邪4：坤蒂拉娜》又閣有啥款厲鬼來作祟？七月半上架對對對，咱來聽拍片時的鬼仔古，注意！毋通凊彩回頭……

阿睿是Youtube創作者，歷史傳說講袂煞，中原逐鹿三國英雄膽，東灜戰國到江戶定東京，西方故事無精差，台灣列傳閣較著認真看，影片創作是華語為大，毋過伊是台語過生活，啥款機緣予伊開始注心台語路，育囝過日行上台語途？表演的語言佮日常無仝步，這款精差到底為何故？歷史講予大人聽，故事是囡仔看世界的召鏡，期待日後各種主題，愈來愈濟台語聲。

學慧是央廣粵語主持人兼新聞主播，播香港冊店事件的因果，伊佇播出前踮網路社群寫下心情，講出目前的情形，原來目今的情景，只賰央廣粵語會當用廣東話共事件講分明。一篇短短文章掛影片，佇threads大大湠出去，引起濟濟人的注意，思考言論自由的代誌；學慧是香港正出身，煞自細佮意歌仔戲，來台灣讀冊自然就蹛落去，八年經過欲做台灣的女兒，由伊的角度看香港，八年十年有啥無仝？香港人講袂出喙的是啥貨，香港社會消失的又是佗一項？這幾年香港人移民台灣的濟濟，港台之間也有較加，伊也共問題講拆白，凡勢咱需要翻頭看家己，也關心這个新議題。

關心香港冊店事件，咱會使做啥？嶼伴書間的青樺，對冊店佮出版的角度來看，香港的困境到底是按怎，才會出冊毋敢徛本名，只因人在香港會驚惶；冊店人客嘛有對香港來，啥物環境予人客心肝頭會在？經營冊店練就看人的人才，會買冊袂買冊一看心內就知知；閣欲推薦香港創作者的作品予聽友，內底的故事佇香港的冊店已經袂當上，看香港的故事咱嘛會當家己想，咱的未來到底應該生怎樣？

香港冊店賣冊犯國安，店長店員難保全，彼條紅線看袂清，不時磕著政府的神經；台灣獨立冊店的冊架是表示，欲賣啥冊看店長的意志，言論自由對冊的選擇開始，政府袂用得干涉伊；對台灣看香港，精差佇佗位？嶼伴書間的治德講愛去感受伊的空氣，十年前到今，毋是話語變做仝一味，是你連講話都有危機，翻頭看台灣咱家己，閣會當看出咱所面對的考驗，是佗一款新的危險？

2026世足賽已經煞，強權奪冠無意外，翻頭來看咱厝邊隔壁，這回韓國的結果上走縒；輸球袂輸變戰犯，全國罵聲無中斷，總統開喙閣較亂，背後到底啥因端？比賽輸贏無定著，輸球按怎著火燒？石伯開破韓國比賽偌礙虐，才知心態、手路攏無蓋著；翻頭看咱運動部，近期也有火咧燒，李洋部長改革路，毋是平順的坦途，運動改革欲斬病根，病根牽挽費心神，千百協會是原因，按怎做才會得通翻身？這集咱對韓國的失利，來看台灣運動改革怎樣行落去。

頂回石伯(石明謹)下讖語，世足八強點四位，英格蘭佮法國隊，歐洲強權實力媠，阿根廷隊屬南美，摩洛哥隊出北非，四國點了對對對，今日四強也收隊，只賰二隊冠亞軍拚生死；現在正是好時機，翻頭來看2026世足賽的道理，巴西按怎早早來離開？法國對摩洛哥是矛佮盾的對壘？維德角逼得阿根廷贏著無媠氣，今年出名是挪威；七月二十總決賽，比賽怎看才精彩？看球看有理路來，著聽石伯講看覓。

你敢會堪得自己替序大人做「長照」？長期照護雖然一直佇濟濟家庭發生，煞是這十外年來才變做討論的話題，政策的協助、保險的安排雖然攏真要緊，毋過「照顧者」彼款人生卡牢著的烏暗感覺，猶原難以消敨，金枝演社《有佇咧無》對戲劇出發，以囝兒做為照顧者的角度出發，共這个照顧失智老爸的序細所面對的困境搬出來，佇烏暗當中，彼聲「有佇咧無」是疑問、是咒讖，敢也會是出口的光芒？

