國立臺灣戲曲學院推出《金銀天狗》來致敬「拱樂社」，拱樂社是啥？聽講伊毋但是一个歌仔戲班，閣會拍電影、閣有演員培訓學校？！1954年頭一齣台語片《薛平貴與王寶釧》正是拱樂社的頭一齣電影，也自此開啟台灣的台語電影黃金時代。《金銀天狗》是拱樂社的第二齣定本歌仔戲，嘛有推出電影作品，毋過這齣有10本的戲齣，欲按怎佇現代的舞台來呈現咧？來聽製作人林顯源按怎講。

你敢知影歌仔戲古早無論男女攏是查埔人搬的，後來時代演變沓沓仔才有愈來愈濟女性進入歌仔戲班，彼時猶是男女分明，時代閣再轉變，才有查某人做小生的「坤生」出現，而且坤生出現了後大受歡迎，才成為歌仔戲目前的主流，若按呢由查埔人搬小旦的「乾旦」咧？國立臺灣戲曲學院研發長林顯源就是歌仔戲界內底目前真罕見的乾旦，查埔人欲按怎搬小旦？敢有啥物困難的所在？又閣為怎樣當初會選擇做小旦？這集咱做伙來了解乾旦佇歌仔戲內底到底是啥款存在。

結婚證書到底愛有「有效期限」無？毋但日本早早就開始討論「熟年離婚」的話題，同樣是亞洲國家的韓國佮台灣，各自攏有熟年離婚的話題，毋過離婚的原因佮法規、政策的應對，煞閣有隨人家己的作法，你敢知佇日本，人死你猶是著辦離婚，才會當「田無溝，水無流」喔！韓國針對公務人員，也有提出予另一半會當「安心離婚」政策，若按怎，台灣又閣是怎樣一款情形？這裡咱來比較三个國家的熟年離婚，做伙看覓社會是按怎有這个趨勢，又閣按怎來面對。

舊例講「初二轉後頭」，這个例到底有偌舊？敢講猶未到初二就袂用得轉後頭？傳說中若提早轉後頭，會犯著各種禁忌，到底有啥禁忌？又閣該按怎破解？這集亞特佮佑仁做伙對社會結構的角度來破解初二轉後頭的風俗佮禁忌，而且提出一寡仔過年的新做法，希望無論啥物性別的聽友，攏會當日後過年過著愈四序。

這集播出的時間離過年賰無幾工，亞特來讀聽友寄來的光批，佑仁來讀聽友提出的問題，是講怎會講講咧，磕袂著就講對「過往」、「往生」去咧……？原來有聽友提出「這款」問題……

你敢有參加過性別 phá-thih(party)？這是現此時真時行的活動，由準備欲做爸母的翁仔某主辦，邀請親情朋友來參加，佇 phá-thih 當中公告阿母腹肚內囡仔的性別，而且接受眾人的祝福。

聽起來袂䆀？感覺真溫暖？其實這款 phá-thih 無論佇國外攏已經搪著濟濟爭議，較輕的只是辦活動的消費糾紛，較嚴重的甚至有出人命，到底 phá-thih 是按怎會造成災難？翻頭來看，以未出世的囡仔的「性別」做 phá-thih 主題，可能會有啥款問題？來聽亞特佮佑仁做伙討論。

民歌尾聲時期簽入去當年出名的唱片公司「滾石唱片」，發行一塊華語專輯了後就無聲無說，放棄歌唱夢，改途做別行的「阿季(王秀如)」，時隔三十年，佮囡仔做伙去看金曲獎頒獎典禮，煞看甲目屎流目屎滴，查某囝一句「你現在最年輕」是啥款意思？三十年來連想都毋敢想的夢想之火，是按怎會閣著起來？欲重新做一个歌手，會有偌濟阻力？阿季的阿爸又閣為按怎罵伊「背祖」？這集聽煞，咱做伙來找揣夢想的火種。

聽講現此時佇日本，放尿的時會坐佇馬桶頂懸的男性已經超過五成矣，毋過佇台灣這款慣勢好親像有較少？你是坐咧放抑是徛咧放咧？根據研究，坐咧放有一寡仔徛咧放無的好處，若是知影這寡仔好處，你敢會想欲坐咧放？有的人感覺查埔人坐咧放尿實在無夠Man，敢誠實是按呢？這集的小故事凡勢會使提供無仝款的思考，曷若亞特佮佑仁是徛咧放抑是坐咧放咧？聽節目你就知。

