喺沙特哲學簡介（1），我哋提及到存在主義係為咗協助人恢復自我，而我哋亦都會見到沙特對於自由呢個概念非常著重。其實，沙特係用緊對自由嘅重新定義、理解，幫助人恢復自我。我哋可以喺《沉默的共和國》見到，沙特讚譽對極權說「不」嘅法國人，呢種向極權說「不」，係一種行動，而沙特哲學更想探討呢種否定，同自由之間嘅關係。

基於沙特對否定嘅重視，勞思光甚至將沙特稱為「否定哲學的哲學家」（「有人說沙特—《存有與空無》一書的作者——應該稱作「否定哲學的哲學家」，這是不算過份的。」（勞，頁88））若然話，笛卡兒嘅「我思故我在」，係用「懷疑」（「我思」）嚟作為佢嘅哲學嘅基石（詳情聽返笛卡兒嗰集），咁沙特就係用「否定」嚟作為佢嘅哲學嘅基石，因為佢認為人類最根本嘅活動，就係「否定」。我哋會喺正文慢慢講到沙特講述最根本嘅活動嘅引文。

今集，我哋會透過簡單對比唔同嘅西方思想點睇「nothing」呢個概念，以及沙特所舉出嘅著名例子——喺cafe見唔到Pierre，睇下沙特點睇「否定」，內容包括：

• 「荒謬與無有」：西方哲學喜愛透過理性分析研究概念，但沙特睇嚟唔覺得「荒謬」、「無有」係人可以靠理性捕捉嘅概念……
  
• 「對「存有」同「無有」之新解」：要明白沙特嘅創新，就要先明白傳統係點樣，我哋會簡單講講西方人原本點睇「無有」。仲會睇下沙特點形容喺cafe見唔到Pierre。以下分成兩個小部分：
  

1. 「空無」：勞思光特登將沙特嘅nothing翻譯成「空無」，我哋會用「見唔到Pierre」嚟解釋「空無」嘅意思。
2. 「存有」：沙特認為人係一種特別嘅存有，呢點，希望有機會用劉國英嘅作品補充一下。

按：勞思光會繼續用情意我，大家大致上可以以「有執著嘅主體（感受）」嚟理解先。

我諗住用《哲學的故事》簡單講講柏拉圖思想，當作者威爾・杜蘭講希臘嘅文化背景嗰陣，特登提到希臘嘅地理，但佢無講得好詳細。所以我就結合一位推廣歷史嘅學者，張宏傑嘅《世界史座標下的中國》，講講希臘地理同佢嘅「弒父精神」嘅關係；既然要講「弒父精神」，咁就要用埋佛洛伊德嘅《文明與缺憾》。今集內容分成四個部分：

1. 「地中海地理」：古希臘作家、歷史學家希羅多德講到，希臘係「一生下來就是由貧窮哺育的」，呢片貧瘠會引導希臘人走到邊度？

2. 「海上貿易」：海上、貿易，呢兩個情況點樣影響希臘人嘅文化性格？

3. 「神話內涵」：我哋會睇下佛洛伊德著名概念「伊底帕斯情結」嘅來源，一齊聽下伊底帕斯同希臘創世嘅故事。佛洛伊德仲用「殺父」說明希臘文明嘅發展。

4. 「斷裂與征服」：希臘文化嘅「殺父」並唔係終點，而係要從「殺父」走向征服，最終要征服乜嘢？

Music:

delicates

https://soundcloud.com/blue-dot-sessions/delicates

thread-of-clouds

https://soundcloud.com/blue-dot-sessions/thread-of-clouds

P C III - The Family Breaks (Creative Commons Instrumental)

https://soundcloud.com/pipe-choir-2/p-c-iii-the-family-breaks-creative-commons-instrumental

P C III- Snow Ticket (creative commons instrumental)

https://soundcloud.com/pipe-choir-2/p-c-iii-snow-ticket-creative-commons-instrumental

Cherry Heath

https://soundcloud.com/blue-dot-sessions/cherry-heath

呢一集，牛哥作為對心理學深感好奇嘅門外漢，邀請咗重量級嘉賓——《樹洞香港》嘅Peter。

樹洞香港 Podcast On Spotify

樹洞香港 Apple Podcast

呢次會訪問Peter對於心理學同哲學嘅睇法。兩人從心理學嘅不同學派發展，發現心理學與哲學呢兩門看似性格唔太相似嘅學科，其實有住「殊途同歸」嘅關懷——兩者都是為人展現一種「看世界的方式」。 難怪Peter會話，「要成為一個好嘅psychologist，一定要識一啲哲學。」 兩人亦討論咗喺成長過程中，學問（不論係哲學定係心理學）嘅角色，Peter更喺其中分享咗唔少閱讀心理學作品時候嘅心路歷程，萬勿錯過！

按：《樹洞香港》出咗個app 叫Mindforest，有興趣記得去試用一下！

上集嘅荀子我哋仲未解決點解荀子認為人能夠化性起偽，今集我哋會更深入去了解荀子可以點樣解答新儒家嘅質疑，最後講講荀子嘅性論點樣順暢解釋孔子嘅「性相近也，習相遠也」，內容豐富，牛某錄到即將油盡燈枯，敬請聽完全集。內容包括：

開頭嘅時候先講講禁晚市堂食嘅延長，然後講講

1) 禮原來唔係為咗限制情感，而係要順應人類情感，禮同仁義嘅關係，更係密不可分
2) 荀子認為禮嘅根源在於天，但呢個天又唔係道德天，咁價值根源喺邊度?
3) 價值根源在於心，心能夠虛壹而靜、積思慮、具自主意識，有咩咁重要?
4) 為你總結出荀子嘅全幅人性觀，好可能係全港最強義嘅荀子
5) 再用荀子同孟子打交，加埋胡師傅嘅健身健心
6) 荀子性論同人類由荒蠻到文明發展嘅契合，引出荀子同《人類大歷史》異曲同工
7) 以荀子性論同去解孔子嘅「性相近也，習相遠也。」極其通順
8) 「君子生非異也，善假於物也」
9) 「天地殘缺，良知不滅，天地始者，今日是也。」呢十六個字，總結出荀子關懷

最後會有Q&A環節(開頭都有預告到特別計劃)，想知就即刻聽聽!

你我本非聖人，與禽獸類同，惟吾心自可變可積可思，而有能成聖人之可能，有能使他人成聖之可能，此之謂文明社會，此之為孔荀之同也。
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3IcBUf5

今集係牛某喺2022年錄音嘅第一集，今次我要拋開宋儒、新儒家嘅包袱，以德尼思化嘅文章，去為你講述一個充滿關懷嘅荀子。如果你曾經認為荀子就係講人性本惡、荀子就係儒門外道，咁我今集將會為你帶嚟一個唔一樣嘅荀子，荀子唔係講人性本惡，而係人性向惡，只要分清一個字嘅差別，你就會明白點解荀子係一個儒家，於我而言，比起孟子，荀子係更近孔子嘅儒家傳人。荀子對人性嘅剖析，值得你我重視。

喺開頭會同大家講講香港政府同中國政府喺施政上嘅雷厲風行。然後會講講：

1) 呢集係適逢德尼思化IG突破一萬人follow嘅賀禮，稍稍講下點解想用德尼思化嘅文章
2) 簡介孟子嘅關懷，澄清孔孟根本無講過「性本善」，以及將孔孟詮釋成「性本善」嘅問題
3) 講講荀子同當時嘅時代背景、荀子嘅治學精神同埋荀子點樣被後人片得體無原膚
4) 將荀子〈性惡篇〉剖析，解釋人性向惡嘅原因、偽字對荀子嘅意義同埋狙擊孟子嘅原因
5) 荀子話聖王同暴君同你我嘅性都係一樣，點解?
6) 無論係朱子同王陽明，都有荀子嘅影子，但佢哋都同樣反荀子
7) 牛某化身荀子，力指孟子嘅盲點同展現荀子嘅關懷

好老實講，呢篇同德尼思化嘅合作，可能會係我2022年寫得最好、講得最好嘅講稿，但願各位用時間去慢慢聽。荀子，值得你我去了解。

在此再次感謝德尼思化嘅允許，有時我同戈登探長有啲理解不一，我諗係非常平常，始終每個人理解不一，但希望做到和而不同。

聽到最後有重要消息口述！

(總結於1:29:30開始）
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3IcBUf5

(正式內容由12:30開始）

我哋成日話聖誕，但又有無諗過耶穌自娘胎出世之前，到底存唔存在呢？到底聖誕節係慶祝梗耶穌出現，定係耶穌一直存在，慶祝佢道化肉身呢？今集要講嘅書《製造聖經》就係想解答一系列關於新約嘅問題。顧名思義，《製造聖經》仲想搵出聖經係咪製造出嚟，而如果係製造出嚟，製造過程係點呢？

呢本書嘅作者係巴特‧葉爾曼，佢所採用嘅方法係歷史批判法，佢接受過專業嘅神學院訓練，喺導讀當中，台灣神學院副教授邱凱莉補充，所謂嘅歷史批判法係一系列嘅方法論，用嚟檢視聖經文本嘅起源，同埋同其他同時代文本嘅關係，形成一種批判性嘅閱讀聖經方式，務求盡量接近原意，人話少少講，即係睇埋聖經作者嘅語境。

我哋今集會講講：
1. 馬太福音同路加福音講耶穌出世嘅唔同
2. 馬太福音同路加福音點講耶穌之死
3. 馬可福音有天啟末日嘅背景，同約翰福音有喺神學意義上嘅唔同 我無跟足作者嘅引述，而係睇完《製造聖經》，再嘗試模仿作者思維去自己睇返聖經，希望仍然能夠呈現到一個合理論述俾你。聽完呢一集，希望你有更多嘅角度去閱讀聖經。

一月七日，喺東正教嘅聖誕節，牛某同你一齊思考聖經。
_____
Instagram： @cowgortalk
Patreon：https://www.patreon.com/cowgortalk
文字版：cowgortalk.wordpress.com

《25座二戰紀念碑教我們的事》：猶太人最後嘅提醒

上集提到韓國同日本喺慰安婦一事之中，韓國作為一個受害者，多年嚟想向日本呢個施害者討回公道。而今集嘅受害者數量更大，所得到嘅待遇亦折然不同。二戰時嘅猶太人唔係被狂暴嘅軍人殺害，而係被冷血又冷靜嘅理性所諗出嚟嘅大規模殺穆方式所殺害，強逼我哋去思考，點解德國黨衛軍自己發明出毒氣室去誅殺眼前嘅猶太人。

今集會去講下尼德蘭(荷蘭)、匈牙利同波蘭點樣去以紀念碑去記住六百萬猶太人嘅亡魂。

我哋先會講講尼德蘭嘅國家紀念碑拒絕將猶太人納入自己嘅民族受難之中，唔願意承認猶太人喺集中營嘅苦難，而時移世易，我哋發現國家紀念碑原來唔再係猶太人嘅忽視，而係重視猶太人命運嘅開始，點解會咁?