跤球比賽真激烈，人人看甲齊熱血，攑香綴拜看鬧熱，資深球迷會分別；
比賽暗話有濟濟，華語有咧講詳細，罰球徛佇十二碼，「大腳」是啥怎「解圍」？
台語敢無通解說？欲補就愛趁機會，那學規則那學話，台語講法共抾回；
專業球評石明謹，世足主題第二期，趣味濟濟智識滇，聽煞球賽看透機。

2026年世足賽已經開始矣！節目上架的時猶咧拍「小組賽」，毋知逐家敢有心肝頭上支持的球隊咧？若是對跤球無蓋熟似，想欲攑香綴拜做一日球迷，敢看會出比賽內底的趣味？這集邀請專業的球評石明謹(左盃)，對這屆世足賽濟濟佮過去無仝的所在講起，來替像亞特這款一日球迷解說其中的鋩角，閣𤆬逐家對遮爾濟球隊內底，揣出可能無才調踢出冠軍，煞有濟濟感動人的故事的國家╱球隊，對一場世足賽，原來會使看著世界史的演變！上落尾左盃閣會提出伊的八強賽入選隊預測，伊的估算敢會對同？這集聽煞了後，時到咱來對看覓！

吟遊詩人是啥物？中古世紀唱歌詩，唱出萬項成真理，這聲會出啥代誌？現代劇場結合傳統戲曲，是欲相敆抑是相激？民間活戲來做西方即興劇，閣是囡仔觀眾鬥排設；團長厚寬戲劇教育正出身，做戲反變閣翻新，傳統元素耍出新精神，只是著為難演員加費心；歌仔戲演員好腹內，活戲本底gâu鋪排，紫雲煞講這款做法是挑戰，猶有演員講規氣免排練？！到底是啥物戲遮爾天，聽煞你就知影親子戲閣會使按呢變！

【演出資訊】
臺北海鷗劇場《吟遊詩人忘了說故事》
時間：2026/7/11 (六) - 2026/7/12 (日)
節目內容

自細咱聽囡仔歌，定定聽無咧唱啥，毋過長久記心肝，真濟人一聽就會綴咧唱出聲，現代的囡仔歌無平凡，主題風格蓋多元，會唱會跳好耍款，功能濟濟有成範。公視台語台推出第二屆《咱的歌》囡仔歌徵選比賽，這集邀請評審王昭華來破解，毋捌音樂敢有才調投稿來？徵選重視啥題材？這馬已經是AI的時代，若有用著AI敢會使？想袂到昭華老師竟然講……你先莫予我知？！

你敢有看過家長予囡仔家己掰3C看手機？其實美國有研究，比起用看的，予囡仔聽聲音節目，對囡仔有濟濟好處！這集除了分享亞特做囡仔古節目《冊櫥仔頂的膨鼠岫》的種種設計較聽友回應，嘛欲𤆬聽友做伙來了解美國的囡仔聲音節目的相關研究；另外你敢知台灣的囡仔Podcast節目排行前10名是啥人咧？內底敢有台語的節目咧？聽落去就知囉！

「歌仔上青」全國比賽第三屆，少年組冠軍家綺真光彩，伊是宜蘭囡仔出將才，宜蘭是歌仔戲原鄉無凊彩；毋過聽講伊小學時毋但袂曉講台語，甚至毋捌啥貨是歌仔戲，糊里糊塗參加社團去，自此煞心愛著伊。

較早的人有講起，無捨無施囝做戲，爸母按怎改心意，肯予囡仔學歌仔戲？老爺飯無輕可食，想欲學戲往佗行？連紲三屆擂台拚，不負苦心得頭名，名師呵咾會觸舌，台風在在好演技，致詞也是全台語，網路社群引注意；少年囡仔好才情，戲曲之路是苦行，明日之星待翻騰，來聽家綺心路程。