日本電影《國寶》佇台灣引起濟濟討論，真濟人攏呵咾伊足好看，毋過這齣以「歌舞伎」做主題的日本文化電影到底好看佇佗？咱會使看著啥物鋩角咧？看過電影的佑仁佮猶未看過電影的亞特做伙來討論，想盡辦法佇莫「煏戲文」的情況下，來討論電影的精髓，而且閣提來佮台灣的傳統表演藝術歌仔戲做一寡仔趣味的對照，你敢知，原來這二種戲種，有真濟相仝的所在？

講起聲樂，咱可能上捷提起的就是「三大男高音」，你敢有想過「若按呢，女高音咧？」、「除了高音，其他音域的聲樂歌手敢若攏無聽過？」原來聲樂領域有真大的男女性別比例差，就算是仝一性別，屬於無仝音域的人，人數嘛有精差，這攏大大影響著聲樂歌手會當「出擢」無的機會；對國外學聲樂畢業的女高音聲樂家施璧玉，佇求學過程無搪著傷濟性別議題，煞顛倒是轉到台灣才受著真大的衝擊，伊講伊有身的時坐計程車，共司機講欲行佗一條路，司機竟然共伊應一句「查某人遐爾濟意見欲創啥？！」這到底是啥物情形？共聽落去就知影。

人類圖到底是啥貨？對人類圖會使看著一个人的啥咧？敢是過去佮未來？抑是人的個性佮身體健康？人類圖佮咱定定聽著的MBTI、星座、八字又閣有啥物無仝或者相仝的所在咧？這集邀請同時是女高音、劇場演員，閣較是人類圖研究者的施璧玉，除了解說人類圖是啥、按怎看以外，嘛來共亞特佮佑仁「合圖(kap-tôo」，看阮二人做伙主持節目到底會合無？上要緊的是新的一年，台灣社會的運勢又閣是按怎咧？聽落去就知！

閣一禮拜就欲對2025年迒入2026年矣！你敢有去參加過「迒過年」的活動？講著迒過年，幾年前一位網友罔做耍佇社群平台發起「在大安森林公園一邊哭一邊跨年」的活動，想袂到活動竟然愈做愈大，毋過你敢知這个活動的配圖，甚至是這个活動的名，其實攏是出自一齣電影《愛情萬歲》，而且這个活動舞甲導演佮演員攏來參加矣？！

另外亞特嘛想起捌參加過一場倒踏算到一半，鐘仔煞害去的迒過年活動，現場到底發生啥物代誌咧？佑仁嘛分享較早佇○○大學讀冊的時，學校竟然是對12月25開始放假到迒過年？！到底是佗一間學校遮爾使人欣羨？

做人阿母的丁寧佇查某囝佮阿母的角色之間切換，欲按怎重新面對「關係」這件代誌，丁寧用啥物方式佮阿母互動，才會用得佇阿母過身的時，感覺「無遺憾」？家己做阿媽的角色又閣予伊得著啥款人生養分，會使投射佇演出內底？是講演員的感情收佮放，有影有厲害，比論講，伊佇連續劇《拜六禮拜》內底佮談戀愛的對象，竟然是拄見面頭一工，就愛搬「眠床戲」？！閣較濟真實的丁寧佮演員生活，攏講予你知。

本集音樂：《這該死的拘執佮愛》，珂拉琪

--

果陀劇場《#深夜小狗神秘習題》2026即將解謎
ᴛʜᴇ ᴄᴜʀɪᴏᴜꜱ ɪɴᴄɪᴅᴇɴᴛ ᴏꜰ ᴛʜᴇ ᴅᴏɢ ɪɴ ᴛʜᴇ ɴɪɢʜᴛ-ᴛɪᴍᴇ🐾
5/29-5/31　臺北｜城市舞台
6/20-6/21　高雄｜衛武營國家戲劇院
7/25-7/26　臺中｜中山堂
8/01-8/02　桃園｜桃園展演中心