然後，我哋再講匈牙利以德國占領遇難者紀念碑去形塑受傷者嘅形象，但歷史學家同民間都共同承認匈牙利喺二戰當中同德國合作嘅過去，匈牙利幾乎無受過納粹嘅催殘，實際上，匈牙利同德國合作，用四個月將超過四十萬猶太人送到德國/波蘭赴死。民間面對政府以紀念碑企圖以紀念碑去建構一個虛假嘅歷史，以紀念碑對抗紀念碑，到底講梗咩?

最後，講返一百萬猶太人魂斷嘅地方，奧斯威辛。我會為你講講奧斯威辛喺德國治下嘅歷史、毒氣室嘅由來、德國黨衛軍嘅哲學基礎。一齊同牛某思考呢場冰冷嘅屠殺，相信你下次嘅歐洲之旅，會不再一樣。
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3qZjLMd

今集，先會略略引述立場新聞就黎智英、鄒幸彤、何桂藍未經批准集結全部罪成嘅記錄。

然後繼續《25座二戰紀念碑教我們的事》，上集講大洋國，今集講英國，同埋意大利、韓國、日本。本來呢本書嘅第一部係講英雄，講到英國同意大利就完咗第一部，但係我嘅貪心，偷偷地寫多個韓國，再忍唔住講埋日本，就係咁，呢集比較長。

喺講英國嘅轟炸機司令部紀念碑嘅時候，我哋會發現一個政府會將一啲醜惡嘅現況隱藏，就好似唔透露轟炸機以炸平民為目標，而不斷話轟炸機係結束戰爭嘅方法、只攻擊軍事目標。到底英國社會點睇轟炸機，而退伍嘅軍人又點睇呢？理應作為主角嘅退伍軍人，係咪好似雕像上嘅英雄一樣，昂首闊步呢？

然後我哋會講講意大利嘅陣亡者神龕，陣亡者神龕同呢一部嘅其他紀念碑唔同，陣亡者神龕係由民眾自發去建立，再被政府承認為一個永久嘅紀念碑。喺陣亡者神龕，你唔會見到一個個體代表全體嘅雕像，而會見到二千幅反法西斯嘅英雄嘅遺照。係咩驅使到民眾咁團結去自發起呢個紀念碑？呢個紀念碑象徵嘅意思，同二戰時候嘅意大利軍隊有咩關係？

我哋可以喺整個第一部當中，發現英雄具有好多唔同嘅面向，「實際上，英雄可以係舊時代嘅眼淚、鎮壓者、國家嘅靈魂、人造嘅再世基督、被遺忘但俾人擺上檯嘅軍人、同埋烈士、受害者，但我哋好多時忘記/忽視咗呢啲身份，全部統稱為英雄。」

我諗呢一部最值得我哋去記住嘅，係每一個英雄紀念碑象徵住某某意底牢結，而某某意底牢結具有一啲目的，想去說服人民一啲嘢，當我哋深入去搵呢個意底牢結嘅根源，我哋會發現故事比我哋想像嘅，往往要複雜，面對複雜嘅世界唔容易，但我相信比起用簡單嘅思維去面對複雜嘅世界，最終嚟得要無咁痛苦。

跟住，我哋講講第二章──烈士，先講嘅係韓國嘅和平少女像，睇睇一個咁簡樸柔弱嘅紀念碑，背負住一個幾沉重嘅歷史，而呢個歷史點樣借由紀念碑將舉國嘅憤怒壓喺日本身上。

最後，講講日本靖國神社點解會帶嚟咁多嘅爭議。

我會同大家一齊思索一下，受害者、加害者同政府之間嘅關係，希望大家唔會，亦唔需要成為歷史嘅囚徒。

歷史會被某啲人視為鼓勵、勇氣嘅泉源，但對我嚟講，歷史係會令人受傷，每個人都係歷史嘅受害者，因為今日嘅一切，源於過去嘅唔文明所建構，歷史嘅鮮血，造就今日嘅我，無論係多面嘅英雄，定係如恆河沙數嘅烈士，如今都一一逝去，踐踏住佢哋屍骨嘅我，要做啲咩先唔會辜負呢啲亡靈呢？

下集，會延續烈士嘅話題，去同大家繼續面對歷史。
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3qZjLMd

《一九八四》：關於一九四八年嘅社會主義者對極權共產最深刻嘅反省

《一九八四》當然係一本好出名嘅書，如果我哋只睇書嘅內容，會發現呢本書講梗極權社會下嘅人性扭曲，但如果我哋睇埋作者同成書嘅時代背景，我哋就會發現《一九八四》係對蘇聯未來嘅刻畫(而我哋可以話佢預計得好準確)，同時係想用呢個未來嘅極權政府，對應作者心目中嘅馬克思嘅共產主義，以極權顯示共產嘅真意。

今集會為你講講：

1) 點解《一九八四》唔會係一本禁書，講講作者背景同歷史
2) 作者對一個聰明嘅極權政府嘅想像，顯示極權政府最大嘅問題唔在於奴役人民，而係極權政府一但成熟，就不可逆轉。
3) 不可逆轉係因為極權政府有三個特性去維持下層建築：利用矛盾維持階段，以矛盾消除民眾理性同強調對老大哥嘅愛。
4) 極權同共產有咩分別?講講馬克思嘅共產主義浪漫到令好多人支持嘅原因，原來共產主義追求自我毀滅，講梗乜?
5) 作者話不可逆，但新嘅科技可唔可能令下層建築改變上層建築?
6) 最後用主角嘅結局，詮釋極權政府對人性嘅理解

希望你聽到最後，明白我點解會最後話：「天地殘缺，良知不滅，天地始者，今日是也。」前兩句係我寫，後兩句係荀子，我搵日會講講@delis.ver嘅荀子。
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/30ddvWb

今集，開頭會記錄一下12月9日嘅全面推行安心出行，同埋林鄭月娥想回復殖民地時期總督嘅職責，正式內容會喺06:15開始。

今次繼續要講嘅書係《25座二戰紀念碑教我們的事》，要講嘅國家係美國，我哋依家成日會稱呼美國做美帝，當然，佢的確係世界上嘅強國，但其實佢嘅強大，同二戰有好大嘅關係。

雖然美國同其他國家都同樣參與到戰爭當中，但美國一來無發起所謂嘅「不義之戰」，所以無戰敗國嘅懊悔、慚愧，二來亦無好似歐洲戰勝國咁，被人以閃電戰佔領/轟炸機大量投彈，所以無好似歐洲戰勝國以血肉咗換取勝利之後嘅悲情，所以美國喺二戰之後基本上別樹一幟，可以話係唯一一個抬頭挺胸嘅戰勝國。然後你會發現呢個背景同今日嘅美國有好大嘅關系。

喺第三章，作者講到海軍陸戰隊戰爭紀念碑，喺呢座紀念碑我哋可以了解到，美國將美軍當成英雄，列根甚至稱美軍係基督大軍，到底點解咁誇張？紀念碑點樣將美國精神注入？呢個美國精神，其實代表住咩？當我哋將祖國召喚同海軍陸戰隊戰爭紀念碑對比，你就會發現相同同相異之處，十分有趣。

喺第四章，講到麥克亞瑟將軍紀念碑，呢座紀念碑被菲律賓人所稱頌，甚至神化呢個外國人將軍，基本上當咗佢係jesus，但當我哋重掘出麥克阿瑟嘅歷史，會發現呢個英雄有唔少嘅污糟事，其實呢啲歷史對菲律賓人又有咩所謂？英雄係一個symbol，係一個希望，無論菲律賓人定菲律賓政府都需要一個英雄，咁麥克亞瑟就有企喺菲律賓嘅價值。

最後我會為大家總結一下第一至四章，紀念碑同人類文明之間嘅關係，更會為你揭露，我哋每個人內心嘅嗰座紀念碑，好可能係啲咩（聽到最後，會稍稍講講朱子嘅理解）。

「當我哋去留意下紀念碑上嘅陸戰隊隊員，除咗最頭嗰位係插梗旗，其餘隊員舉手嘅神情，好似人向上天祈求一樣，最後一位隊員想掂又掂唔到旗桿嘅狀況，作者更認為會令人聯想到Michelangelo嗰幅亞當向上帝伸出手指嘅畫。」

「而佢留咗喺巴丹島捱餓部隊，就有一首歌去記念麥克阿瑟。
「防空洞道格」，別躲了，快出來
「防空洞道格」，別躲了，快出來
去給富蘭克林送捷報
弟兄們沒飯吃還在捱！」

「但世界有幾多嘅文明被時間消滅，而又無人能知道當中嘅故事？

就好似西夏王陵嘅金字塔到今日仍然存在，但佢嘅故事係一個空白，亦無人再講得出內容，自從蒙古滅咗西夏，無人知佢點起、點解起，佢哋好可能都係一個大型嘅讚頌英雄嘅紀念碑嚟，只係今日佢哋無再述說任何故事，變得沉默。」

心事解難：

問：why hk ban drug? moral or harm?
答：主要係harm

分享：好多人移民
答：咁我又分享下沙特
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3qZjLMd

(唔好以為今次正文好長！其實正文只係去到44:35，之後嘅內容係心事解難） 

如果話二戰嘅發生係民族/民粹主義嘅極致，咁二戰就主要係有關斯拉夫人（東歐、俄羅斯、巴爾幹半島）同雅利安人（中歐，由其係德國）之間嘅爭鬥嘅故事。當一個民族高舉優越，另一個民族以死捍衛自己，血流成河就變成必然。 

俄羅斯嘅母親河----Volga 就正正被二戰染成赤紅，而今次嘅《25座紀念碑教我們的事》就以Volga 旁邊嘅史太林格勒上嘅「祖國召喚」開始。 

你會喺呢集了解到呢座25座入面最大嘅紀念碑（高自由女神像兩倍）嘅巨像，同當時嘅時代有咩關係、以前對蘇聯人，依家對俄羅斯人嚟講有咩意義。 

然後，我哋會再去睇處於戰場中央嘅斯拉夫人----波蘭，有一座叫「四名沉睡者」嘅紀念碑，佢明明係一座為咗慶祝紅軍戰勝德軍嘅紀念碑，但係被波蘭人所敵視，而「四名沉睡者」呢個名，就係由波蘭人自己內部所改。 

一齊去聽下斯拉夫人點樣去用唔同方法，去睇同一座紀念碑、同一場戰爭。以前嘅「祖國召喚」，仍然雄糾糾咁企喺大地之上，但喺喺人心目中，就可大可小。今日你我再去波蘭，唔會再見到「四名沉睡者」，到底波蘭人嘅傷痛有無因此而抹平呢?我哋又可以從消失嘅紀念碑當中領悟啲乜嘢呢?一齊聽聽呢集，一齊反思一下我哋面對紀念碑與否，所應有嘅態度。 

「所以作者認為，祖國召喚（The Motherland Calls)係想表達一個簡單嘅訊息，「唔理戰爭幾咁慘烈，唔理敵人幾咁凶殘都好，「祖國」永遠都會屹立不倒」，而我哋亦唔難見到，面對住祖國召喚嘅巨大，任何嘅個人同傷痛都會顯得微不足道。」 