※特別感謝獨立冊店「嶼伴書間」提供空間。

台灣人蹛踮日本東京按怎講台語？孤身生活心肝敢袂擽絲(ngiau-si)？想欲揣人拗跤運動做瘦氣，這集來講眠床頂的代誌。年蕭月品功夫好離離，對手呵咾甲會觸舌，食喙功夫是歕是欶，佗一个動詞有道理？眠床頂全屈勢，台語動詞按怎來掰會？孟儒的台語生活按怎過？台語同伴按怎揣？佇日本敢誠實會做得台語社群來聚會？線頂通翻譯、實體開講席，台灣人佇東京的台語生活對策！

想欲佇生活中堅持對囡仔講台語，會搪著啥款困難？阿文是按怎起心動念，欲佇華語優勢的生活中，堅持對囡仔講台語？

阿文的家庭其實是做阿爸的阿文對查某囝「阿妹」講台語，阿母對阿妹講華語，論真講，這个家庭無算是全台語家庭，毋過煞有可能是上濟人做會到的台語文化家庭，這款一跤踏入台語文化箍仔的家庭，需要揣著降低溝通成本、減少耗用傷濟心力佇搜揣台語語詞本身的「協助資源」，欲按怎予這款家庭離台語閣較倚，in 需要啥款支持，其實是政策推動的時，真要緊的參考，你身邊敢嘛有這款家庭？你認為按怎予遮的家庭離台語閣較倚近咧？

台客X文青 — 宜蘭美食｜旅宿｜景點｜親子｜生活

掌中戲╱布袋戲除了傳統的忠孝節義，閣會當搬出啥款現代社會的議題？嘉義五洲勝義閣掌中劇團有出名的「親子戲」，予大人囡仔看了攏歡喜，閣結合嘉義在地的傳說佮廟宇，田野調查真拚勢，閣為劇情編新戲，嘉義布袋蚶仔寮的豬母娘娘有廟拜，隔壁的武聖爺又閣按怎來？來聽團長曾嘉民講予你知！

這幾年佇網路社群平台經營台語口座的少年人愈來愈濟，隨人才調佮特色無齊齊，這回請來「阿東的哩哩叩叩」的「阿東」少年家，伊是早早就注心台語議題，2019年就經營台語面冊，伊的特色是真會掠時勢，啥物話題當衝，就會思考台語欲按怎來掰會，同時伊閣佇學校教台語𤆬子弟，做台語教師會搪著啥問題？幾若屆學生看落來，敢有啥款家己的體會？這集來聽阿東講出內底的烏佮白。

由金枝演社孤腳戲《籠子裡的白狐》而起的討論來到第二集，亞特佮小冬講起演出進前佇Podcast宣傳錄音彼日，竟然就是台北發生捷運無差別殺人事件的彼當下，正正對照著這齣戲內底對「人佮野獸之間的關係」的探討，到底人佮獸之間的界線佇佗？一旦超過彼條線，人敢誠實會變做獸？翻頭來講，人佇成長的過程當中，到底是按怎一步一步，行上「成獸之路」？這齣對小冬心中的烏暗面出發，半自傳、親像聊齋故事一般的怪奇古，到底咧暗示社會中啥款衝突、矛盾、烏暗，猶有……彼一絲仔光明？

最近拄搬煞孤腳戲《籠子裡的白狐》的「小冬」施冬麟，佇戲中一人趕幾若个角色，有男有女，有人有妖有動物，甚至閣是這齣戲的導演佮編劇，《籠子裡的白狐》佇台北演出了後，得著濟濟的呵咾佮鼓勵，嘛表現著演員佇舞台頂深厚的功力。毋過這齣戲是一齣對「烏暗面」出發的作品，戲文佮演技予人會笑、會驚、會讚嘆，嘛會濟濟對社會現象的剾洗。

這回趁《籠子裡的白狐》準備欲到台中演出，亞特專工邀請小冬來敨心肝liú腸肚，講家己的故事，也講戲內底的烏暗面是對家己佮社會按怎的觀察，是按怎伊會講35歲了後是伊的第二人生？第一佮第二人生分界的彼條線是啥款機緣？伊對社會的觀察又閣按怎去對照佇戲劇的創作？這集予你烏暗又閣光明的小冬－－演員施冬麟。