購票：https://s.opentix.life/p/P5ab6c19c

你敢猶會記得彼个歹鬥陣閣酷刑的惡魔頂司Miranda Priestly，猶有彼个可憐、毋知家己未來的助理(Andrea "Andy" Sachs)佇鑠奅的時行產業雜誌的故事？經過20年，這齣彼時大葩尾的電影放出欲出第二部的消息矣！為著替逐家恢復第一部的記持，到時第二部出來毋才看有，亞特佮佑仁欲𤆬聽友來了解20年前這齣電影的鋩鋩角角佮幼點，嘛做伙來複習電影內底的角色所講出來的經典金句！

準備好矣未？惡魔來囉～！

台文繪本作家黃怡華推出《阿媽哪會變按呢？》與《阿公豹𤆬我去讀冊》二本繪本，記錄伊對阿公、阿媽的觀察，也有伊佮阿公阿媽的互動，佇伊的冊內底，阿公變做阿公豹，阿媽煞變做貓頭姑，到底是按怎咧？亞特請怡華換用二款果子來形容阿公阿媽，伊會提出什麼果子來形容咧？佑仁嘛分享伊細漢時對阿媽記持真深的一件使人感動的代誌，你佮阿公阿媽感情啥款？敢有予你真感心的記持咧？

今年10月，佇PTT頂頭有人分享家己的韓國女同事咧怨嘆「台灣的查埔囡仔足臭，公共場所攏總是查埔人的臭汗酸味。」佇網路社群引起濟濟討論，台灣網友有的表示贊同，有的替台灣查埔人講話，講台灣的氣候本底就較熱、較漚翕(àu-hip)，這集亞特佮佑仁來討論讀冊時陣的「氣味」困擾，猶有一寡仔佮體味、猶有佮使用「芳水」的動詞有關係的台語詞，只是……按怎會節目一開場，亞特就走去鼻佑仁的頷頸……？？？

女同志暗話第二集，咱沓沓仔行入深水區，來學習閣較「深入」的用詞。

女同志佇網路頂「招拗跤(約砲)」會按怎講？磨豆腐、磨鏡又閣是咧磨佗位咧？啥物款人是「歐蕾」？又閣是啥物標準，予亞特認為這个社會對「年歲」真無友善？佑仁、亞特佮阿草攏共同贊成的伴侶講法又閣是啥？……資深南台灣小姑娘阿草，𤆬咱行入神秘的女同志世界。

女同志的世界對大部份人來講攏真神秘，女同志的自我分類有佗幾款？「拉子」這个名是按怎來的？T、P是啥意思？鐵T、奶T穩當佮「大學T」無關係，P是按怎閣有純佮無純的差別？(曷毋是咧買蜂蜜抑是牛奶)，遮的代稱佮女同志之間的「眠床代」敢有啥關連？這集邀請著「資深女同志」阿草來解破迷津，佑仁對男同志的角度來看女同志有啥物無仝？亞特提供暗話的台語版本予聽友做參考，是講……怎會講到落尾，佑仁佮亞特二人攏講這集實在是「資訊量傷大矣啦！」……@@？

你敢聽過DEI(diversity, equity, and inclusion)，DEI是「多元、平等、包容」的英語合稱，伊閣定定會佮另一个名詞囥做伙：「政治正確」。

政治正確╱DEI是這幾年影視作品內底真受到注重的話題，無論是種族抑是性別議題，時常會予人佇各種作品內底提出來討論，比論《小美人魚》真人版的女主角人種，或者濟濟電動遊戲內底的人物設計，毋過到底按怎做才號做符合DEI？是按怎DEI愈來愈變做眾人反對的概念？這集亞特佮佑仁對仝款佇Netflix上架的作品，動畫《超Q特攻隊》佮戲劇《今際之國的闖關者 第三季》來做討論佮對照。

囡仔欲綴啥人姓敢有遐爾要緊？－－佇台灣，對大部份人來講恐驚是真要緊。

你敢知？2007年開始，法律規定囡仔出世報戶口，欲綴爸母佗一方的姓，是愛「雙方協議」而且提交二人攏簽名的同意書才會用得，毋過新法經過18年，囡仔綴阿爸佮綴阿母姓的比例敢有改變？雙方到底精差偌濟？這集咱來對囡仔綴啥人姓，破解台灣的「姓」別玄機。(猶有亞特的家族姓大公開喔！)