「波蘭民族回憶研究所的安傑伊．扎維斯托斯基（Andrzej Zawistowski）博士： 

「在這地方的每一個角落，都在審訊和折磨所謂『國家敵人』…」」 

心事解難概要： 

問：如何熱愛生命？
答：生命唔需要設立目標，目標係一個限制，但生命係由內到外嘅開展，唔好規限自己，當下生活，就能夠熱愛 

問：牛哥點睇「相濡以沫，不如相忘於江湖？」
答：莊子喺呢句，係講梗對生命嘅睇法 

問：考試壓力好大，有時大到溫唔到書，咩都做唔到，該如何是好？
答：你今日叫咗未？ 

問：何以解憂？
答：憂何需解？聽下周敦頤唔除草 

問：到底牛哥信咩主義
答：牛哥主義 

問：好想留得住一啲嘢
答：咁就會留唔住「想留得住一啲嘢」 

問：返工做梗嘅嘢同平時自己會諗嘅嘢好割裂
答：想知你平時會諗咩！ 

問：政府追殺野豬真係......(暫時未搵到啱嘅形容詞形容件事有幾撚離譜）
答：我哋一齊喺野豬（山豬）呢件悲劇當中，去反思我哋可以學習到咩，一個公民可以點諗 

問：突然之間好驚死，成日形住自己有病，唔知點解
答：先body check，再聽Socrates 點睇 

問：約個女仔睇戲俾佢拒絕咗🥲
答：被拒絕，好過無機會被拒絕，你嘅勇敢已經值得稱讚
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3qZjLMd

今集係一個新嘗試，喺講一本新書之前，為你做個預告，等你知道本書大概講啲乜，睇你有無興趣一齊睇/聽埋落去。 

近排有推倒同埋起紀念碑嘅風潮，一方面不停推冧紀念碑，一方面又開始歌功頌德去起新嘅紀念碑。一齊聽下《25座二戰紀念碑教我們的事》嘅預告，聽下作者對一舊舊嘅紀念碑有咩睇法！或者你會發現，一個人點樣去看待一座紀念碑，其實好代表佢係一個乜嘢人。 

內容節錄： 

「所以每一個被保留嘅雕像，其實係象徵住一個想被人記住嘅故事，而被保留嘅故事，就係呢個社會入面嘅大眾/政府想去推崇嘅價值觀，換言之，就係將價值觀依附喺堅固、忠誠嘅石頭之上，希望呢個價值觀能夠同石頭一樣，天長到地久......」 

「真實發生過嘅二戰，就成為整個西方世界嘅共同神話，呢個共同神話令到書中嘅五個部分環環相扣，唔知呢一段嘅集體記憶、傷痛能唔能夠抵禦到呢次破壞偶像嘅風潮呢?」
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3qZjLMd

今集牛哥會同你從新儒家文本中，直接去傾傾新儒家到底點樣回應現代社會。呢本書係彭國翔所寫嘅「智者的現世關懷」，入面係有關於牟宗三對當代政治思想嘅回應，如果你對儒家或者自由主義有興趣，相信呢集好適合你聽。而我會為你講講，到底牟宗三對樣看待自由主義同儒家嘅關係，內容包括：

1）除咗用意底牢結去譯ideology外，牟宗三仲認為liberalism唔應該譯做自由主義，而應該譯做「寬容主義」，而「寬容主義」就好似一個舞台咁，點解咁講？

2）寬容主義同自由之間嘅關係係點呢?當時嘅自由主義思想面臨啲咩問題呢？

3）牟宗三坦白承認民國建國之前嘅儒家，自己內部開唔出liberalism，但係儒家精神可以為liberalism作補充

4）牟宗三點睇中國古代政治結構？
（喺呢個部分，原來我有一段mute咗自己，所以呢度補充一下，牟認為中國古代政治有三個組件，君主、士人同人民，而古代人民其實唔係公民，而係天民，佢哋並無政治權力，無法參與到政治決策當中，只有接受政策時先會感受到政治嘅存在，換言之，任何時候都自由，而一旦政策到嚟就唔自由，牟話佢哋好似羲皇上人：「日出而作，日入而息，帝力於我何有哉?」平時咪就係做農夫，皇帝嘅力量好似唔影響自己咁。所以呢種社會，係一種單向嘅政治結構，亦因此要改朝換代，就往往會出現革命。）

希望今集會令你感覺到新儒家對自由嘅關懷，既尊重過去，又渴望回應現代，係新儒家其中一個動人嘅位。
_____
Instagram： @cowgortalk
Patreon：https://www.patreon.com/cowgortalk
文字版：cowgortalk.wordpress.com

松浦彌太郎嘅作品，大家行書店嘅時候都可能會見過，算係一個喺香港幾出名嘅日本作家，佢嘅作品都幾多，例如《今天也要用心過生活》、《只要我能跑，沒什麼不能解決的》。佢教人點樣處世、思考，聽落係一個成功人仕。

其實，松浦彌太郎年輕嘅時候唔算順利，佢喺高中嘅時候已經輟學，一句英文都唔識講，居然決定到美國闖一番天地。由時薪兩美金嘅工作慢慢做起，喺唔同行業之間穿梭，儲錢開咗間小書店，再進軍出版界，成為「COW BOOKS」嘅負責人（同牛某無關，只係緣份）。

喺呢段艱辛嘅成功之路，佢受到唔少前輩嘅提醒、從唔同情況累積到各種經驗，所以佢亦想寫一本書去提醒年輕人，嗰啲對未來感到不安、搵唔到夢想、感到迷惘嘅人。為咗作更親近嘅提議，佢嘗試設想：「如果我依家二十五歲，最想做嘅50件事。」今次要講嘅書，就係《松浦彌太郎說: 假如我現在25歲, 最想做的50件事》。

雖然書名表明係25歲，但我認為25歲只係一個象徵，象徵一個年輕、尚未走出迷霧、等待或渴望進步嘅心靈。我一開始睇呢本書嘅時候，有一種松浦彌太郎嘅建議睇落太過積極、上進嘅感覺，心諗會唔會只係一個滿懷希望嘅日本人所寫嘅鼓勵說話。但我越睇，我就開始明白點解松浦彌太郎要寫得咁積極。

依家嘅松浦彌太郎，唔會再好似書中咁諗嘢，但如果要依家嘅松浦彌太郎去提點二十五歲嘅松浦彌太郎，就應該要咁積極。點解？因為「放下」二字對唔少嘅年輕人係一劑毒藥。我哋總語再講。

今集會講以下四件事：

• 「以成為社會嘅齒輪為傲」──我會從馬克思嘅異化，分出「被動齒輪系統」同「自發齒輪系統」，幫助你明白「社會齒輪」呢個比喻嘅意義何在
• 「累積小小的成功」──小成功點解會累積成大成功？我哋要靠數學幫幫手。
• 「訓練自己喺三個月內成為領導者」──要成為領導者，首先要做個「老襯」
• 「養兵千日，用在一時」──提早返工，係一件令人感動嘅事

按：如果你覺得呢集有意思，未必係因為松浦彌太郎。

另：作者係一個日本人，我哋感受下日本人點樣看待工作。

今集，Epictetus 終於要開始教我哋點樣先可以控制情緒，超出外在事物嘅限制，從而你會發現，Epictetus實在係語出驚人 {牛哥超譯，去吸引你去聽}：

1）我哋好多時都當咗自己嘅意見係反映事物本身，真係錯晒！
2）叫人唔好唔開心？咁點解自己平時唔能夠開心？得把口，唔得！
3）你嘅男/女朋友只係人類，無乜特別啫！
4）快樂係弱者先會去享受，強者會戰勝快樂。
5）如果你無有可能出街踩到狗屎嘅覺悟，咁你不如唔好踏出嗰步啦！
6）你覺得受傷，唔係因為小明傷害你，只係你自己傷害自己，因為無人可以逼到你自己感到受傷。
7）佢沖涼好快，唔好話佢沖得唔好，話佢沖涼好快就夠喇。
8）手足做錯事？你諗佢做錯嚟做乜？不如諗返你同佢係手足嘅情誼，好好幫佢手啦。
9) 記住，要好似敵人咁暗中監視自己。
10)「記住，你係戲劇中嘅演員。照住劇作家嘅要求，短篇就演短劇，長篇就演長劇。」

希望你聽完呢集，就算唔能夠令到你好似Epictetus咁豁達，起碼可以用一個輕鬆啲嘅方法，去看待你人生會遇到嘅事事物物，唔再驚失敗，為諸事感恩，相信就係Epictetus 最勵志嘅地方。

呢集嘅最尾，牛哥會為你解答一條千古難題，其實，人生就係... ...聽咗你咪知！
_____
Instagram: @cowgortalk
文字版：https://bit.ly/2YTRNpd

今集開頭，我會講下半強制安心出行嘅推行，對牛哥嘅影響。另外，面對政府官員對於國家安全嘅諸多詮釋，作為一個小市民嘅困惑。

繼續去講教人喺處處受限嘅人生當中，活出自由嘅書，呢本書分咗四個部分，但原來今集只能夠講到第一章──義命分立（原本想講兩章）。

喺呢集，你會聽到對stoic 最勵志嘅詮釋，更會用儒家同stoic 溝通，睇下Epictetus 點樣提醒我哋：

1）義令人自由，命限可能會令失去自由
2）命限係唔能夠迴避，人要去硬食命限嘅原因
3）義同命限會因為時機而轉變
4）命限對於我哋嚟講，其實點都有著數

牛哥仲會補充：

1）義要堅持，但要背負錯嘅可能嘅責任
2）覺得命限跨唔過？試下跨先啦，失敗，最多咪就只係失敗
3）人係能夠成長，命限，係可能越嚟越少

人生係會受到命限，但人可貴嘅地方，就係命限阻唔到自由，阻唔到人活得優雅、快樂（理論上），甚至，人係可以打破命限。

（正式內容由7:58開始。）
_____
Instagram: @cowgortalk
文字版：https://bit.ly/2YTRNpd

喺教科書嘅記載下，我哋對清末嘅印象往往係貧弱、飽受欺凌，外國接連以戰爭打敗清軍，鴉片戰爭、甲午戰爭嘅落敗令到清國顏面無存，就自然認為外國軍隊一旦進入國土之內，就係又一次嘅侵凌。

喺《八國聯軍乃正義之師》呢本書，用咗誇張嘅標題，想為你揭示嘅係「八國聯軍是一場救援行動，而不是侵略行為」，同之前嘅鴉片戰爭、甲午戰爭有住根本唔同，今集內容包含：

1）承認作者標題同開首過於偏袒聯軍，引述作者後嚟講到「八國聯軍不是正義之師」
2）作者點出鴉片戰爭、甲午戰爭係戰爭，但八國聯軍無一個廣受按納嘅稱謂，原因係八國聯軍並唔係戰爭
3）引述時人對於義和團嘅證言
4）1900年，十萬義和團入京嘅原因
5）外國使團以外交方式嘗試不果，使團代表更被殺後示眾
6）清軍武器先進，同義和國一齊圍攻外國領事館兩月
7）十萬清軍對上1.8萬聯軍，幾乎不戰而逃
8）八國聯軍進京之後，對以康有為為首嘅維新派同以孫中山嘅革命黨有莫大益處
9）澄清有關議和條款係對清嘅欺壓嘅謬誤