金枝演社《籠子裡的白狐》

金枝演社中生代全能創作者施冬麟
編、導、演火力全開，赤裸剖開自我的獨腳戲
說書 ╳ 吟唱 ╳ 戲曲 ╳ 操偶
打造風格獨特的魔幻現代聊齋

+++++++++++++++++++++++++++++

2024首演劇評盛讚：

★★★★★ 勇敢掀露人性的炫技曲！

★★★★★ 展現多角敘事的高難度技巧！

★★★★★ 難以言喻的精彩演出！

★★★★★ 連背肌背影都會演戲，讓人目不暇給！

【臺中國家歌劇院小劇場】
5/2 (六) 19:30 演後座談
5/3 (日) 14:30

購票：https://www.opentix.life/event/1996860022807158785

透過台文詩集《日花閃爍》衝上天的現象，這集對作者温若喬的角度，來看台文出版的市草佮新路。台文出版佇作家方面，敢有啥物會用得接觸著新讀者的寫作理路？若喬對「小情小愛的共通感情」、「文字的斟酌」、「詞彙對感情的鋪排」到「接受『無遐爾台語氣』」幾个方面來討論，是講……是按怎討論到尾仔，亞特煞得出一个結論：「台語是台灣的京都話」？？

你敢捌聽過《日花閃爍》這本台文詩集？自出版以來無論佇冊店、出版業界攏引起真濟討論，出版當日頭一刷就賣了了，全台冊店買無冊，短短二個月，竟然已經來到七刷，總印冊量超過25000本，這款驚人的成績，就算佇台灣的華文出版界嘛是現象級的大代誌，甚至這本詩集閣引起總統賴清德的注意，毋但佇台北國際書展收入總統冊單，聽講也是總統佇冊單內底頭一本讀的冊，甚至閣佇今(2026)年世界母語日邀請作者若喬到總統府讀《日花閃爍》內底的詩！

這款使人設想袂到的台文出版異象，背後敢有啥款社會的原因？作者若喬又閣做著了啥代誌？這集邀請若喬閣來到節目當中，以作者的角度來看《日花閃爍》的誕生佮現象觀察。

這集由亞特單口來講古，講起假冒名人行戀愛路，有受害者佮車手攏是華仔的迷眾，嘛有韓國李敏鎬佮你Line的時字攏寫「簡中」，Brad Pitt講陷入離婚官司閣著癌真傷重，受害者投落2800萬(台票)錢煞齊失蹤。

網路名人佮交友詐騙到底有幾種？這集咱來開拆金光黨的手段有偌雄，嘛透過數據來看這幾年，敢誠實有做網路詐騙的防治，效果啥款，受騙的金額敢有減幾圓？咱若愈對詐騙手法有知機，就愈會當保護身邊的親人、朋友佮家己。

亞特相片予人來偷提，佇網路冒充是欲創啥貨？聽講囥佇網路交友的軟體，毋知會產生啥問題？

為欲了解交友APP咧舞啥，這集特別請出廣播界前輩阿旻(曾偉旻)來贊聲，原來伊是交友APP的社會觀察家，幾若間服務伊攏有橐錢無咧驚心疼，聽講有人叫伊「老公～」貼心肝，害伊眩船閣愣山(gông-suann)，毋過想欲招出來相對看，對方無閒無奈何(bô-ta-uâ)，閣講二人著仝心做伙行，這个教趁錢的課程你著去報名，身陷情關的阿旻欲按怎？線頂交友到底是該看破，抑是有心拍翸(phah-phún)就有小生小旦的愛情戲通搬？

猶未上檔的電影《世紀血案》風波了後，眾人攏咧問「我怎會攏毋知遮的過去？」人人進入台灣史大補課階段，網路冊店甚至出現大銷排行前五名，有四本佮台灣史有關係(賰一本是台文詩集)，加上最近人稱「民主油罐車」的101董事長賈永婕佇網路喊聲，翻頭去了解台灣近代歷史變做一件時行代，佇這个湧勢當下，節目邀請以出版台灣相關歷史出名的前衛出版社總編輯鄭清鴻，來分享伊的觀察佮看法，嘛推薦適合的相關的冊予想欲「補課」的聽友，做伙熟似遐的「學校╱課本無教你的歷史」。