出名的母嬰用品品牌「媽媽餵(Mamaway)」佇8月份發出一支Reel影片講配方奶的問題，煞隨隨佇網路著火燒，真濟人譬相講影片為著欲鼓勵人飼母奶，煞共配方奶講甲無一塊好，這款行為可能會造成無飼母奶的阿母，受著真大的社會道德壓力。到底母奶敢誠實遐爾重要？飼母奶、飼配方奶欲按怎選擇？又閣愛注意啥物幼項？這集邀請彰化基督教病院婦產科醫師莊羽豊，以一个醫師，同時也是一个阿母的角度，來分享伊的看法。就像佑仁佇節目中講的，毋但有紅嬰仔的阿母愛聽這集，所有朋友攏應該聽這集，思考咱敢會無意中對有紅嬰仔的阿母，有傷濟無必要的期待佮要求？

>>>莊醫師今天不裝醫師-婦產女醫莊羽豊

上「痟」的金曲歌后李竺芯專訪第二集，這回關心的議題對阿母，轉到家己身上，來關心家己的身體變化佮情緒之間的關係，佑仁(佑仁娜)對〈荷爾蒙〉這條歌出發，來討論女性面對月事的種種心情佮變化，也討論著女性的情慾書寫，遮的話題佇過去一直無受著重視，這回透過李竺芯的經驗佮角度，猶有佑仁、亞特佮竺芯的對談，來重新關注這个議題。(講是按呢講，話題有時至講落去到底就會開始走精🤫)

Facebook>>>李竺芯 Siri Lee
Instagram>>>李竺芯SiriLee

Rti腦癢央（@rti.nownow）分享的貼文

Rti腦癢央（@rti.nownow）分享的貼文

金曲歌后李竺芯來矣！這回佑仁化身「佑仁娜」，佮亞特做伙訪問新科歌后李竺芯，本底明明是討論歌曲的創作概念，是按怎會走精對「阿媽的眠床跤毋知敢會藏一支啥？」咧？而且主角敢若對歌后，變成歌后的金主aka阿母aka鳳娟姐，主題嘛變成「阿母的成名之路」去矣？？

李竺芯認證，伊參加過的「上痟的廣播節目」就佇《天頂半節虹》，到底是痟佗一胎的？你聽落去就知影。

Facebook>>>李竺芯 Siri Lee
Instagram>>>李竺芯SiriLee

Rti腦癢央（@rti.nownow）分享的貼文

Rti腦癢央（@rti.nownow）分享的貼文

講著演員「丁寧」你會想起伊的啥物作品咧？敢是電影《孤味》內底的「蔡阿姨」？抑是影集《拜六禮拜》內底的「楊世美」？想袂到亞特一開頭竟然就講起伊對丁寧的印象是「檳榔西施」？！而且是1997年(倚欲30年前！)的一齣戲《大姐當家》。

原來丁寧對這齣戲嘛是印象真深，毋但是伊拄踏入演員這途所接的戲，而且佇片場閣予眾人罵甲無一塊好？！29年前到底是發生啥代誌？是按怎伊閣著對每一个現場工作人員說多謝？甚至連導演的女朋友也著共說多謝，聽甲佑仁強欲擋袂牢？！行過欲三十年的演員路，丁寧的變佮不變，佇節目內底講予你知。

本集音樂：〈等你腳步聲〉林晏如(連續劇《大姐當家》片尾曲)

--

果陀劇場《#深夜小狗神秘習題》2026即將解謎
ᴛʜᴇ ᴄᴜʀɪᴏᴜꜱ ɪɴᴄɪᴅᴇɴᴛ ᴏꜰ ᴛʜᴇ ᴅᴏɢ ɪɴ ᴛʜᴇ ɴɪɢʜᴛ-ᴛɪᴍᴇ🐾
5/29-5/31　臺北｜城市舞台
6/20-6/21　高雄｜衛武營國家戲劇院
7/25-7/26　臺中｜中山堂
8/01-8/02　桃園｜桃園展演中心

購票：https://s.opentix.life/p/P5ab6c19c

你敢知啥號做「唸核仔經」？啥物款人會唸核仔經？啥物款人又閣會予人對伊唸經？這个詞源自英語的「mansplaining」，也就是man+exlaining，又閣號做「男性說教」。男性是按怎會說教？又閣是按怎會專門對女性說教？這遍邀請著出名台語樂團「青虫aoi」的主唱「吉尼」來分享伊予人「唸經」的經驗，聽講毋但是歌曲創作方面會有人來指教，和運動「mooh石(抱石)」嘛會搪著有人來唸核仔經？！這集咱做伙來破解「唸核仔經」背後的權力關係！