我努力嘗試將作者偏頗嘅內容，或刪除，或指出。目的係想展示雖然書名係有所誇張，但呢本只有192頁，但總共有528個註嘅書仔，當中資料嘅豐富，係一個對於後人認識當時歷史嘅好補充。作者確確實實有侮辱嘅嘢，只係侮辱嘅嘢係瘋狂嘅義和團同頹然嘅守舊派；作者係有讚頌八國聯軍，只係除咗因為八國聯軍解救教民，更令清帝國嘅內亂解除，同埋為往後嘅清末新政同辛亥革命鋪路。 

我同意八國聯軍進軍清帝國可能有私心，只係就上述三點而言，八國聯軍之於中國而言，係有益處。

我同意作者書名太過誇張，但唔代表內容唔值得用你我理性嘅頭腦去閱讀。

如果歷史係非黑即白咁簡單，或者係一件好事，但唔係事實。

人必自侮，而後人侮之。
_____
Instagram: @cowgortalk
文字版：cowgortalk.wordpress.com

當我哋提到孔子面對天命嘅限制嘅時候，唔知你會唔會去諗，既然天命之於人係咁大，咁到底人可唔可以擁有自由呢？而當孔子喺失意嘅時候哭泣，你又會唔會諗，聖人都喊，咁自己面對失意，係咪都要喊埋一份？哲人面對情感，到底同普通人有咩分別？

自由同點樣面對情感，的確係一直以嚟都係困擾好多人類嘅問題。今次我哋將目光放到西方，去睇睇同儒家有幾分相似嘅Stoic係點樣思考自由同情感。呢次講嘅書係《奴隸哲學家的人生通識課: 在處處受限的人生裡, 活出自己的形狀》，你無睇錯，個哲學家真係奴隸嚟，佢個名係Epictetus，但到底一個奴隸點樣活出自由同自在呢？我諗，有唔少香港人需要向呢位哲學家偷師。

今集主要會講下stoic 呢個學派嘅背景，內容包括：

1)情緒嘅主人定奴隸
2)Stoic 式嘅義命分立
(仲會講少少cioran呢個存在主義者點面對失敗）
3)表象與實在
4)宇宙同我

而牛哥更會用儒家同stoic 互相溝通，務求帶俾你一個更勵志嘅哲學。

註：今集最尾有回應聽眾心事，所以會睇落有啲長

（正式內容由5:00開始。）
_____
Instagram: @cowgortalk
文字版：https://bit.ly/2YTRNpd

今集係《孔子大歷史》嘅番外篇，我哋會一齊睇下孔子晚年所經歷嘅唔如意。  

1）孔子重返衛國之後，發現東方聯盟並唔適合自己，就南下到蔡國、楚國，經過兩年，仲被楚王應承俾七百里地俾孔子
2）孔子到南方嘅時候，陽虎喺北方打得激起，我哋會順道講講，睇下貴族政治點樣喺戰場上失色
3）孔子失意離開楚國，重返衛國，然後到魯國做史官直到老死
4）孔子途中編著六經，令之後讀書人要透過孔子嘅著作去了解過去，導致孔子有成名嘅可能
5）孔子晚年嘅政治思想，居然有去除禮教嘅意味，視周禮為次等；同意曾點無志向嘅諗法
6）孔子晚年，兒子、弟子相繼死去，最後迎接自己嘅死亡  

六十而順，七十而從心所欲不逾矩，並無想像中咁輕鬆，呢一切嘅輕描淡寫，係嚟自於孔子晚年所遇到嘅失意、哀痛，到孔子喺生命最後一刻去再審視人生，去回憶自己曾經嘅夢想──周公，亦只係「久矣吾不復夢見周公」，但就算係咁，仍然唔去後悔。  

今日閱讀孔子嘅你我，無論係有孟子嘅鴻心定曾點嘅悠然自得，孔子嘅人生仍然係你我可以重溫嘅鏡，然後承繼佢嘅意志，一步步向前走，以一人之力，一己嘅方法，面對住巨大嘅命限。
_____
Instagram: @cowgortalk
文字版：https://bit.ly/3nEojGr

知天命三個字，琅琅上口，但要能夠體會其中意味，就唔易做到。如果要形容孔子嘅人生做一種生果，我諗就係碌柚。皮厚，飽滿，多汁，甜又帶苦澀。 

上集提到孔子一步步做到三桓，彷彿得到機遇而做到司寇，已經係天命眷顧。但喺今集，牛哥會詳細為你講述孔子五十歲嘅人生，你或者就會知道天命之於孔子，更多嘅係嘆息。今集內容包括： 

1. 孔子點樣喺魯定公同三桓之間，實踐自己嘅靈活而有原則
2. 孔子點樣將魯國變成自己嘅理想國（加埋孔子點睇刑法）
3. 孔子同女人們嘅關係（加埋孔子見南子夫人）
4. 孔子擊磬又學琴，終於決定背叛魯國，去投奔趙簡子，走到黃河邊上，心裏唱起《詩經》嘅<匏有苦葉>，口中念：「美哉水，洋洋乎！丘之不濟此，命也夫！」文王因為天命而叛商，孔丘因為天命而不渡。孔子長嘆一句造化弄人，就辭別回鄉。 

如果你願意，一層一層剝開孔子嘅心，佢唔會為你帶嚟世上最甜美嘅味道，而係樸實中嘅苦澀同陣陣嘅清香。然後你會發現，脫去世人對孔子神化嘅衣裳，見到嘅會係既係凡人、又係聖人嘅孔丘。美哉水，洋洋乎。

（正式內容由3:21開始。）
_____
Instagram: @cowgortalk
文字版：https://bit.ly/3nEojGr

上一集講到孔子出生貧苦，無得到好多嘅幫忙同庇蔭，依靠停棺歸宗而被重新得到貴族身份。但係呢一次嘅咸魚翻身，無令到孔子飛上枝頭變鳳凰，因為孔子既無父親照顧、又無學問，佢嘅貴族身份根本無畀人睇得起。 

今集，會為你撕開司馬遷所記載嘅孔子年輕有為，還原返初得貴族嘅孔子： 

1. 點樣一步一步經歷成長，感受到三十而立嘅小成就
2. 四十而不惑對做錯政治決定嘅反思，再重新積存實力
3. 五十而知天命嘅得到機遇，成為同三桓平起平坐嘅大司寇，然後迎接天命，隻身對抗提拔自己嘅三桓。對抗提拔自己嘅三桓。 

學習孔子，唔係因為孔子係聖人，唔係因為佢講仁義禮智。而係見證住一個凡人以一己之力，逐步遞進，遇到挫折，就轉身繼續前行，做到自己夢想中嘅大官，仍然無因此去迷失，我哋先會為孔子嘅不屈而動容。 

就好似一個人用一手好牌贏人，只係基本；但一個人拎住一手爛牌，仍然唔係輸最多，甚至唔使輸，呢個人嘅牌技就有好多可以學習嘅地方。 

一齊睇下喪家之犬，點樣站到魯國嘅權力高峰。 

最後感謝一下聽眾嘅回應。

（正式內容由1:07開始。）
_____
Instagram: @cowgortalk
文字版：https://bit.ly/3nEojGr

孔子呢個名，你知我知，單眼佬都知。但我哋對孔子呢個人嘅事蹟又了解幾多？ 

今集，牛哥會講下《孔子大歷史》呢本書，輔以引文，為你呈現孔子真實嘅一生。一齊睇下孔子點樣由一個鄉人變成貴族。呢集內容包括： 

1. 介紹孔子嘅巨人父親嘅事蹟
2. 解釋孔子為「野合之子」嘅意思
3. 睇下孔子點樣利用娘親嘅棺木去換取貴族身份
4. 「吾十有五而志於學」嘅真正意思

希望藉由詮釋佢嘅事蹟，能夠令各位喺唔需要理解論語嘅思想底下，都能夠以孔子嘅行事去了解佢對禮制嘅睇法，你或者會發現，孔子之所以係聖人，唔係因為佢離地，而在於佢嘅超凡入聖。 

（按：今次開頭會講講九一一，正式內容由12:25開始。） 

（另：實在失禮，有好幾次將「孔紇」讀成「孫紇」，請見諒）
_____
Instagram: @cowgortalk
文字版：https://bit.ly/3nEojGr

今集有少少長，但幾值得聽。

今次會用《我反對》延續有關平等嘅討論，將女性平權嘅進程一步一步去解釋你聽，由五十年代前被視為附庸、到民權運動追求女性同男性擁有一樣嘅福利、講到新女性主義者認為女性應該有特別待遇。當我哋去睇金斯伯格點樣回憶過去有關女性權益嘅案例同回應新女性主義嘅comment，我哋就能夠漸漸明白到金斯伯格所理解嘅平等嘅精神所在。

之後，我會抽取書入面三件有關於金斯伯格人生嘅事件，去睇下唔係著緊法官袍嘅金斯伯格喺日常做過咩事去保護民主。同埋講講平等同儒家嘅「與萬物同體」嘅關係。

最後...更會揭示牛哥嘅身份，記得聽到最後。
_____
Instagram: @cowgortalk
文字版：https://bit.ly/2XWGIDg

要喺社會中敢於叫喊一聲「我反對」並唔容易，處於高位而處處為異議者發聲就更唔容易，而今次藉由《「我反對！」不恐龍大法官RBG第一手珍貴訪談錄》要講嘅，就係喺美國最高法院擲地有聲咁講「我反對」嘅露絲拜德金斯伯格(Ruth Bader Ginsburg)。

金斯伯格係美國最高法院第二個女大法官，佢嘅一生正正經歷同實證美國對於平等嘅進步，今集會稍稍延續一下上集提到嘅馬丁路德金，睇下喺美國嘅民權運動點令到司法制度嘅態度轉變，等我哋一齊喺呢一集講講(1)自由同平等嘅關係、(2)美國最高法院嘅運作同精神、(3)美國憲法點樣由本來無平等二字，演變成喺平等嘅概念上比較先進嘅國家、(4)家長主義同男女不平等嘅關係。

當我哋重睇整個進程，就會發現我哋習以為常嘅概念可能好明顯地錯而不自知(一百年前嘅人覺得男女理應不平等)，而追求概念、價值觀嘅進步，可能唔係一兩代嘅人事。實在係路漫漫其修遠兮。
_____
Instagram: @cowgortalk
文字版：https://bit.ly/2XWGIDg

「真實生活比起小說劇情更為神奇」

雖然聽落係陳腔濫調，卻係《自私的基因》嘅作者，理查・道金斯(Richard Dawkins)嘅信念。佢認為人類就係尋求生存嘅機器，體內被輸入某種程式，用嚟保護名叫「基因」嘅自私分子。呢種諗法聽落好唔啱聽，但會唔會自有其道理呢？基因自私嘅諗法，同《進擊的巨人》當中嘅吉克・葉卡嘅諗法相差無幾，唔知諫山創有無睇過《自私的基因》呢？