「粗皮雄」、「卓糞埽」，你敢聽過遮的電視劇人名？講著學台語，有真濟人會推薦看台語連續劇，毋過現此時的台語連續劇華語透濫濟，演員嘛毋是隨人攏真輾轉，這時過去一寡仔真出名、台語氣口真好的台語連續劇，就變成當衝的選擇矣！台語社群口座「Youtube懸頂 ê 台語仙」專門共過去真精彩的台語劇片段，特別是講著目今較少人講的用詞、俗諺剪出來，佮觀眾做伙分享、做伙學習，甚至嘛引起真濟人對過去的連續劇的趣味，顛倒翻頭去Youtube頂頭揣遮的官方放出來的影片來看。這款社群口座經營的想法是按怎來的？又閣會拄著啥款問題？未來口座想欲按怎發展？這集邀請「Youtube懸頂 ê 台語仙」口座創辦者，來分享做這个口座的想法佮收穫。

提走亞特的一百萬的敵手(?)來矣！電視節目《全家有智慧》第七季冠軍隊成員阿狗佮徛鵝來節目分享學台語、共台語抾轉來的過程，in 是底當時失落？又閣按怎抾轉來？猶有組隊對初賽一路過關斬將，最後提著總冠軍佮一百萬的心情佮鋩角，in 佇參加節目進前敢有做啥準備？聽講有利用製作單位的心態，掠著一寡仔鋩角？這款比賽閣著考慮賽制，毋但比程度，嘛著跋心機？這集就請阿狗佮徛鵝來講透機。

※阿狗佮徛鵝嘛有一个公視台語台的網路節目《少年，這一工》通線頂看喔！

Privilege來到第二集，特權到底是啥貨，這集咱對社會學者的講法來熟似Privilege的意義，猶有真濟趣味的比喻，有人是揹仔飽飽物件袂少，有人是啥攏無干焦一領破草蓆，平平欲去仝一个所在，有人是毋免操勞，橐袋仔底自然有車票，嘛有人是拚死拚活儉腸凹肚彼幫車才坐會著，階級的分別敢誠實會流動，或者敢穩當愛流動？除了經濟條件，privilege敢有其他類型？比論講「文化資本」、「社會資本」？3分的唐墨佮5分的亞特欲來討論18分的利益者，該當按怎討論？你聽落去就知。

前一站仔「特權」話題當時行，你認為家己的成長過程當中，是有特權抑是無特權的人咧？講到底，特權到底是啥？怎樣才算有/無特權？網路頂有人開出一張20題的特權試驗清單，亞特揣來唐墨做伙來做試題，看覓得著的分數到底是偌濟，是亞特懸抑是唐墨低？或者阮二人攏是無特權無翼通飛？邀請聽友做伙來聽節目做試題，共阮講你得著幾分！

你敢捌食過鰇魚糜(魷魚粥)？你敢知，有一寡仔人逐年到了二二八，就會煮鰇魚糜來食？這碗鰇魚糜背後是一个家庭的故事，嘛是一个時代的故事。

台北市律師公會會長李瑞漢佇1947年二二八事件發生了後，召集台北市律師公會開會，對台灣省行政長官陳儀提出改革意見，3月10號佮小弟、朋友佇厝內做伙食鰇魚糜，便衣佮憲兵入來，將眾人𤆬走，李瑞漢安搭夫人邱杞妹，講鰇魚糜聽候伊轉來才食，自此，就毋捌轉來矣……

荖履仔劇團(夾腳拖劇團)推出結合尪仔、真人、光影佮故事冊、以李瑞漢的故事做基礎的囡仔戲，欲按怎予家長佮囡仔會當討論歷史，又閣袂傷過頭沉重？欲按怎予囡仔看戲毋免坐佇椅仔頂感覺捒縛？猶有，團長易蓁所講的，欲按怎予囡仔佮大人攏感覺著「愛」，才是這齣《鰇魚糜ê滋味》真正的芳頭。

2025年台灣電影討論上濟的應該就是《大濛》矣，以白色恐怖時期做背景，講一个查某囡仔對嘉義到台北為欲領阿兄予政府銃殺的身屍，一路的種種過程，除了古錐好笑，嘛有使人毋甘佮感動甲流目屎的站頭，毋過電影內底幼點濟濟，你敢有看透？這集邀請歷史類Podcaster《敘事圈》的阿諺來開講，做伙討論《大濛》內底的阮所看著的幼點，猶有關係白色恐怖背景的電影到底愛講到偌深才是適當，電影看煞、節目聽了，咱做伙來想看覓。