Facebook>>>青虫 aoi
Instagram>>>青虫 aoi

台澳同性婚姻的台灣代表－芋圓來矣！台灣2019年起，通過同性婚姻法，毋過你敢知？同性婚姻欲成，也著看「母國是佗一國」！來賓芋圓佮澳洲翁婿是啥款感情路？結婚敢有順序？丈姆看澳洲囝婿聽講是愈看愈意愛，本底欲認真討論同性婚姻牽涉外國人的法律，想袂到煞講去芋圓的房間代？而且芋圓講伊「一直咧癢」，到底啥意思？你共伊聽落去就知。

Facebook>>>芋圓字典 Taro Dictionary Ō͘-îⁿ
Instagram>>>芋圓台語字典 ō͘-îⁿ

你敢是厝內的大漢查某囝？敢會定定感覺有身為大漢查某囝的壓力佮期待？遮的壓力佮期待是啥人予你的？社會？家庭？爸母？抑是……你家己？「你著愛做予小弟小妹看」、「小弟小妹較毋捌代誌，你按怎無共看予好？！」、「你是阿姊當然著鬥相共厝內」，弟妹細漢你愛顧，爸母老矣你愛顧，敢若全世界攏愛你照顧，若是你的身佮心破病矣，啥人來顧？

這集邀請《長女病》作者張慧慈(小花媽)來分享伊的家族經歷、長女病敢是一種社會遺傳？伊閣收集著啥物無仝款的長女病個案，長女以外猶有啥人可能會致著這款「病」？亞特、佑仁佮慧慈咱來講透機。

同志繪本無稀罕，同志繪本變成手機仔APP就較稀罕矣！有一間公司共同志故事做成會當互動的手機仔APP，有媠媠的圖面佮安搭人心的溫暖故事，聽過會做這个APP，愛對2018年彼場公投講起……

是講手機仔APP佮實體店家有合作這咱會當理解，合作出來的調酒是牛肉麵口味就……？？？這到底是摻酒的牛肉麵，抑是摻牛肉麵的酒？你聽落去就知！

12年前，已經參與劇場演出的佑仁，佇台頂演出孤腳戲(koo-kioh-hì，獨角戲)，伊的爸母坐佇台跤，這齣戲搬演伊20外年來的心境、伊的性傾向佮身份認同，也就是伊的故事。

佑仁的爸母欲按怎理解伊的出虹(tshut-khēng，出櫃)之路？這條行二十外年的路，又閣有啥款風風雨雨佮耐心舖排，家庭內的愛有時會是傷害，因為，咱攏猶咧學習理解。

Rti腦癢央（@rti.nownow）分享的貼文

※本集含有男同志情慾用語討論，請斟酌收聽。

--

「一開場咱就欲進入姿勢的討論矣是無？」

「1號0號」、「年下攻」、「回鍋肉」……遮的男同志箍仔內的暗話到底啥意思？台語敢有家己的講法？這集亞特佮佑仁邀請Youtuber「夫夫之道」的里歐來鬥贊聲，替咱解說男同志箍仔內的一寡仔暗話，嘛做伙來討論台語會使按怎講，正港欲做到予台語會當講萬事……雖講這集話題實在有較鹹淡薄仔……毋過阮攏是抱持研究的心情咧討論喔～

查某囡仔去做兵！

講著做兵，咱頭殼內出現的大概攏是查埔人的代誌，學長學弟的階級制度、國防武器佮兵員的訓練，查埔人定定講起做兵彼當年，就會用得一會(huē)就會袂離。毋過查某人做兵是啥款情景？敢有通較輕可？抑是顛倒受著不公平的對待？咱刻板印象當中的女性從軍，佮實際情形敢有相仝？曷若這个女兵閣是一位女同志身位，代誌敢會變甲閣較複雜？這集咱對捌做過自願役的Cony的角度，來看彼當時的女兵困境。

你敢知影佇網路頂當咧風火著的「中國紅姊」事件？這是一件發生佇中國的性影像犯罪佮外流事件，毋過因為內底牽涉變裝做女性的男性(而且打扮起來猶是……嗯……)「紅姊」，佮其他超過一千六百名男性(而且其中袂少外在條件袂䆀)，予這件代誌佇網路頂隨隨變成一款笑詼話題。