另外，《自私的基因》同《裸猿》有幾分相似，因為兩本書嘅作者都係動物學家，一樣都係用生動嘅文筆以一般人為書寫對象，亦喺前言提到自己嘅表述同一般嘅學術著作唔同。同樣地，佢哋都著迷於詮釋達爾文嘅演化論。

《裸猿》嘅視角係針對喺人類由猿到裸猿嘅演化；今次所講嘅《自私的基因》視角就非常之大，理查・道金斯企圖描寫出由生命起源貫穿到依家嘅故事。我哋聽下道金斯自己點講《自私的基因》同達爾文理論嘅關係先：

「「自私的基因」理論是達爾文的理論，雖然他不曾從這觀點來表達，但我想他應該會讚同我的觀點。實際上，這是正統的新達爾文主義（neo-Darwinism)的邏輯延伸，而以某種新形象來表達。」

達爾文係將每一隻生物視為個體，再將相似嘅個體劃分成一個族群，然後搵出族群同族群之間嘅關係。「自私的基因」理論就唔著眼於個體，而係從基因嘅視角出發。雖然係唔同視角，但作者依然強調，只係一個理論用兩種視角嚟睇，「自私的基因」理論依然係分享住達爾文嘅演化論。

情況好似喺一張紙上面畫出一個Necker cube，其實即係喺平面畫3d嘅正方體，大家中學都一定畫過。你凝視呢一個正方體唔同嘅面，你就會覺得正方體係以唔同嘅面去面向你。我畫咗個正方體，將上面嗰面叫做A，將下面嗰面叫做B，當你凝視住A，見到一個正方體之後，你再凝視B幾秒，你會發現個正方體以另一個面面向你。人類嘅大腦真係好神奇。

總之，作者認為，以基因作為視點，同以個體作為視點，其實都係理解緊同一套演化理論。所以佢講到：「如果了解得很恰當，那它們是相等的──也就是對相同真理的兩種觀點。你可以從一種角度跳到另一種，但仍然是相同的新達爾文主義。」

作者指出，呢種Necker cube只能夠表達到視角嘅轉變，但係視角嘅轉變仲會為理論本身帶嚟更高價值。換言之，以個體去睇演化論，已經有一定意義；但係以基因去睇演化論，會將演化論嘅意義昇華。就好似愛因斯坦對一套理論有興趣，然後佢用比喻去說明／思考呢套理論嘅時候，新視角可以點燃佢對呢套理論嘅思考。講到可以點燃思考咁把炮，咁就要睇下係咪真係咁勁。

今集內容主要係《自私的基因》嘅前言同定義，下集先會講道金斯點樣講述生命起源。

今集內容包括：

• 「基因自私，人唔自私？」：我會喺正文列表對比道金斯同荀子嘅講法，你會發現道金斯嘅諗法，同荀子太似。
• 「異於禽獸」：我哋會睇下道金斯對「自私」同「利他」嘅特殊定義
• 「群體選擇」：作者反對「個體為群體犧牲」嘅演化論詮釋，原因何在？

去到第十二集，唔知你覺得《人類學家的無政府主義觀察》得唔得意呢？今集我哋會繼續去睇下，原來喺無政府主義者嘅視角之下，日常中嘅生活中嘅行為原來正正係一種不服從行為，例如揸車稍稍超速，行喺一條無鋪嘅路上面等等，呢啲行為就被政府同人民所組成嘅「沉默同盟」所默許，喺不停嘅不服從中，政府同人民就暗暗互相妥協。

然後，就會講下政治人物由於需要人民嘅支持，而用Charisma去迷惑/取信於人民，牛哥仲會馬丁路德金上身（當然差十萬九千里）。

最後，會預告一下下一本要講嘅書，估中有獎。

（正式內容由4:00開始）
_____
Instagram: @cowgortalk
文字版：https://bit.ly/2U1KUQL

今集要講嘅書係《人類學家的無政府主義觀察》，所以喺開頭嘅時候，會講下我所觀察到嘅消費劵使用頻率，而消費劵嘅目的，可能比你我諗嘅仲要深遠。

喺早幾集我哋講到《成功的反思》，可以見到一個社群主義者點樣以哲學嘅方式去審視政府同人民、才知者同非才知者嘅對立。而《人類學家的無政府主義觀察》除咗同樣揭示政府同人民嘅對立，更以此顯示秩序同混亂嘅對立，將秩序嘅井然、死板，混亂嘅創新、不堪一一道來，以一個中立嘅視角陳述各自嘅利弊，以嘗試尋求政府同人民嘅平衡點。

邀請你同牛哥一齊，戴上作者嘅「實踐中嘅無政府主義」嘅眼鏡，去用作者所觀察到嘅一塊又一塊碎片，去拼湊出一幅屬於你自己嘅無政府主義式生活嘅心態。

希望聽到最後嘅時候，你能夠感受到我所感受到嘅「我們最幸福」。

（正文由07:08開始）
___
Instagram: @cowgortalk
文字版：https://bit.ly/2U1KUQL

2021年嘅七月到尾聲，亦係奧運開始嘅時間，今集牛哥會同各位分享一下對奧運嘅睇法，而一如以往，我嘅諗法係會比較抽離，想法可能會同各位唔同，如果想法唔同，希望各位可以同我交流一下，相互啟發。

上一集我哋講到波蘭人同猶太人已經喺耶德瓦布內共居咗好多年，相處算係融洽，但係戰爭打響嘅時候，波蘭人對猶太人嘅敵視就不斷升溫，今集，我哋一齊透過唔同人嘅證言去睇下波蘭人點樣面對群眾嘅瘋狂，而瘋狂嘅程度甚至係有猶太人選擇去走到德國嘅憲兵站以逃過波蘭人嘅屠殺，原來喺瘋狂之下，唔會因為職業而有所限制，平民亦一樣可以到達瘋狂嘅極致。

在此記錄一下《鄰人》呢本書特別嘅地方，縱觀歷史，我哋唔難發現有好多嗜血、暴力嘅行為，只係呢啲唔理性嘅行為嘅執行者往往會係受過訓練嘅軍人，我哋或者可以話呢啲軍人係身不由己，有軍令在身。而《鄰人》記錄住嘅，係飽受戰爭之苦嘅平民，將自己一直以嚟嘅屈辱、苦痛施加喺猶太人身上，只係呢一切嘅宣洩帶嚟嘅唔係安穩，而係事後不停否認過去歷史嘅罪責，用短短嘅一生，喺歷史之中輪迴。作為旁觀者，要做嘅唔係與之對罵，因為否認歷史係佢哋最後嘅自尊所在，自然就會搏老命去堅持自己。旁觀者能夠做嘅，就係營造一個承認歷史嘅氣氛，謹此而已。

（07:00 記錄結束，正文開始）
_____
Instagram: @cowgortalk
文字版：https://bit.ly/3iDDKKG

今集，牛哥先記錄西歐、鄭州湖南水災；香港言語治療師總工會因為涉嫌發佈煽動刊物被捕；七月二十一嘅監警會報告；近來追星嘅熱烈。

牛哥記錄越嚟越多嘅事件，其實係啟發自今集要講嘅《鄰人》。呢本書以一個平凡嘅書名，記錄咗平凡嘅波蘭人，喺1941年7月10日將同自己民族同居咗超過二百字嘅猶太人屠殺殆盡，而屠殺發生嘅地點係一個田園式嘅小鎮----耶德瓦布內。而呢件令人唔容易接受嘅事件，亦唔受到依家居住喺耶德瓦布內嘅居民承認。

歷史事件有趣嘅地方在於，有幾多嘅發掘、證言都好，否認歷史嘅人總會充耳不聞，自以為自己得到天啟，眾人皆醉我獨醒。只係，批判呢啲否認歷史嘅人會唔會同樣落入同樣嘅我獨醒當中呢？

當下活著嘅人，就好似眼睛見唔到眼睛本身咁，必然要靠其他野（鏡、其他嘅眼）先可以觀察到自身。要辨清對錯，靠嘅，往往唔係自己。

「夫以銅為鏡，可以正衣冠；以古為鏡，可以知興替；以人為鏡，可以明得失。」

自以為是，自當不是
自以為不是，始尋個是
_____
Instagram: @cowgortalk
文字版：https://bit.ly/3iDDKKG

終於嚟到成功的反思嘅最後一集，牛哥喺開始嘅時候會記錄七一刺警同信義中學，然後去講sandel 點樣簡單解釋自由市場自由主義同福利國家自由主義嘅內容同點樣暗地裏支持才知主義，從而掘出才知主義嘅核心。Sandel 到底覺得對政治哲學有重大影響嘅Rawls有咩缺失？

同牛哥一齊思考同揭開自由派同才知主義嘅面具，認清遮蓋天空嘅利維坦。

「人生而不自由，自由始於認清天生嘅枷鎖。」

（以下為內容索引，有星即係好想你聽多幾次）
*00:50 七一刺警
*04:34 信義中學 （牛哥唱dear Jane）
———
15:30 自由市場自由主義
25:30 自由市場自由主義嘅兩難
27:40 福利國家自由主義（差異原則+天賦隨機）
36:00 對大於善
42:00 Rawls 支持嘅不平等
45:50 福利國家自由主義下嘅才知者同非才知者
*46:50 天材，荀子
49:30 機運平等主義
51:00 個人主義嘅危害
53:10 開始總結全書
57:00 自由派 消費者（農場比喻）
01:00:55 競爭關係
*01:02:30 民主 共同體 生產者
01:06:45 數據知侮辱
01:10:55 黑人白人bb比喻
01:12:25 重得尊嚴
01:13:40 自由派嘅英雄 其實係倖存者偏差？
01:15:00 群體 尊嚴
———
01:17:35 終於講完本書 社會主義嘅影子
01:18:50 認清問題
*01:21:20 牛哥點睇天賦人權 （唱e-kids）
*01:25:32 講下哲學點理解民主
_____
Instagram: @cowgortalk
文字版：https://bit.ly/3quamKA

呢集，牛哥首先會用歷史嘅進程為你解釋喺當前時代感到前路茫茫，實屬正常。既然未來好似迷霧，咁就係時候去靜一靜落嚟，去反思一下自己一直理解嘅概念係咩意思。今次，我哋一齊思考民主。 Michael Sandel 唔單止認為才知主義對才知者同非才知有害，更係會令現代民主失效。因為才知主義下，人民將自己嘅政治權利雙手奉上到代議士手中，但代議士根本唔會喺議會中理性討論。 一齊聽下現代民主嘅可惜之處，去認清我哋以為熟知嘅概念。一齊聽下現代民主嘅可惜之處，去認清我哋以為熟知嘅概念。 (正式內容由09:35開始） _____ Instagram: @cowgortalk 文字版：https://bit.ly/3quamKA