無論是疫情、天災或者是舊(2025)年底的無差別殺人案這款咱無法度預防的事件發生，時常會造成規个社會的集體創傷，咱會變甲足無定著、真燥性、真齷齪(ak-tsak)，其實這攏有可能是這款心理創傷所引起的反應，咱為著欲安搭家己，會想欲得著閣較濟資訊予家己安心，毋過佇社群平台時行的這馬，你敢知，一直掰手機仔看社群資訊，有可能顛倒會引起二次傷害？！這集邀請諮商心理師阿寶來做伙討論關係集體創傷佇社群時代的應對方法。

過去台語定定予人誤解是濟歲人才有咧講，現此時毋但少年人有咧講台語，而且有愈來愈濟人毋過有心講台語、學台語，閣會透過現代人時行的方式共學台語的鋩角，或者是生活中的大大細細事物的台語詞，推捒到可能的收眾面頭前，這款做法的成果閣不止仔有效。佇社群平台Instagram面頂透過Reels(短影音)功能來講台語、湠台語的「阿銘講台語」就是其中之一。

「阿銘講台語」才推出無偌久，21支Reels就吸引4萬外人追蹤，有的影片甚至有百外萬遍的收看，伊到底是按怎做的？敢有啥物鋩角通好想欲經營社群口座的人通好學起來的咧？毋過落勾這集節目！

這幾年嘉義好食好耍愈來愈時行，文化發展是閣較奢颺，這回邀請在地人，同時是非洲鼓樂團嬉班子的團長江鳥，來介紹予逐家較無了解的「新港」食食，猶有逐家傳說中的「涼麵+白醋」、「橋仔蜜+豆油+薑」的神奇組合，江鳥甚至講出外埔頭綜合果汁竟然無咧摻○○，原來綜合果汁猶有這款精差？

同時咱嘛𤆬聽友做伙來熟似嬉班子這个真特殊的在地鼓樂團，非洲鼓配台語聽起來是啥物感覺？這个團行過二十冬，又閣是按怎堅持落去？後回欲去嘉義𨑨迌，沿路會使那放嬉班子的歌來聽，穩當有無仝款的趣味。

「真‧台語怪物」來啦！對應前一陣仔的Youtube時事話題「中文怪物」佮threads頂頭的「死語運動」，人(就是伊家己)稱藏書界的「竹野內 豐」黃震南老師佇網路頂開出二張「台語怪物」網路試題，考倒一片台語高手，這回亞特聯手震南老師，推出攏總三集「台語怪物全破解」，毋但解說答案，猶有各種補充佮對照，予你三集聽了，台語Level Up Up Up↑

本集解題： 
✪清氣小姑碗崁屎
✪海瑞兵，會食袂相舂
✪牡丹的寫批，慘的加落寡
✪催命鬼，看做註生娘娘
✪袂輸魏延咧
✪袂輸呂蒙正
✪城隍爺的頭殼，你也敢挲
✪孔子公毋敢收人隔暝帖
✪蔡牽造炮炸家己
✪阿媽袂認得阿祥
✪文王拖車
✪食碗內，說碗外
✪俄羅兵，德國銃
✪程咬金三日皇帝
✪羅漢請觀音
✪呂洞賓，顧喙無顧身

「真‧台語怪物」來啦！對應前一陣仔的Youtube時事話題「中文怪物」佮threads頂頭的「死語運動」，人(就是伊家己)稱藏書界的「竹野內 豐」黃震南老師佇網路頂開出二張「台語怪物」網路試題，考倒一片台語高手，這回亞特聯手震南老師，推出攏總三集「台語怪物全破解」，毋但解說答案，猶有各種補充佮對照，予你三集聽了，台語Level Up Up Up↑

本集解題： 
✪趙子龍欠馬
✪食竹仔枝炒肉絲、食大封、食膨餅
✪驚死芋莖
✪毋通戇戇綴人去培墓
✪使用人
✪欶田螺
✪內條筋
✪共伊撈(hôo)起來滴水
✪一支跤毛管七个鬼
✪可憐的梅仔餅
✪䆀䆀仔仕相俥
✪佮孔子公諍字
✪海口仙
✪陳三磨鏡
✪菜礤姆仔