台灣的變裝網衝「UG」幾若遍予迷眾要求變裝做「紅姊」，毋過UG煞提出伊無願意變裝做這个角色的理由……一个眾人感覺好笑的事件，敢誠實單純干焦好笑？性影像犯罪佮外流發生佇男性身上敢就無要緊？UG佮主持人之一的佑仁二人攏有變裝經驗，二人的變裝初衷佮原則是啥？這集咱來對「紅姊事件」講到「變裝的原則」。

是講……怎會講講咧煞出現《新白娘子傳奇》？！

台語嘛會當寫BL(Boys' Love)小說？而且閣是高中校園愛情故事？純純的愛按怎表現佇台語的聲嗽內，作者鈺凰講伊咧寫小說的時就親像角色佇耳空邊講話仝款，毋過按呢猶無夠，伊閣親身做導演，揣演員來做讀劇會，予冊內底的一賢佮阿清，就徛佇你面前，而且最後一幕猶有……噓♥♥

甘蔗隨目齧，好酒沉甕底，〈台語俗諺內底的性別玄機〉來到下半集，這集閣較鹹閣較薟，予你一改就飽佮醉！同樣是佑仁來講、特別來賓宜蘭來臆，亞特來解說，是按怎這个組合會出現「亞特是好燒腸(sio-tshiân，「香腸」的宜蘭講法)」佮「食過的攏呵咾」這款話？！聽友請毋通佇食飯時間聽這集，哽著、嗾著(tsa̍k-tio̍h)無負責喔！

注意！這二集當中的俗諺佮背後的意義咱愛知，毋過毋通凊彩提來用喔！

劇場演員余品潔下集，這回咱對「行動員」講起，阮劇團二十外年來沓沓仔思考、檢討，發展出來家己的論理系統，彼是戲劇的美學，嘛是做一个劇團的行動方針，品潔是按怎解說「行動員」的意義？又閣按怎設想劇團的未來生做啥款？除了佇阮劇團，前一站仔伊嘛去參與飛人集社的作品《藏畫》，搬演陳澄波先生的夫人張捷女士，做一个佇嘉義大漢、愛嘉義的人，按怎佇演出當中面對發生佇平時活動空間的過去所發生的人物的創傷、儼硬佮日常？參加這齣戲的演出，又閣按怎予伊回想而且對照著細漢時看著課本記載的歷史彼時的感受？這齣戲佇嘉義演煞了後，品潔講「我感覺我對我大漢的所在有一个小小的交代矣。」節目聽煞，換咱思考，按怎做會予家己感覺對故鄉「敢若有淡薄仔交代矣。」

本集音樂：〈慢且〉青虫aoi

※特別感謝青虫aoi授權使用〈慢且〉demo音樂，以下是〈慢且〉創作源起：

2022年3月25日 我看到一篇關於 陳澄波先生遺像的文章，照片後的故事深深觸動了我。文中首次揭露 陳澄波遺像背後的故事。當時因政治局勢緊張，無人敢出借擔架，最後陳的家人只好拆下家中門板將他的屍首運回。 當時陳澄波的妻子 張捷找了一位攝影師到家裡，為 陳澄波的遺體與衣服上的彈孔留下紀錄。該照片過去公開時曾經被裁切掉一個角落，被裁切的內容是 張捷蹲踞的背影。由於當年相機只能放在直立式三角架上使用，為了讓遺體呈現仰角以便攝影拍攝，於是 張捷蹲在一角，以蹲姿撐起門板。 照片後的故事深深觸動了我，尤其是 張捷在當時的情況下，為丈夫留下紀錄的堅強與藏畫的智慧，都讓我撼動不已。

Rti腦癢央（@rti.nownow）分享的貼文

Rti腦癢央（@rti.nownow）分享的貼文

來賓：宜蘭╱廣播人

統一獅外野手「台灣隊長」陳傑憲佇接受訪問的時，無張持講耍笑講出「厝若要興，某就要照三頓舂」，引起失言事件。其實佇各種語言內底，有性別刻板或者歧視問題的俗諺語攏真濟，有時講的人無意識著問題所在，長期落來對社會結構當中的性別無平等會有真濟敗害，對性別平權也是阻礙，相連紲二集，邀請關係性別平權議題的女性代表、廣播人「宜蘭」佮亞特、佑仁做伙，來破解台語俗諺語當中的性別玄機。