唔知你有無發現，呢個時代嘅人民唔再好似2000年嘅開始咁宣揚普世價值、自由平等。依家更多嘅係不穩同暴力，而革命、抗命、出人意表嘅投票結果可以話係此起彼落。到底點解有咁大轉變？ 一齊同牛哥藉由michael sandel 所寫嘅《成功的反思》，了解一下人民點解會如斯憤怒，呢個世代嘅平等又到底點樣構成一個屈辱政治。 (呢集嘅牛哥講經會出現第一個fake news，就係蘋果日報最後嘅紙本印刷係2021年6月24號，而非podcast 入面所講嘅26號。） (見到李家超先生自信咁話自己係碩士，唔知你會唔會諗起sandel 呢？） (正式內容由04:15開始） _____ Instagram: @cowgortalk 文字版：https://bit.ly/3quamKA

一行禪師嘅經歷，印證住遇到愛情未必係一件壞事，但仍然好難簡單咁定義為一件好事。人成日都話，知易行難，知道愛情嘅結果仍愛落去，睇落更難，而你，將要同一行一齊面對呢場愛情嘅結果。 問問自己： 如果春天嚟到，你會係靠近花蕊欣賞、定係思索點樣迎接冬天？ 如果冬天一瞬嚟到，你會手握褪色嘅花瓣、定係守護僅有嘅嫩芽/種子？ 聽牛哥用一個北歐神話總結，去細味愛情嘅味道。
_____
Instagram: @cowgortalk
文字版：https://bit.ly/34J69Zc

愛情被佛教所容許，但點解愛情會被佛教所容許呢？聽完今集你會發現，相戀時將佢當成一切，失去佢時將一切當成佢，其實都只係互即互入嘅表現。 一齊聽住牛哥唱歌，同用一粒牛丸去講出愛嘅真諦。 _____ Instagram: @cowgortalk 文字版：https://bit.ly/34J69Zc

本來我想承住劉紀璐就講牟宗三，但係牟宗三嘅思維連貫，若然我只講到一兩集牟宗三，可能只能夠講出一嚿雲咁。

思前想後，我決定牛哥講經講《易經》嘅第二集依然用劉紀璐作為主軸，但係會加插少少我認為牟宗三會點樣補充劉紀璐嘅內容。

（牟宗三對《易經》嘅詳細說明，我會喺牛哥解經同大家慢慢分享，如果大家理解到牟宗三對《易經》嘅睇法，會幫助到大家更容易理解牟宗三哲學嘅精神所在。）

今集，要講講《易經》所展示嘅道德宇宙論。西方學者發現，中國文化中無道德嘅立法者，於是，中國文化嘅道德來源，同西方思維有所不同。

我哋會從八卦、四原德（元、亨、利、貞）入手，了解中國式嘅道德宇宙論。

今集內容包括：

• 「三階段說」：先用三個階段總結《易經》嘅變化過程
• 「道德宇宙論」：以八卦作為例子，睇睇古人係點樣從自然現象睇出道德意涵
• 「四原德」：講述西方漢學家同劉紀璐點理解元、亨、利、貞。仲會講埋中國文化點樣理解「善」同「中和」

一行禪師原本全心專注於佛法嘅研習當中，但當一行遇到佢嘅時候，發現愛嘅種子明明確確咁生起，引發禪師對愛情嘅反思。如果求學時期不應談戀愛，咁求佛時期愛上一個人又點算呢？一齊聽下呢場戀愛故事，你就知道答案。 _____ Instagram: @cowgortalk 文字版：https://bit.ly/34J69Zc -----索引 00:55 初戀三摩地簡介 愛同去執嘅顯然矛盾 03:25 禪宗公案：婆子燒庵 04:35 一行嘅背景 06:05 一行遇到佢 06:55 愛嘅種子生起 07:30 解釋藏識 09:55 愛同戒律，並唔相容 11:00 在家修行，仍保有愛 13:25 領會佛法，如同捕蛇 14:10 法尚應捨，何況非法 14:50 到彼岸去，就放下筏 16:15 見山是山，見水是水 17:20 欣賞無常，接受無常 19:55 佛陀嘅愛，叫做慈悲 22:00 多謝收聽

2023年，《蒼鷺與少年》上映。宮崎駿時值八十二歲，毫無疑問，《蒼鷺與少年》係宮崎駿一部晚年作品。我原本喺標題寫到「宮崎駿致新世代嘅遺作」（但我結果無寫到上去，一陣再解釋），並唔係詛咒宮崎駿，亦唔係話呢部作品一定係宮崎駿嘅最後一部作品，只係我認為呢一部作品係宮崎駿以以下嘅心態製作：

「若然我要創作最後一部作品畀新世代，我會創作一部點樣嘅作品呢？」

結果，佢選擇將自己嘅人生掘出，呈現呢一部既現實又奇幻嘅作品。

現實方面，《蒼鷺與少年》當中嘅真人嘅唔少經歷同宮崎駿本人有親近之處；宮崎駿生於二戰時候嘅日本，佢嘅成長見證住日本傾國建造兵器、亦被戰火深深傷害。因而，如果大家對二戰時期嘅日本有一定認識（而我哋喺牛哥講經已經講過唔少），可以更明白故事嘅現實背景（真人同宮崎駿親近何在，就由你自己去對比，我只會著眼於故事中嘅真人）。

奇幻方面，電影中嘅神秘塔樓、同蒼鷺嘅冒險都可以用精神分析作為切入工具，分析箇中意義。我會盡量避開榮格喺《伊雍：自性的現象學研究》所用嘅術語，同大家較輕盈嘅態度咁同蒼鷺一同冒險。

（呢部電影情節跳脫，但係如果大家有睇過《千面英雄》，應該好容易投入其中，因為佢就講述一個主角脫離現世嘅冒險，只係今次嘅冒險係宮崎駿嘅內心寫照。所以，今集可以作為《千面英雄》集數嘅練習，考驗一下你對於神話／夢境語言掌握幾分！）

我必須先講明，今集，我只能夠一路講劇情，一路同你講榮格心理學可以點樣對應到劇情。但因為唔夠時間，我未能夠講到點解我認為《蒼鷺與少年》係寫畀新世代嘅遺作。我哋下集先會一次過講述種種象徵嘅意義。

近排見到有人喺影評網留言，話《蒼鷺與少年》好悶，唔知做緊咩。的確，若然一個人唔知道精神分析嘅成果，佢可能只能夠見到一個日本青年唔知點解入咗塔樓，喺塔樓有一場冒險，當中有蒼鷺，所以電影就叫《蒼鷺與少年》。

而我想用呢集說明：睇唔到電影嘅內涵，唔係因為才智，而係無適當嘅眼鏡；閱讀電影嘅眼鏡，就係理論。理論可以幫助我哋觀看電影嘅內涵。而我所講嘅理論，係要顯示：

《蒼鷺與少年》將榮格嘅「自我意識——陰影——聖耦——自性」嘅結構，以動畫形式展現。

就算入面嘅劇情幾不著邊際，睇得明內涵嘅人，就會明白呢套動畫點解能夠牽動人心。

我並非一個宮崎駿迷，我嘅意見無咩說服力，但我個人認為呢一部作品，係宮崎駿最值得睇嘅作品。

按：以下內容憑記憶寫，必定有從缺之處；如果講述情節有出錯，謹此致歉。

另：我無喺引子講述副標題，係因為我唔想劇透到唔想被劇透嘅人，要了解呢篇文嘅脈落，歡迎你去patreon睇文稿。

早幾日我喺IG問大家，喺2024年想聽我講咩書，由IG嘅聽眾提名書本，再交由Patreon嘅會員投票決定講邊本書。我希望用呢種方式可以同大家有更多嘅互動。結果，會員居然揀選咗《易經》，個人覺得幾意外，因為我都講過兩三集《易經》，以為大家已經會收貨，胡適系列講過一兩集，之後一集講易經點占卜，話時話有無人對我解卦有興趣（我可以試下以書直說一下）。

Anyway，既然大家咁聰明想聽《易經》，咁我都嘗試講講。要講述易經呢套哲學嘅內容絕對唔係一件容易嘅事，因為易經本身嘅表達方式係非常簡單，但係佢嘅內容同埋詮釋空間係非常廣闊。一個唔了解中國文化嘅人，基本唔可能理解易經嘅意義。但係大家聽咗咁多集牛哥講經，聽呢集時應該會幾開心。

今次，就用劉紀路嘅《中國哲學導論》為大家補充一下《易經》背後嘅宇宙論背景。《易經》嘅宇宙論背景對於西方人嚟講係好難跟，因為中國文化嘅宇宙論同西方有住完全唔同嘅邏輯。受到西方文化大量影響嘅現代人，亦自然唔容易理解中國文化嘅宇宙論。劉紀路難得咁樣搵到幾個西方漢學家，用比較現代嘅語言講解下點理解中國文化嘅宇宙論。

內容分成四個部分：

• 「中國無God」：傳教士將God翻譯成「上帝」，明顯改寫咗「上帝」嘅原有意思
• 「天人感應」：天人點解可能感應？
• 「變化之書」：《易經》所講嘅變化有咩獨特之處？
• 「三易」：三易其實講到底只係兩易

按：我哋喺牛哥解經已經用過牟復禮寫畀美國大學生嘅中國哲學入門，講咗中國文化嘅宇宙論嘅特性，視角比較大；今次會比較集中喺易經嘅視角睇中國文化嘅宇宙論。建議大家聽咗我之前喺牛哥講經講易經嘅集數，以及解經所講嘅牟復禮嘅《中國思想淵源》，再聽呢集，相信會更易吸收。