「真‧台語怪物」來啦！對應前一陣仔的Youtube時事話題「中文怪物」佮threads頂頭的「死語運動」，人(就是伊家己)稱藏書界的「竹野內 豐」黃震南老師佇網路頂開出二張「台語怪物」網路試題，考倒一片台語高手，這回亞特聯手震南老師，推出攏總三集「台語怪物全破解」，毋但解說答案，猶有各種補充佮對照，予你三集聽了，台語Level Up Up Up↑

本集解題： 
✪摃狗毋出門
✪六跤長鬚
✪你曷毋是林本源
✪這馬是咧陳三磨鏡，抑是英台哭兄？ 
✪硩貓岫
✪peh-jiáu-ue
✪咱人
✪頭毛有臭雞酒味
✪飽水
✪七里香，盤出牆
✪束樹奶--ê
✪斷半仙
✪坐(tshē)毋著

少年廟公繼續環台濟世！頂一集咱講起少年廟公按怎看待修行，猶閣有按怎做一个「自由廟公」了後，這集咱正港欲來環島修行濟世途矣，聽廟公講，伊的環島時常是神明旨意欲解因果，毋過這幾逝環島修行路，伊解了啥物因果？又閣拄著啥款怪事？有時廟公替神明做領隊，有時好親像就會當摸飛(moo-hui)？這集亞特專工請少年廟公推薦平常時真值得去行行兼拜拜的廟宇，趕緊來聽伊會介紹啥物廟！

少年廟公來央廣濟世矣～！佮過去刻板印象認為廟公攏是有歲人無仝，少年廟公楊庭俊猶真少年就咧廟內服務，離開了後竟然閣變成「自由廟公」？！這个「自由」是按怎來的？無固定服務的廟敢會用得講是「廟公」？行上環島濟世步步修行之路的廟公，沿途會搪著啥物代誌？出冊了後讀者有回饋，想袂到神明嘛會有交代？是講廟宇界的「愛哭團」佮神明界的「支持團體」到底是怎樣一回事……？

節目播出的隔工11/29就是成大「全民台語認證」的考試日囉！毋知聽友敢有人去赴考咧？亞特先祝福有去考試的聽友，逐家攏提著心目中的好成績。

是講無論是教育部的抑是成大的台語認證考試，對你來講上困難的是佗一款題型咧？聽講有真濟人佇「口說」方面有較食虧，因為口說考試的型式是看圖講故事，對猶無遐爾慣勢以台語思考的朋友來講，欲雄雄就講出故事無重耽，確實是無簡單。今仔日這集介紹一本會使當做考試工具冊，嘛會使當然日常訓練、以「伊索寓言」做主題的冊，其實若是以亞特來看，這本冊嘛會使當做是練習台語家庭的家長講故事予囡仔聽的基礎訓練冊喔！

是講，亞特佇節目內底有分享一个應對台語口說考試的鋩角，只是……敢若無蓋實用……？

紅色、藍色、青色你會曉講，毋過「薰衣草紫」、「青蘋果綠」、「天空藍」台語欲按怎講？畫圖的工夫像「構圖」、「透視法」又閣按怎用台語表達？市面上現此時出現一本主打「用台語學藝術」的繪本《哎呦喂啊！愛用畫的》，圖面是今上時行的「台灣感性」風格，也是在地日常風景，聽講繪本閣有種種機關，幫助囡仔看繪本學藝術閣練台語？這集邀請發起繪本計畫的「畸零地工作室」成員孟榆佮以臻，來開拆這本台語繪本機關何在。

這幾年時行講「台灣干焦海產文化，無海洋文化」，毋過你敢誠實了解「海產」？無論是掠的抑是養殖，咱常在是「食魚煞毋捌魚」，這集邀請海洋大學水產養殖系副教授、《好好吃魚》作者黃之晹來分享全台各地的海產特色，台灣定看的魚仔，你聽過幾款？閣食過幾款咧？這集聽了，揣機會行入市仔的魚擔，來熟似一下仔家己生活當中捷看著的魚仔啥款？