注意！這二集當中的俗諺佮背後的意義咱愛知，毋過毋通凊彩提來用喔！

Rti腦癢央（@rti.nownow）分享的貼文

平成歌姬「宇多田ヒカル」參加Youtube頻道《The First Take》，演唱出名的經典歌曲〈First Love〉佮新歌〈Mine or Yours〉，其中新歌內底一句「令和何年になったらこの国で
夫婦別姓OKされるんだろう」(著到令和幾年這个國家夫妻別姓才會予人講OK)，佇日本社會著火燒，引起濟濟討論，有人批評伊共政治紮入音樂，保守派認為這會破壞日本的傳統家庭價值，若少年人是普遍較支持夫妻別姓……是講，你敢知？日本的「姓」其實毋是「姓」，而且大部份現代日本人的姓，攏是到1875年日本政府頒發〈平民苗字必稱義務令〉了後才有的……這集，咱就欲對宇多田ヒカル事件講起。

來賓：謝若蘭 Bavaragh Dagalomai╱東華大學教授

大罷免運動當中的女性角色來到下半集，咱共視角放閣較大，來看過去咱認為女性的政治參與度較低，到底是佇啥款社會結構當中所產生，而且這款的認捌敢是事實？另外嘛來看對謝若蘭教授Siraya族人母系社會的文化角度，來比較傳統漢文化的男性社會，二者之間敢只是性別的對換？或者是這二款社會性別的分工概念，本質上來講就是無仝？佇這个大罷免運動的社會氣氛當中，無論支持反對，也無論男女，攏應當趁這个機會好好了解其中的性別思考。輕鬆閣有深度的討論，落勾無彩。

--

前往＞＞央廣臺灣台語迷眾頁
聽友來函：atlantis919@rti.org.tw

【面冊迷眾頁】

　＞＞亞特陪你káng台語
　＞＞佑仁

【Instagram】

　＞＞亞特陪你káng台語
　＞＞佑仁

來賓：謝若蘭 Bavaragh Dagalomai

自今年2月開始火愈燒愈旺的「大罷免運動」佇全台各地出現，同時咱也會當觀察著一个現象，彼就是佇大部份公民發起的罷免團體當中，「女性」的比例特別濟，根據報導，各選區罷團女性佔7-9成，事實上，咱也會使佇電視頂、網路頂看著真濟罷團發言人是女性，到底是啥款原因予女性佇「罷免」這个公民政治參與的運動當中，有遮爾重要的地位？同時，咱嘛會使看著罷團受到言語攻擊的時，也多數攏是只有女性佇擔位的時，這其中又閣有啥款性別議題？這集邀請實際參與罷免活動，而且專長女性主義謝若蘭(Bavaragh Dagalomai)教授，以伊的親身觀察、經驗猶閣有學術角度，來看這遍全台大罷免當中的「女性力量」。

--

前往＞＞央廣臺灣台語迷眾頁
聽友來函：atlantis919@rti.org.tw

【面冊迷眾頁】

　＞＞亞特陪你káng台語
　＞＞佑仁

【Instagram】

　＞＞亞特陪你káng台語
　＞＞佑仁

(應該是)台灣頭一个全台語的「性別議題」廣播節目上線囉！開播頭一集咱來看「2025性別圖像」，想袂到號稱性別平權亞洲第一的台灣這遍竟然輸予……「這个」國家？！後半段主持人之一的佑仁，來分享成長過程當中所搪著的性別認同議題，聽友聽煞，會記得留話/寄批共囡仔時的佑仁惜惜搭搭喔！

前往＞＞央廣臺灣台語迷眾頁
聽友來函：atlantis919@rti.org.tw

【面冊迷眾頁】

　＞＞亞特陪你káng台語 

　＞＞佑仁

【Instagram】

　＞＞亞特陪你káng台語

　＞＞佑仁

阮劇團的當家小旦余品潔頭一遍迒入影視界就入圍第60屆金鐘最佳新人獎，毋過佑仁煞無蓋認同這个獎項，原來是品潔佇劇場界早就是真資深的演員，伊的演技佇身為好朋友的佑仁眼內，用「新人」二字實在是無法度表現(是講總無用「老鳥」來形容嘛！)讀嘉女的時就參與劇團起造的品潔，大學讀的是北藝大戲劇系，畢業了閣轉到捌予人講是「文化沙漠」的故鄉嘉義經營「阮劇團」，是啥款思想、機緣，予伊離開演出機會較濟的台北，轉來到嘉義拍拚，欲佇嘉義做劇團，佮台北敢有啥無仝？是按怎會「親像政治人物咧選舉」？亞特又閣講出啥款「嘉義經驗」予品潔認同「你誠實踮過嘉義呢！」