牛哥講經第一集已經講佛、我自己亦對佛學有一定認識，但大家都會見到，我自從講完《初戀三摩地》之後就無再講過佛。 原因其實好簡單，就係佛學難講（比中國哲學更難講）。要講咩十二因緣、諸行無常，呢種易講。但係要表現佛學嘅獨特，就唔容易做到。我不時見到有人依住佛嘅名號說話，卻睇唔出有幾分佛嘅精神。 我讀嘅佛學，係一種反對婆羅門教諸神、回應印度六派、唔需要將大量心力放喺理解輪迴系統嘅佛學。我亦可以喺度斷言，喺四大聖哲當中，最理性嘅唔係蘇格拉底，而係佛陀。{順帶一提，如果一個人非常在意前世今生，咁佢唔應該修佛，修習印度教應該更加合適、愉快。} 總之，我認為佛學有時的確需要用宗教語言嚟講，但係大部分時間都唔需要。讀佛學，就係讀緊兩千年前嘅印度哲學嘅精華所在。 我好明白佛所面對嘅背景為大家所陌生。所以我從一本講佛教嘅小說開始，等大家可以更輕鬆咁了解佛嘅故事。之後有機會，我哋再一步步講佛嘅背景同義理。 赫爾曼・黑塞（Hermann Karl Hesse）喺1946年榮獲諾貝爾文學獎，當中嘅致辭（Award ceremony speech）提到： “Hesse’s maternal grandfather was the famous Indologist Gundert. Thus even in his childhood the writer felt drawn to Indian wisdom. When as a mature man he travelled to the country of his desire he did not, indeed, solve the riddle of life; but the influence of Buddhism soon entered his thought, an influence by no means restricted to Siddhartha (1922) the beautiful story of a young Brahman’s search for the meaning of life on earth.“ 「黑塞嘅外祖父係著名嘅印度學者岡德特。因此，黑塞喺童年已經著迷於印度智慧。當佢長大成人，佢遊歷到佢所夢想嘅國度｛印度，黑塞喺印度旅行咗八個月｝，只係佢無因而解決到生命嘅謎題。但係，佛教嘅影響已經好快進入佢嘅思想，呢一股影響絕不限於令佢創作出Siddhartha，一部美麗嘅故事，關於年輕佛陀喺地上尋找生命意義。」（牛譯） 若然你熟悉佛教，你應該會知道Siddhartha係佛陀嘅本名，Siddhartha係梵文，由兩個詞語組成，分別係Siddha(已獲得），同埋artha（尋求之物），所以Siddhartha嘅意思就係「已獲得尋求之物」。赫爾曼・黑塞以此為背景，設想有一個要去尋找所尋求之物嘅Siddhartha，寫成呢本《悉達多》。 喺故事中，悉達多並非佛陀，因為赫爾曼・黑塞將佛陀嘅俗名「悉達多・喬達摩」拆分成兩個角色，喬達摩係書中嘅佛陀；而悉達多就成為一個六派、佛教以外嘅虛構人物，喺呢個動盪嘅時代，由一個最備受期待嘅婆羅門之子，從眾多學派當中掙扎，最終決意獨自踏上尋道嘅歷程。 我會喺今集嘅開頭，補充一下相關背景，然後睇下呢位婆羅門之子點解放棄婆羅門嘅榮華富貴。今集內容包括： 「吠陀傳統」：簡介一下印度嘅種姓制度嘅內容以及理論基礎。仲會講埋悉達多所面對嘅時代背景、所謂吠陀同吠檀多嘅意思。如果唔補充呢個背景，大家未必明白悉達多喺下一部分嘅心事。 「婆羅門之子」：悉達多非常聰敏，可以話係婆羅門嘅明日之星；悉達多嘅兒時玩伴喬文達，更當悉達多係偶像一般。只係外表風光嘅悉達多，卻有心事未解…… 「三個沙門」：悉達多見到三個沙門修行，決意跟隨沙門，佢因而要同婆羅門嘅父親爭論一翻。 引子

你自覺自己上個星期夠唔夠瞓？

你仲記唔記得上一次唔需要鬧鐘就瞓醒，唔使飲咖啡續命嘅日子？

若然你喺苦思之後，得出否定嘅答案。咁你並不獨單，據統計，所有已發展地區，有三分之二嘅成年人都達唔到每晚瞓八個鐘嘅建議睡眠量。

當然，大家唔係唔想瞓，亦都知道唔夠瞓會影響住身體，例如令人有幾高機率有冠狀動脈堵塞和脆化，從而得到心血管疾病、中風；又會加重精神障礙，包括抑鬱、焦慮、自殺傾向。英國作家夏綠蒂．勃朗特（Charlotte Brontë）講過：「煩躁之心，寢枕難安。」其實佢漏咗下一句，「寢枕難安，煩躁之心。」

只係忙碌嘅人生，已經使得「至死方休」呢個成語變成令人哭笑不得嘅幽默。唔夠瞓喺自然界係非常罕有；人類，係唯一一種喺無益嘅情況下故意剝奪自己睡眠嘅生物。

唔夠瞓嘅其中一個徵兆，就係喺疲倦嘅時候想食更多嘢，咁係因為人唔夠瞓嘅時候，會令感到飢餓嘅激素濃度提升，而另一種話畀身體知自己已經食飽嘅激素亦會受到抑制。所以人即使食飽，依然仲想食嘢。換言之，唔夠瞓，就會體重增加（唔好以為節食會解決到體重增加，當人節食，又瞓得唔夠，消耗嘅大部分都係肌肉，而非脂肪）。

若然你有睡眠不足嘅徵兆，咁你就要睇下比爾蓋茲喺2019年嘅年度選書──《為什麼要睡覺》，去認識睡眠更多。作者沃克（Matthew Walker）認為社會對於睡眠唔夠關心嘅其中一個原因係：科學一直解釋唔到點解人需要睡眠。喺科學史上，睡眠係一大未解嘅生物謎題。科學一路發展，已經出現高強嘅解謎手段，例如遺傳學、分子生物學、強大嘅數位科技，但係都係唔能夠撬開睡眠嘅牢固地窖。有一個有趣嘅故事去說明過去科學對於睡眠嘅蒙昧無知：

想像有一個bb出生。

醫生同媽媽講：「恭喜你，係一個好健康嘅男仔，我哋已經做完所有初步檢查，一切都無咩問題。」

正當媽媽滿意咁樣轉身離開，醫生繼續講到：

「只係，你嘅小朋友由依家開始，會有一個情況持續一生，佢會反覆而規律咁陷入一種睇落好似係昏迷嘅狀態，有時直頭好似死咗咁。而當佢瞓喺度唔郁嘅時候，佢個腦會經常上演驚人又奇怪嘅幻覺。呢種狀態唔會霸佔佢好多時間，計落都只係佢人生嘅三分一時間。我完全唔知點解會咁，亦唔知呢種情況有咩作用。anyway, good luck!」

你諗下，生命中嘅其他三種驅動力──食嘢、飲水、生殖，人都了解有咩作用。但係偏偏瞓覺呢個第四項生物主動驅動力，卻喺幾千年間都逃過科學嘅檢驗。大家都只係接受瞓覺作為事實，而無法解釋瞓覺。

如果我哋從演化論嘅觀點嚟睇，情況更為奇怪，因為瞓覺點睇都似係所有生物現象中最蠢嘅一件事。瞓覺嘅時候無辦法獵食、社交、繁殖、保護自己或者下一代，甚至成為獵食者嘅獵物。照道理，生物係有好大演化壓力避免瞓覺，阻止類似瞓覺嘅現象出現，但瞓覺卻係普遍到不得了，科學家暫時所檢驗過嘅物種通通都係會瞓覺。

正如世界頂尖嘅睡眠研究者瑞赫夏芬（Allan Rechtschaffen）博士所講：

「如果睡眠沒有提供任何關鍵性的重要功能，那就是演化犯下的最大錯誤。」

因此，作者認為瞓覺一定有重要作用，重要到千萬年嘅演化都篩唔走。

「睡眠在地球上是和生命本身一起演化的，或至少該是生命誕生後不久就出現。更進一步來說，睡眠在整個演化史上持續存在，表示它必然有強大的好處，勝過那些看似明顯的危險和不利之處。」

我唔會同大家講唔夠瞓有咩壞處，你有興趣自己去睇／去google 唔瞓覺嘅壞處，我只會同你講

1. 有咩影響睡眠

2. 點樣睡眠

   
   

今集，我哋會從生物學嘅角度，睇睇影響睡眠嘅因素。

內容分成咗兩大部分：

• 「澄清」：當我哋問「點解要瞓覺」往往預設咗瞓覺只有一個單一功能，呢點係非常唔正確，因為瞓覺有一系列作用。
• 「兩個因子」：我哋會講下影響睡眠嘅兩大因子：生物時鐘以及睡眠壓力。

喺「生物時鐘」方面，我哋會講講科學家親身做過實驗，證實人嘅生物時鐘唔係二十四小時；原來「夜貓」係天生；褪黑激素原來幫唔到入睡！？

喺「睡眠壓力」方面，我哋會講講腺苷會點樣影響人入睡；腺苷同生物時鐘呢兩套系統嘅作用會使得通頂嘅你，喺朝早非常精神……
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】

喺上集，我以一隻船去比喻MBTI嘅四個位置，而上集嘅內容只係夠時間講到第二、第三位置，即係船嘅兩組推進器。

今集就要講埋第一、第四位置。就算你同你嘅朋友只係有一個英文字嘅唔同，都可能會有住唔同嘅「主導精神活動」，思維上亦因而有住非常唔同嘅側重點。今集，我哋會一齊去搵出你嘅「主導精神活動」，同埋講講搵出「主導精神活動」嘅意思。內容包括：

「外傾，內傾（1）」：我哋會講講外傾同內傾會點樣影響一個人嘅感知（第二位置）、判斷（第三位置）

「感知態度，判斷態度(4)」：解釋一下點解以「船長態度」理解第四位置。順便講埋外傾人係好易搵到自己嘅「主導精神活動」

「主導精神活動過程」：睇下內傾人要點樣間接咁搵出自己嘅「主導精神活動」。同埋以「將軍」同「僕人」嚟理解「主導精神活動」嘅意思

正文內容嘅最後，我仲列埋個表，大家可以一眼就搵到自己嘅「主導精神活動」。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】

相信大家都會留意到MBTI非常盛行。唔理係同對方初次見面、定係面對識咗一排嘅老友，大家總會互相詢問彼此嘅MBTI。一個喜歡mbti嘅人，甚至會喺對方回答之前，估算對方嘅答案。當對方講出四個平凡嘅英文字母，人就可以掌握到對方嘅心靈特徵，點解會咁神奇呢？

要知道，MBTI嘅作者伊莎貝爾・邁爾斯(Isabel Myers) 並無一個同心理學相關嘅專業資格，而佢所發明嘅人格測試並無被心理學界重視。只係大眾對於MBTI嘅熱愛，令學術界大跌眼鏡。

今次我要同大家分享嘅書，就係邁爾斯為解釋自己嘅理論親手所寫嘅《天資差異》。當中指出美國500強嘅企業當中，有8成以上嘅高層管理者都使用過MBTI，去了解員工嘅處事風格、特點、職業適應性、潛質等等……MBTI嘅實用性已經不容忽視。

到邁爾斯82歲嘅時候，仍然修改緊MBTI、為呢一本《天資差異》校讀同改錯。今集，我哋就要一齊睇睇MBTI作者點樣總結自己嘅理論。

內容包括：

「歷史背景」：我會同大家講講邁爾斯面對嘅歷史背景，簡述MBTI係點樣回應「一種正常人觀點」以及榮格心理學

「理論基礎：人格差異的類型思考」：我哋會睇下mbti所代表住嘅「人格差異」理論到底有咩意義

「四種人格類型」：用簡單比喻了解MBTI四個位置嘅意思，明白MBTI嘅藍圖

「感知，判斷」：我哋會深入少少睇下MBTI嘅第二、第三位置嘅意思，以及第二、第三位置組合之後所代表嘅特徵，即係ST、SF、NF、NT

我寫咗個幾有意思嘅結語，記得聽到最後。其實MBTI唔需要記，因為佢同康德……
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】

歡迎你嚟到《牛哥讀經》嘅第七集，今集係胡適系列嘅第六集。我哋講下胡適對《西遊記》嘅考證。

喺民國時期，有人從日本搵到一個南宋時期嘅《西遊記》版本，呢個版本引起唔少民國學者嘅注意，包括胡適同魯迅，魯迅喺《中國小說史略》講到：「還有現在新發現的一部書，叫《大唐三藏法師取經詩話》，──此書中國早沒有了，是從日本拿回來的——這所謂 「詩話」，又不是現在人所說的詩話，乃是有詩，有話；換句話說：也是註重「有詩為證」的一類小說的別名。」