這幾年愈來愈濟出名動畫配做台語版，而且風評攏真好，《派對咖孔明》的台語版拄出來的時，甚至閣引起網路頂真大的討論，這集邀請著台華雙語配音員葉又菁來分享伊的台語配音經驗，猶有台語配音的現場指導又閣是咧創啥？你敢有看過佗一齣台語動畫？咱做伙來聽看覓，台語配音啥款鋩鋩角角？

AI(人工智慧)愈來愈進入一般人的生活，目今咱無論掰手機仔、翕相、穡頭，甚至安排國內、外旅行攏有AI的影跡，毋過你的AI是人工智慧，抑是工人智慧？這就看你按怎共伊「牽教」矣。這集邀請著AI的專家、泛科學院Youtube頻道主理人「AJ莊哲昀」來節目開講，用上簡單的比喻，快速建立咱對AI的理解，同時嘛提醒咱，AI生產的物件愈來愈濟，網路消息真真假假，咱該愛如何面對未來的AI世界，按怎敢伊和平相處？

>>>泛科學院Youtube頻道

接續頂一集講台語學校，這集來關心學校放冬的時，家長會使共囡仔㧒……我是講……「安排」去佗位，才會用得消耗囡仔的體力，閣有收穫，袂規工佇厝閒仙仙，時間攏拍損去，閣會使予囡仔放假期間過了會歡喜、爸母嘛通歇喘，「營隊」是目今上時行的選擇，毋過營隊主題百百款，對台語家庭來講，敢有彼款會使學物件、會使耍甲忝歪歪，閣會使用台語來參加的營隊咧？台灣台語路協會直接揣營隊專門戶來合作，理事長力玄所介紹的營隊，和亞特家己都想欲去參加！「啊～～足想欲轉去囡仔時～～」

2025年9月1號起，高雄路竹的北嶺國小正式轉型做全台頭一間台語實驗小學，毋但引起真濟台語家庭的注目，也確實大大提升招生人數；同時也引起其他縣市台語家庭的討論，希望家己所在的縣市也會當設立台語小學。

到底台語小學是咧學啥？敢是有較濟台語課？抑是用台語咧上課？台語敢有法度用來上各種課？學校又閣會拄著啥款困難或者質疑？這集邀請台灣台語路協會理事長，同時也是台語家庭母親的董力玄，𤆬咱做伙來了解台語學校，嘛了解台語家庭的需求佮困境。

號稱「上緣投乩身」，閣是演員、閣是歌手的黃新皓(阿皓)來「告白」！佇出名本土劇《戲說台灣》演出田都元帥煞來衝紅的阿皓，毋但演神明，閣是自細佮神明有好交情！本底出道欲唱歌的阿皓，是按怎煞變成演員？而且一搬就是十偌年，毋但去到中國演出古裝的「籠面戲(偶像劇)」，轉來台灣嘛是戲路無停真無閒，踅一大輾煞又閣回到當初時上想欲做的歌手身份，這回推出專輯《新の告白》，聽講閣是佮神明先撨好勢的？阿皓講神明捌共伊指示：「成功著愛行遠路」，到底啥意思？做伙來聽神明的話按怎破解。

鹿港阿愷來矣！這回以Podcast頻道《阿愷之聲》入圍廣播金鐘獎Podcast獎項，聽講煞變做「鹿港之光」，久無聯絡的親情、朋友攏來祝賀、在地媒體報導、政治人物嘛來介紹，入圍了後的阿愷，佇鹿港的生活有啥款改變咧？若誠實有機會上台領獎，敢有想好致詞欲講啥？來聽看覓阿愷按怎講。

Facebook>>>阿愷之聲Podcast
Instagram>>>阿愷之聲Podcast

你敢看過來日本式的答喙鼓－「漫才」表演，台灣各地現此時有愈來愈濟漫才團體出現，其中上影目的團體之一，就是舊年才成立、由「表妹」佮「胡迪」二人所組成的「妹迪 IN TAIWAN」，二人毋但台風在、「(劇)本」好笑，閣較是台灣少數用台語講漫才的團體，in 的演出影片佇囥起去Youtube頻道，就隨隨引起真濟關注，in 的名是按怎來的？又閣是按怎會行這條漫才之路？台語佇漫才內底的意義是啥？這集咱做伙來熟似二位未來佇漫才領域穩當大出擢的「明日之星」。