咱定定認為劇場就是佇一个烏盒仔內底，看人佇台頂做戲，毋過品潔煞講「劇場其實是外口的代誌」，這个外口到底是啥款代誌？就聽品潔按怎講。

本集音樂：〈搬回家〉王彙筑&青虫aoi(吉尼)

Rti腦癢央（@rti.nownow）分享的貼文

查埔人決定欲行演員之路，會有啥款阻礙？這款定定予人感覺「無穩定」的頭路，對照男性時常予人期待「擔起一个家」的責任，欲按怎來排解？以影集《影后》大衝的「壁虎」黃迪揚搝開伊的秘密屜仔，欲共內底的滾絞敨心肝予你看，看一个演員是按怎決定行這條路，又閣按怎綿死綿爛行堅定行落去。

演員面對角色受著注目，敢會對日後接戲路有限制，抑是有好處？欲按怎接受角色可能比家己較出名，猶有演員路上的「貴人」會按怎出現？黃迪揚專訪後集，精彩閣溫暖，希望聽煞的你，會得著仝款的勇氣。

舊年佇《影后》當中扮演經紀人「壁虎」引起濟濟討論的演員「黃迪揚」來矣！迪揚講伊咧做「壁虎」這个角色的時，其實無刁工參考佗一个人做原型，是因為伊自細漢身軀邊就有袂少同志朋友，對伊來講無啥無仝，共這个角色演甲遮爾自然，是因為去看著人物本質當中佮眾人仝款的共通性。壁虎佇這齣戲內底有一句有名的台詞「我厝內永遠有濟濟充電器，因為我絕對袂使手機仔無電，毋過我從來毋捌問過家己『我敢猶有電？』。」做一个演員底當時會無電？無電了後又閣欲按怎充電？

時常搬演別人，共別人的特質囥佇家己身上的演員，有偌濟屬於家己的心情佮思考藏佇心內的屜仔底？黃迪掦專訪頂集，佮你做伙拍開演員的秘密屜仔，看見內底攏藏啥。

歌手身份的余佩真(阿真)佮演員身份的伊敢有啥物無仝的所在？若欲講，大概就是伊共家己對人的愛、對台灣的愛，甚至對世界的愛，用閣較直接的方法表現出來，《有美夢上讚》以一款「陰性的力量」彼款儼硬來面對困難佮愛，有因為陳澄波文化基金會董事長陳立栢先生的一句話來感動所欲表達的愛，有陪伴破病的阿母做伙面對困難的疼惜，就像阿真講的，「啥物時陣人會做夢？正是佇你感覺困難、辛苦的時。」也正是這个時陣，夢著做甲閣較媠，才有氣力拍拚落去，因為咱就徛佇「烏流、季節風佮北回歸線交會的所在」。

Rti腦癢央（@rti.nownow）分享的貼文

Rti腦癢央（@rti.nownow）分享的貼文

亞特主持生涯當中頭一遍去予來賓嚇驚著？因為公視學生劇展單元劇《神算》佮電影《流麻溝十五號》受著真濟注目的演員余佩真(阿真)，來到《天頂半節虹》佮佑仁、亞特做伙開講，分享做一个演員的種種辛苦，為著一个角色，到底需要做偌濟功課？甚至閣著逐工去徛佇急診室佮太平間門跤口看人世間的流血流滴、生離死別？！公開家己女同志身份，是怎樣的考量？伊閣按怎看待這个身份對演藝事業的影響？本底就佮阿真是好朋友、又閣同樣是演員的佑仁，對伊的角度來看阿真，又閣是啥款心情咧？精彩對話、好耍笑詼、剖心肝講心事，這集逐項有，千萬毋通落勾！

Rti腦癢央（@rti.nownow）分享的貼文

Rti腦癢央（@rti.nownow）分享的貼文