而胡適就特登搵出《大唐三藏法師取經詩話》（下稱《取經詩話》）同依家《西遊記》嘅關係。藉由《取經詩話》，你會見到：

• 悟空初見唐僧，發現唐僧取西經團隊有x個人，然後以「白衣秀才」相出現，仲好了解唐僧嘅前世

• 悟空見到幡桃唔敢偷，點知唐僧竟然……胡適於是話「唐僧卻不大老實」

• 沙僧對應《取經詩話》嘅深沙神，佢所戴嘅頭骨，同唐僧前兩世有關；後嚟深沙神、唐僧、悟空仲嚟咗場詩歌battle

• 悟空大戰白虎精，立下鍾意入敵人個肚嘅戰術原型

有咗《取經詩話》嘅背景，你對於依家《西遊記》嘅某啲情節，會明白更多。

今次，我會直接由胡適嘅〈《西遊記》考證〉嘅第三章開始講。〈《西遊記》考證〉，原載1923年2月4日《讀書雜誌》第6期。

上一次嘅諮商，蒼鷺給予蛤蟆一份作業──回憶童年。因為喺心理諮商嘅角度，童年時期會改造「自然型兒童」，「自然型兒童」會因應環境變化而成為「適應型兒童」。如果一個人喺思維上無咩大轉變，咁佢嘅「適應型兒童」會停留喺童年時期應對家人嘅時刻，換言之，佢會以應對童年嘅方法，去應對社會，因而作出「幼稚」嘅行為。

今集，我哋會同蛤蟆先生一齊回憶佢嘅童年。從童年嘅碎片，蛤蟆先生覺察到自己係一個唔識得憤怒嘅「適應型兒童」。今集內容分成兩個部分：

「第四日」：蛤蟆先生開始回憶自己憤怒處處嘅屋企，念及嚴厲嘅父親同永遠當蛤蟆先生係小朋友嘅母親，蛤蟆先生感到憤怒，但又唔懂得釋放。難以釋放憤怒原來係源自小朋友嘅「順從行為」。

「第五日」：蛤蟆先生開始懂得去疑問「點解發嬲嘅永遠唔係我，而係其他人？」之後，蒼鷺同蛤蟆先生一齊分析憤怒，蒼鷺仲講出「仁慈嘅獨裁者」呢個概念。

今集，應該係牛哥講經最後一集嘅蛤蟆先生，希望你會鍾意，如果有內容補充，咁就會員podcast再講。喺結語部分，我邀請咗會員寫一封信畀蛤蟆先生，大家記得聽到最後。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】

明明孔子有個老虎咁好打嘅老豆，點解《史記》話「孔子貧且賤」、係「野合之子」，仲話孔子要將母親嘅棺木泊喺大馬路？

孔子嘅說話，你就聽得多（咩學而時習之／三人行必有我師）。但你有無諗過孔子嘅人生係點呢？最簡單咁問，孔子嘅童年係點？點解《史記》所講嘅野合之子會成為萬世師表？今次，就用十五分鐘嘅時間同你一齊用《史記》回顧孔子嘅童年。

你會發現，孔子嘅故事唔係紙上談兵、議論天地嘅貴族之子，孔子係聖人，但首先佢係一個有血有肉、從現實掙扎嘅平凡青年。佢成長於單親家庭，自出生就唔被視為貴族，然後，營營役役、捉住機會，依靠亡母嘅棺木去換取貴族身分。對於當時人嚟講，孔子嘅行為係壞過凱婷。

一齊睇下，被人稱為「累累若喪家之狗」嘅孔子到底點樣去追夢。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】

喺生活雜談嘅ep5，我哋已經從唔同宗教嘅角度，講述猶太人經歷羅馬嘅驅趕，離開祖先之地之後嘅早期行徑。

威爾．杜蘭以一個美麗而古老嘅名稱，形容猶太人由公元一世紀嘅徹底亡國，到喺1948年以以色列之名復國嘅故事──奧德賽。呢集，我哋就要講講猶太人離散到世界各地嘅故事。

從依家嘅視角睇嚟，流離到復國嘅一切等待或忍耐都係理所當然。但大家有無諗過每一個猶太人喺流離之際，都難以想像佢哋離散二千年後都仍舊可以聚首於當年嘅祖先之地──耶路撒冷？有幾多個人理解即使各散東西，猶太人嘅社群依舊非常團結嘅原因？

今集，我想喺講述背景嘅部分同大家講講猶太社群傳播到歐洲嘅路徑、以及喺歐洲社會下如何生存。其後，我會藉由簡述猶太裔哲學家斯賓諾沙嘅生平，陳述斯賓諾沙被逐出猶太社群嘅經過同結果。內容包括以下部分：

猶太人的奧德賽(Odyssey)：猶太人自耶路撒冷被驅離，分咗東、西線遷移。其中，西班牙成為重要地點，因為西班牙喺八世紀被阿拉伯文化佔領，猶太人因此定居西班牙。不過，好境不常……

斯賓諾沙的教育（心理發展）：斯賓諾沙喺一個傳統嘅猶太家庭長大，天資聰敏。當佢閱讀偉大嘅猶太拉比作品嘅時候，佢發現「信仰最聰敏的捍衛者也是它最大的敵人」，於是，佢開始閱讀西方哲學嘅成果……

被逐出教會的猶太人：斯賓諾沙嘅思想被猶太會堂定為異端，本來斯賓諾沙可以輕鬆應對，但佢決定接受最差嘅結果──逐出會堂，我哋會一齊睇下猶太會堂嘅宣言。

一齊閱讀呢位猶太裔哲學家嘅一生，睇下一個愛神而不被理解嘅人，如何被逐出會堂、逐出社群，成為名符其實嘅「異鄉人」。

幾經波折，蒼鷺終於說服到蛤蟆先生自願參與心理諮商。但係到第二次諮商之前，蛤蟆先生嘅情緒都無咩太大改善。

喺蒼鷺問：「How are you?」嘅時候，呢個傷痕纍纍嘅心靈自動回答出：「I am fine, Thank you」。雖然教科書式嘅回答只係自欺欺人，但係比起為別人帶嚟精神負擔，一個安全嘅回答都係一個唔錯嘅選擇。

蒼鷺並無止步喺呢個教科書式嘅回答，而係進一步詢問蛤蟆先生嘅真實情感，肩負住同蛤蟆先生一同回憶過去情感嘅任務。途中，蒼鷺發現到蛤蟆先生喺唔同事件嘅共同情感……

今集內容包括：

• 「第二日」：我哋會睇下「I am not fine」嘅蛤蟆先生經歷過咩事，然後蒼鷺講出咗「兒童自我狀態」呢個重要概念。

• 「第三日」：了解 「兒童自我狀態」嘅意思，搵出每個人都有嘅「基本情緒」，再理解「基本情緒」同往後行為嘅關係。當中有啲論述太似儒家，所以我會加兩句儒家對於人性嘅理解落去。

—

按：香港其實有唔少page 有講心理學，之前喺story 問聽眾有無推介心理學，大家主要提出四個：

• 樹洞香港 @treeholehk.psychology 以podcast 形式分享心理學相關議題，有線上線下活動參加。喺灣仔有辦公室。

• 點解學校無教情緒課 @whyemotionisnotasubject 出咗三本書講情緒同人際關係，ig 嘅圖都好貼近現代人嘅心靈。

• 說書人 @storytalerhk 由臨床心理學家同有精神病經歷所共同組成，旨在提高精神健康意識，減少對精神疾病嘅污名同誤解。親切又有資歷，近排仲係八週年。

• 心導遊 @jctourheart 馬會資助，請好多專業人士做免費講座，仲有個apps 可以同阿本傾偈。

佢哋嘅page 都有用簡易嘅圖片同字句同大家分享心理學相關知識，所以大家有需要都可以去睇睇。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】

如果大家有行開書店，應該都會見到呢本《蛤蟆先生去看心理師》嘅身影，佢都頗為暢銷。《蛤蟆先生去看心理師》嘅暢銷，一方面，顯示住人對精神健康關注多咗，固然係好事；另一方面，說明佢所代表嘅議題受到關注，當一個議題會受到關注，往往係佢已經成為咗一個問題。

換言之，越嚟越多人發現自己或者身邊人嘅精神健康有困擾，先會關注精神健康。

藉由大眾對於精神健康同心理諮商師嘅好奇，配合輕鬆嘅動物故事，《蛤蟆先生去看心理師》打動咗唔少讀者。呢本書對兩類人特別適用。

1）如果你身邊有一個唔開心嘅蛤蟆先生，你應該會從呢本書中見到錯誤示範同正確示範，咁你就可以避免地雷同學識嘗試轉變態度對待蛤蟆朋友；

2）如果你本人就處於蛤蟆先生嘅憂鬱狀態，你應該會有時同蛤蟆先生感同身受，因為蛤蟆先生喺故事當中會受到唔少委屈同不被理解……心理諮商師到底會點樣從中協助呢？係唔係真係咁神奇地可以從對話就可以理解到蛤蟆先生呢？

今集內容包括兩部分：

• 「第零日」。我哋會睇下蛤蟆先生嘅情況同蛤蟆先生嘅朋友點樣面對蛤蟆先生
• 「第一日」。喺第一日嘅心理諮商，蛤蟆先生懷住聽大道理嘅預感去接受心理諮商，點知，心理諮商師蒼鷺就引導蛤蟆先生進入一個陌生狀態，佢發現，心理諮商師原來唔係說教者，而係……

依家，一齊進入蛤蟆先生嘅故事啦！放心，呢集會幾輕鬆。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】

大約一年前，我問大家有咩書想我講，結果係《鼠疫》。拖咗咁耐，依家終於找數。有兩個藉口，一來係因為我寫極都唔滿意，隔一排就修改、隔一排又修改……

二來，《鼠疫》係卡繆非常出名嘅著作，但要解釋佢嘅存在主義意味，總係要回顧存在主義嘅背景，適逢我喺西哲幼稚園以《非理性的人》解釋緊存在主義同古希臘、希伯來文化嘅關係，我認為係一個好機會介紹《鼠疫》，兩者應該可以相輔相成。

不知不覺，寫存在主義簡介已經寫過四萬字，呢四萬字講到底就係講述西方哲學點樣反思信仰與理性、存在與本質。個人而言，樂在其中。若然你對存在主義嘅背景有興趣，我誠邀你加入到會員，一齊閱讀西方哲學嘅源頭，原來存在主義嘅源頭，可以追溯到去柏拉圖……

今集內容會講講《鼠疫》嘅第一章。喺正文內容，我會簡述奧朗城以及里厄醫生面對鼠疫浮現嘅反應。同時省略某啲角色嘅描述，因為我主要嘅討論對象，就係里厄醫生本人。

我只能夠為你呈現呢本書嘅一部分有趣之處。如果有機會，我都想同你一齊睇埋後面，因為卡繆對信仰嘅反思係好到肉。

今集會分成四個部分：

「奧朗城」、「老鼠之死」、「恐懼與平靜」、「準備」

一齊聆聽一座平平無奇嘅海岸城市──奧朗城所發生嘅故事，睇下卡繆點樣去刻畫一個城市同一個醫生嘅態度。兩者嘅比對，引人入勝。

然後，我會喺結語同大家一齊思考第一章嘅內容。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】